3
Mawoyəŋ asal magoɗay: Mas ŋgərpa kà aŋa azladeda
1 La kiya uwaga kà, gəl akàɗ anu à vok, kà uwana məɓəzà à wakità aŋkul aw. Gay gà la uwaga, məslàla vok aŋa mabasiŋ aw, maslà mədzùgw aŋa masləl akul Timotawus à awtày à slaka aŋkul, ŋgaha anu aŋa madz à ahəŋ la Atena disa.
2 Kiya uwaga məslə̀l akul deda gami Timotawus à awtày, uwana məɗàh sləray aŋa Zəzagəla la slaka gà anina, kà uwana anu məzìŋ gay marabəŋ lakəl aŋa Yesu Kristu la slaka gà. Kiya uwaga məslə̀lla akul à awtày kà masla aŋa madzərəɗàh akul à uda la madiŋal gəl à vok la abà.
3 Ŋgaha kà dza aŋkul aŋa mawul à lig, kà ŋgərpa aw. Kà uwana uwaga kà, agay tatak gami, anu azlaməna manəfay bay.
4 Ndzer, mok uwana mələg la tataka aŋkul la abà kà, məpə̀h à akul gay aŋa ŋgərpa uwaga à vok à abà dagay uwarà, lagwa kà masla gà la uwaga adaɓəza akul. Sə̀làw la lela!
5 Gay gà la uwaga à uwana, məslala vok aŋa mabasiŋ aya aw, à uwana məslə̀l Timotawus à awtày kà masəlay lakəl aŋa madiŋal gəl à vok aŋkul, ŋgaha kà gi aŋa masəlay babay. Guba azà à gi kà seteni aŋa madukw akul à ahəŋ, ŋgaha sləray gami aŋa mapakay deyday.
Ləv gami adatas ala, kà uwana akul la tetəvi delga la ama
6 Kay, ama lagonay kà Timotawus adawul à waŋ, adaraba à anu ləv, la gay madiŋal gəl à vok aŋkul, la masal aŋkul uwana kapə̀hàwla ala. Agòɗ à anu kà, kadzugwaw kà lakəl gami koksikoksi, asa à akul manəŋ anu bokuba uwana asa à anu manəŋ akul.
7 Haɗay azladeda, mədzà à ahəŋ la iyaw tugwi la adi məŋga, ama à mok uwana mədatsən gay aŋkul kà, kadiŋaw gəl à Yesu à vok kà adzərəɗàh anu à uda.
8 Lagonay kà, bà uwana akul la tetəvi aŋa Zəzagəla la tsəh kà, ləv gami adatasl ala adagay.
9 Iyay zlà, madəv kuɗa gesina la kikay uwana məgoɗ à Zəzagəla kà aŋkul ma asla takay? Mədəval kuɗa kà marabay məŋga uwana karàbàw anu la huma aŋha.
10 La mok uwana mədəv kuɗa mahənay la mavakay kà, kà masla aŋa mav à anu tetəvi aŋa mad manəŋ akul à gay. Asa à anu kà anu mətapakulla gay uwana aləg à akul, à gay aŋa matapla la madiŋal gəl à vok la abà.
11 Gay gà la uwaga mədəv, kuɗa à Zəzagəla Baba gami la Sufəl gami Yesu, kà atà aŋa mapəzl anu tetəvi aŋa mad à awtày kà manəŋ akul à gay.
12 Delga kà Sufəl azigən mawoy vok aŋkul, ŋgaha kawoyaw azladza gesina kalkal bokuba uwana məwoya akul.
13 Kiya uwaga masla adàvà à akul ndzəɗa à ləv aŋkul à tsəh, kà akul kadàgaw sətaka la huma Zəzagəla Baba, la mok uwana Sufəl Yesu adàwul à waŋ à gudəŋ à vok la azlaaŋha.