17
Iuda taudia lalodia vada e kerere
1 Iuda taudia edia kara dika na auri purina amo vada e torea; vasiga matana amo idia lalodia ai vada e gasia, bona edia ihaboulaina patadia doadia ai;
2 bona natudia ese danu edia ihaboulaina patadia e lalodia taomu, bona edia au-tubua helaḡadia danu, au mauridia iboudiai badibadidiai, bona ororo doridia ai,
3 bona tano paka ororodia ai. Emu taḡa bona emu kohu namodia iboudiai na haida baina henidia, edia dadidadi ḡaudia, emu kara dika davana emu tano idoinai lalonai.
4 Imamu na ahumu, na henimu ḡauna, amo do bavabia oho, bena baina siaimu, asi dibamu tanona ai inaimu isiaidia ba lao heni; badina be egu badu ai lahi ta vada e ara, bona baine ara hanaihanai.
5 Iehova ini e gwau tomamu:
Taunimanima e abidadama henidiamu,
bona hidio na ena goada badina ai e halaoamu,
bona lalona na Iehova ena amo e raka ohomu,
tauna na bae uduguiraia.
6 Ia na au rabatarina tano kaukauna ai na heto;
ḡau namona ta ia vairanai basine hedinarai.
Tano ḡaḡaena haura-hauradia ai baine noho,
laguta ai, tau ta ese se noholaiamu tanona ai.
7 Iehova e abidadama heniamu tauna na namo;
ena heabidadama na Iehova.
8 Ia na ranu badinai e hadoamu auna na heto,
ia ramuna na e hetoimu, sinavai badibadinai;
siahu negana ai ia na se garimu,
badina be ia rauna dounu e maurimu;
laḡani dikana ai ia na se hekwarahimu,
badina be huahuana ihavarana se hadokoamu.
9 Taunimanima lalodia na koikoi herea bona dika rohoroho,
daika ese baine dibadia?
10 Lau Iehova ese taunimanima daradia na tahudiamu,
bona lalodia na tohodiamu,
taunimanima ta ta ena dala ena dala
bona ena kara anina ena kara anina heḡereḡeredia
baina henidia totona.
11 Aba ese natuna, se hapapadia ḡaudia, na e haboudiamu na heto,
taḡa e habouamu, a dia kara maoromaoro amo, tauna na unuheto;
ena mauri bogaraginai idia ese bae rakatania,
bona ena mauri dokona ai ia na kavakava tauna ai bainela.
12 Matamana amo atai ai e atoa teronona helea-daena na
eda gabu helaḡana.
13 Iehova e! Israel ena helaro e!
E rakatanimu taudia iboudiai na bae hahemaraidia;
oiemu amo e raka murimu taudia ladadia na tanobada ai mo bae hetore,
badina be Iehova, mauri ranuna lohilohina, vada e rakatania.
14 Iehova e, ba hanamogu, bena do baina namo;
ba hamaurigu, bena do baina mauri;
badina be oi na egu heimodai Diravana.
15 A itaia, idia ese e hereva henigumu, e tomu
“Iehova ena hereva be edeseni ai? Bainema!”
16 Lau ese asina noimu dika ba siaia,
bona hahebua-tari dinana asina uralaia;
oi danu dibamu;
udugu bibinadia amo e lasi herevana na
oi vairamu ai mo e lasi.
17 Basio hagarigu;
oi na egu roho-mauri gabuna, dika e kaumu dinana ai.
18 E hahisihisigumu taudia na bae hahemaraidia,
a lau na basie hahemaraigu;
idia na kudoudia bae hetaha,
a lau kudougu basine hetaha;
dika dinana na latadiai ba hadihoa,
ba habuadia tari vaitani.
Dina Helaḡa ihahelaḡana
19 Iehova ese ini e hereva henigu toma, eto: Aola, Beniamina Ikoukouna, Iuda pavapavadia e raka vareaimu bona e raka lasimu ikoukouna, enai ba gini, bona Ierusalem ikoukoudia iboudiai ediai danu.
20 Bena baoto: Iuda pavapavamui bona Iuda taumui iboumui ai bona Ierusalem inoholaina taumui iboumui ai, ini ikoukou amo o raka vareaimu taumui, Iehova ena hereva ba kamonai.
21 Iehova ini e gwau tomamu: Emui mauri nahuadia ba toho, Dina Helaga ai maduna ta basio huaia, eiava ini Ierusalem ikoukoudia amo basio vareailaia,
22 bona Dina Helaga ai maduna ta na emui ruma amo basio huaia lasi. A Dina Helaḡa na ba hahelaḡaia, lau ese senemui na haḡanilaidia heḡereḡerena.
23 Ḡau tamona, idia na asie kamonai, taiadia asie hakala, a aiodia e ha-aukadia, basie kamonai bona hahediba herevadia basie abi dae dainai.
24 Iehova na e tomu: Boma kamonai henigu, Dina Helaḡa ai maduna ta ina hanua ikoukoudia amo basioma vareailaia, a Dina Helaḡa na boma hahelaḡaia bona ia lalonai ḡaukara ta basioma karaia;
25 bena pavapava haida, David ena terono ai e helaimu taudia, na ina hanua ikoukoudia amo bae heau vareai, kariota ai bona hosi latadiai, idia bona edia lohia taudia, Iuda taudia bona Ierusalem inoholaina taudia; bena ina hanua na bae noholaia hanaihanai.
26 Bena taunimanima na Iuda hanuadia bona Ierusalem hegegemadaina hanuadia bona Beniamina tanona bona taora tanodia bona ororo tanodia bona diho kahana tanodia amo baema, ḡole-oho boubou ḡaudia bona boubou idau-idau ḡaudia bona naoa boubou ḡaudia bona muramura mai bonadia na bae mailai, bona hahenamo herahiadia danu bae mailai, Iehova ena dubu lalonai bae vareailai.
27 A basioma kamonai henigu, Dina Helaḡa basioma hahelaḡaia, bona Dina Helaḡa ai maduna ta boma huaia, Ierusalem ikoukoudia ai boma vareailaia; bena lau ese lahi ta baina ha-ariaa ena ikoukou ai, bena una lahi ese Ierusalem ena lohia rumadia baine aradia ore; tau ta ese basine habodoa.