5
1 Tadigu e, adavagu e,
egu uma lalonai na raka vareaimu.
Egu muro bona egu muramura mai bonadia na haboudiamu;
bada mai ranuna ida na aniamu,
egu vine ranuna bona egu rata na inumu.
*****
O hetura hehenimu taumui e,
bavaniani, vine ranuna ba inua.
O helalokau hehenimu taumui e,
ba inuinu, ba inu momo.
*****
2 Na mahuta, to lalogu be noga;
A kamonai, egu lalokau tauna e pidipidimu.
*****
Taihugu e, egu Ialokau,
egu pune, oi na ḡoeva-dae!
Iduaragu ba kehoa.
Badina be hunu ese kwaragu vada e hapariparia,
hanuaboi hununa ese huigu vada e hapariparia.
*****
3 A lau be dabua vada na dokia oho,
ma ede baina dokia lou toma?
Aegu vada na huridia,
ma ede baina hamirodia lou toma?
4 Egu lalokau tauna imana na iduara ikouna ai e daukau,
bena kudougu e hetaha.
5 Lau na tore isi,
egu lalokau tauna iduarana baina kehoa.
Muro na imagu amo e hetuturu,
muro ranuna na imagu kwakikwakidia amo e hetuturu dobi,
iduara ikoulaina auna ai.
6 Egu lalokau tauna iduarana na kehoa;
to egu lalokau vada e raka oho, ia na lasihia.
E hereva negana ai laumagu na e daure,
a na tahua negana ai asina davaria,
bona na boi henia negana ai ia na se haere.
7 Gima taudia ese e davarigu,
hanua ai e loa eva-eva ai;
idia ese e dadabagu bona e haberogu,
egu hetaru e abihaigu,
maḡu igimana taudia ese.
8 Ierusalem kekenimui e, na haḡanimuimu,
egu lalokau tauna boma davaria, boma hamaoroa,
uraheni ese e hamasegumu.
*****
9 Hane namo e,
emu lalokau tauna ede e herea tomamu?
Ede e herea tomamu dainai
bena ini o haḡanimai tomamu?
*****
10 Egu lalokau tauna kopina na ḡoevaḡoeva bona kakakaka,
gerebu-ta bogaragidiai ia mo sibona herea.
11 Kwarana na gold namo-hereana;
ia na hui-tuma, bona huina na korema-korema,
galo huina na heto.
12 Matana na ranu badidia ai e nohomu punedia na heheto,
rata ai e huridiamu, e heato ḡoevadaemu.
13 Vahana na muramura avadia umadia na heheto,
mai bonadia.
Bibinana na sosana,
muro ranuna na idia amo e vevemu.
14 Imana na gold, e hakuboroa heḡeḡe ḡauna,
mai herahera nadidia ida.
Tauna na aivori,
mai sapairo nadidia ida.
15 Aena na bauka-bauka, nadi kurokurona na heto;
hehedaikau gold-na ai e hadaidia kau.
Ita-itana na Lebanon na heto;
hairaina na Lebanon sidadia na heheto.
16 Ena hereva na gaiho herea;
lau na ura henia lalo-dikamu.
Ierusalem kekenimui e, egu lalokau bunai,
bona turagu bunai.