5
Keriso na taunimanima iboudiai edia hahelaḡa tauna
1 Hahelaḡa taudia badadia iboudiai na taunimanima bogaragidia amo e abidia hidimu, taunimanima daidiai Dirava bae boua, herahia ḡaudia bona boubou ḡaudia bae hahelaḡa, dika iabi-ohodia.
2 Hahelaḡa tauna badana ese lalo-duhu taudia bona kerere taudia e bogadia hisimu, badina be ia danu manoka-manoka ese e butua taomu;
3 una dainai, ia ese boubou ḡaudia baine hahelaḡa, dia taunimanima mo edia kerere daidiai, a ia sib-ona ena kerere daidiai danu.
4 Bona tau ta ese ina dagi namona sibona se abiamu; a Dirava ese e boiriamu, Aaron e boiria heḡereḡerena.
5 Unuhetomana danu, Keriso na sibona se heimodai, hahelaḡa tauna badana dagina se abia, to dagi e henia Diravana eto,
Oi na lau Natugu;
Hari dina ai vada na havaramu.
6 Ia danu ma e hereva, eto,
Oi na hahelaḡa tauna, o noho hanaihanaimu;
Melkisedek ena orea taumu.
7 Ia tanobada ai e nohova dinadia ai, Iesu ese mase amo baine hamauria diba Diravana na e ḡuriava bona e noiava, mai taina bona mai irurumatana ida; bena Dirava garina e gariva dainai ena noinoi ḡauna e abia.
8 Ena be ia na Dirava Natuna to hisihisi ese Dirava ikamonai-henina e hadibaiava,
9 ela bona e namo ḡuḡuru; bena ia ikamonai-henina taudia iboudiai edia mauri hanaihanai ihavarana tauna ai ela.
10 Badina be Dirava ese e gwauraia, hahelaḡa tauna badana, Melkisedek ena orea ai.
11 Emai hereva momo mimia, ia herevana; ḡau tamona anidia igwauraidia na metau, badina be umui taiamui vada e kudima.
12 Nega vada eme gini dae, umui na hahediba taumui ai boma lao, to doini o dabumu; ta ese Dirava ena hereva badidia bema hadibalaimui lou bema namo. Umui na doini rata inu memerodia na heheto; aniani korikori ianidia na asi goadamui.
13 Rata inu merona na kara maoromaoro herevana asi dibana, badina be ia na karukaru.
14 A aniani korikori be taudia vada e lo taudia adia; idia na lalodia vada eme manada, namo bona dika toadia na mai dibadia.