24
David ese Israel bona Iuda taudia e hagaudia
1 Iehova ena badu ma e vara lou Israel taudia latadiai. Bena idia ihadikadia totona ia ese David e dibaḡania, eto, Aola, Israel taudia bona Iuda taudia ba hagaudia lao.
2 Taunabunai, hanua pavapavana ese Ioab bona ena tuari biagudia e hamaorodia, eto, Israel iduhudia iboudiai ba rakadia hanai, Dan amo ela bona Bere-sieba, bona taunimanima iboudiai ba hagaudia, baina diba idia be hahida.
3 A Ioab ese hanua pavapavana e hamaoroa, eto, Iehova, emu Dirava, ese taunimanima na nega sinahu-ta amo baine hahutumadia, bona egu lohia bona egu pavapava matamu ese bae itadia; a dahaka dainai egu lohia bona egu pavapava ese ina kara o moalelaiamu?
4 A hanua pavapavana ena hereva ese Ioab bona tuari biagudia edia hereva e laodia ahu. Taunabunai, Ioab bona tuari biagudia ese hanua pavapavana vairana amo e raka lasi, Israel taudia bae hagaudia totona.
5 Idia ese Ioridane sinavaina e hanaia, Aroere ai e matamaia; koura bogaraginai e miamu hanuana amo e matamaia, Gad kahana ai ela, ma ela, ela bona lasere.
6 Bena Gilead ai e kau, una murinai Kade ai e kau, Hiti taudia edia tano ai. Una murinai Dan ai e kau; bena Dan amo e raka heḡeḡe ela bona Sidono,
7 bona Turo kohorona, bona Hivi taudia bona Kanaan taudia edia hanua iboudiai. Unu amo Iuda diho kahana ai e lasi, Bere-sieba ai.
8 Taunabunai, idia ese tano idoinai e rakaia hanai, ela bona Ierusalem ai ma e kau. Edia laolao dinadia na hua taurahani-ta bona dina ruahui.
9 Bena Ioab ese taunimanima ihagaudia herevana na hanua pavapavana e henia: Israel ai goada taudia mai edia dare na domaga taurahani, bona Iuda taudia na domaga ima.
10 Bena David na lalona ese e botaia, taunimanima e hagaudia murinai. Bena David ese Iehova e hereva henia, eto, Vada na kerere dikadika egu kara ai. Iehova e, na noimumu, emu hesiai tauna ena dika bavabia oho; badina be vada na kavakava herea.
11 Daba ai, David na e tore isi negana ai, Iehova ena hereva na peroveta tauna Gad, David ena mata-hanai tauna, enai e kau, eto,
12 Aola, David ba hamaoroa, baoto “Iehova na ini e gwau tomamu: Ḡau toi na dudu henirnumu, tamona bavabia hidi, bena unu baina kara henimu toma”.
13 Taunabunai, Gad na David dekena ela, e hamaoroa, eto, Laḡani toi lalodiai doe na emu tano ai baine kau a? Eiava, hua toi lalodiai inaimu ese bae hahavamu, bena vairadia amo ba heau a? Eiava, dina toi lalodiai gorere na emu tano ai baine dai hanai a? Ba haeroa, bena ba hereva, e siaigu Diravana ese ede baina haere henia toma.
14 Bena David ese Gad e haere henia, eto, Daragu eme doko; Iehova imana ai baita moru be namo, badina be ena hebogahisi na bada; a lau na taunimanima imadia ai basina moru.
15 Taunabunai, Iehova ese dai-hanai gorerena ta Israel latanai e siaia, daba amo, ela bona e gwauraia negana e ore. Bena Dan amo ela bona Bere-sieba taunimanima gerebu-hitu e mase.
16 A aneru ese Ierusalem ihabua-tarina totona imana e toi roro henia negana ai, Iehova na una dika amo e helalo kerehai, bena ia ese taunimanima ihabua-taridia aneruna na e hamaoroa, eto, Vadaeni, imamu a haloua.
Iehova ena aneru na Arauna, tau Iebusu, ena uit ikwadina gabuna badibadinai noho.
17 David ese hari taunimanima e aladiava aneruna e itaia, bena ia ese Iehova e hereva henia, eto, Lau na vada na kara dika, vada na kara havara; a ini mamoe be ede vada e kara toma? Lau na noimumu, oi imamu ese lau baine hadikagu, bona tamagu ena iduhu baine hadikaia.
18 Una dina ai, Gad na David dekena ela, eto, A dae lao, Arauna, tau Iebusu, ena uit ikwadina gabuna ai Iehova ena ihaboulaina patana ta ba larebaia.
19 Bena Gad ena hereva dainai David na e dae ela, Iehova ena haheḡani heḡereḡerena.
20 Arauna na e roha lao, hanua pavapavana mai ena hesiai taudia ida e itadia, ia dekena e maiva; bena Arauna na e raka lasi, tano ai e goru diho, hanua pavapavana e toma henia diho.
21 Bena Arauna eto, Egu lohia bona egu pavapava na ena hesiai tauna dekegu vada oma badina be dahaka? David eto, Emu uit ikwadina gabuna na baina hoia, Iehova ena ihaboulaina patana ta baina larebaia, dai-hanai gorerena na taunimanima edia amo baine heabi-oho helaoreana.
22 Bena Arauna ese David e hamaoroa, eto, Egu lohia bona egu pavapava emu lalo-hadai namona heḡereḡerena, ḡau bavabi bona ba hahelaḡa. Boromakau mamaruanedia bini, ḡole-oho boubouna gaudia; bona uit ikwadilaina audia bona boromakau pagadia madunadia na lahi audia ai baela.
23 Pavapava e, Arauna ese ini ḡau iboudiai na hanua pavapavana e heniamu. Arauna ese hanua pavapavana ma e hereva henia, eto, Iehova, emu Dirava, ese baine abimu dae.
24 A hanua pavapavana ese Arauna e haere henia, eto, Lasi, baina hoia, davana na baina henimu. Asi davadia gaudia na basina hahelaḡadia, gole-oho boubou ḡaudia ai basina halaodia, Iehova, egu Dirava, ena. Taunabunai, David ese uit ikwadilaina gabuna bona boromakau mamaruanedia na e hoi, davadia na e heni, silver sekeledia imahui.
25 Bena David ese ihaboulaina patana ta unuseni ai e larebaia, Iehova ena; bona ḡole-oho bouboudia bona maino bouboudia e hahelaḡadia. Taunabunai, Iehova ese noinoi tano dainai na e kamonaidia, bona dai-hanai gorerena na Israel ena amo e hegwau tao.