44
Kara helaḡadia
1 Bena ia ese e hakaugu lou lao, gabu helaḡana murimurina kahana ikoukouna ala, mairiveina kahana e vaira heniamu ḡauna. Ḡauna na vada e hekou.
2 Bena ia ese e hamaorogu, eto, Ina ikoukou na hekouna ai do baine mia; ta ese basine kehoa, bona ta na iena amo basine raka vareai; badina be Iehova, Israel Diravana, na iena amo vada e raka vareai, una dainai ia na hekouna ai do baine mia.
3 Hanua pavapavana sibona na ia lalonai baine helai, Iehova vairanai baine aniani totona. Ia na ikoukou dehena amo baine raka vareai, bona unu amo ma baine raka lasi.
4 Bena ia ese mirigini kahana ikoukouna amo e hakaugu lao, ela bona dubu vairanai a kau. Bena na roha lao, na itaia, Iehova hairaina ese Iehova ena dubu vada e hahonua; bena tano ai na goru diho.
5 Bena Iehova ese e hereva henigu, eto, Taunimanima natuna e, a laloa namonamo; baina hamaorolaimu ḡaudia iboudiai ba itadia bona herevadia ba kamonai, Iehova ena dubu herevadia, hahedua herevadia bona taravatuna iboudiai danu. Ba laloa namonamo danu, daika daika na dubu ai bae raka vareai diba, bona daika daika na gabu helaḡana lalonai basie raka vareai diba.
6 Bona gwau-edeede besena, Israel besena, na ba hamaorodia, baoto, Ḡaubada Iehova na ini e gwau tomamu: Israel besena e, emui kara dika-rohorohodia iboudiai ba hadoko.
7 Idau bese taudia, lalodia asie hahelaḡadia bona tauanidia asie peritomedia taudia, na egu gabu helaḡana lalonai o harakadia vareai, bona gabu o hamiroa, agu aniani, digara bona rara, na egu ai o hahelagadiamu negadia ai. Emui kara dika-rohorohodia iboudiai latadiai danu egu taravatu itata-utuna vada o atva kau.
8 Egu ḡau helaḡadia danu asio baladia heni, a idau bese taudia vada o duanaidia, egu ḡau bae baladia heni, egu gabu helaḡana lalonai.
9 Taunabunai, Ḡaubada Iehova na ini e gwau tomamu: Idau bese tauna ta, lalona se hahelaḡaia bona tau-anina asie peritomea tauna, idau bese taudia iboudiai Israel besena taudia padadiai e nohomu taudia ta, na egu gabu helaḡana lalonai basine raka vareai.
10 A Levi taudia ese edia dika davadia bae hua, egu amo idauhai e raka kerere dainai; idia ese lau e rakatanigu bona edia kaivakuku muridiai ela, Israel besena e raka kerere negana ai.
11 Idia ese egu gabu helaḡana ḡaukaradia bae kara, bona dubu ikoukoudia bae itadia tao, bona dubu ai kara helaḡadia bae kara. Idia ese ḡole-oho boubou ḡauna bona taunimanima edia boubou ḡaudia na bae aladia mase; taunimanima bae naridia bona isiaidia bae lao heni.
12 Badina be idia ese kara helaḡadia e kara, edia kaivakuku vairadiai, bona kara dika-rohorohodia amo Israel besena ihahekwakwanaina ḡauna ai ela; taunabunai Ḡaubada Iehova na e gwaumu: Lau na idia latadiai vada na gwau hamata, edia dika davadia do bae hua.
13 Idia ese basie raka henigu kahi, hahelaḡa karadia ai isiaigu basie lao heni; egu ḡau helaḡadia bona egu ḡau helaḡa-hereadia basie raka henidia kahi, a hemaraidia bae hemarai, kara dika-rohorohodia vada e kara daidiai.
14 Ḡau tan-ona lau ese baina duanaidia, dubu bae naria; bona toma-diho karadia iboudiai bona ḡaukara iboudiai ia lalonai e karamu na idia ese bae kara.
15 A Levi taudia haida, Sadok vevena, hahelaḡa dagina e abia bena egu gabu helaḡana e nariava, Israel besena taudia ese e rakatanigu negana ai, ese bae raka henigu lialu, bona isiaigu bae lao heni; idia na lau vairagu baema, digara bona rara bae hahelaḡadia egu. Ḡaubada Iehova na e herevamu.
16 Idia danu egu gabu helaḡana lalonai bae raka vareai, bona egu pata bae raka henia kahi, isiaigu bae lao heni bona egu hahedua bae badinadia totona.
17 Laloma maḡuna ikoukoudia lalodiai bae raka vareai negana ai, idia ese dabua auka hahedokidia bae dokilai; Inamoe huidia dabuadia basie hahedohlai, laloma maḡuna ikoukoudia ai bona maḡu lalonai kara helaḡadia bae kara negadia ai.
18 Kwaradia na dabua aukadia amo bae havavalaidia, bona koekoedia ai dabua auka piriboudia bae kara; varahu ihavarana ḡauna ta basie dokilaia.
19 Bena murimuri maḡuna ai taununanima dekediai bae raka lasi negana ai, idia ese unu dabua, kara helaḡadia e karalai ḡaudia, na bae doki oho, daiutu helaḡadia ai bae atodia, bena dabua idaudia bae dokilai, edia dabua amo unu taunimanima na helaḡa siahuna bae henidia hanai na garina.
20 Kwaradia basie naudia, bona huidia basie halata; kwaradia huidia bae utu kwadogi mo.
21 Hahelaḡa tauna ta ese vine ranuna basine inua, laloma maḡuna ai e raka vareaimu negana ai.
22 Idia ese vabu ta eiava e diho hahinena ta na basie adavaia, a rami-hebou ulatona ta, Israel besena amo, eiava hahelaḡa tauna ta vabuna.
23 Idia ese egu orea taudia na bae hadibadia, ḡau helaḡadia bona ḡau uhugaidia ede e idau tomamu; bona ḡau dia gogoeva bona ḡau ḡoevaḡoevadia edia idau ede bae diba toma.
24 Heai lalodiai idia na hahemaoro taudia ai baela; bona lauegu hahemaoro daladia amo bae hahemaoro. Egu taravatu bona egu hahedua herevadia bae badinadia, vada na gwauraidia ariadia iboudiai lalodiai; bona egu dina helaḡadia bae hahelaḡadia.
25 Mase tauna iraka-kahi-henina ai sibodia basie hahemiro; ḡau tamona tamadia eiava sinadia eiava natudia mamaruanedia eiava hahinedia, eiava tadikakadia eiava taihudia ulatodia daidiai sibodia bae hahemiro diba.
26 Ta baine hahemiro murinai, ia sibona ese dina hitu baine hagaudia, bena ia na baine ḡoeva.
27 A gabu helaḡana, laloma maḡuna ai, lalonai baine raka vareai, gabu helaḡana ai kara helaḡadia baine kara totona, una dina ai ia ese ena kara dika iabi-ohona boubouna ḡauna na baine hahelaḡaia. Ḡaubada Iehova na e herevamu.
28 Ahudia ta basie abia, badina be ahudia na lau; bona kohu ta Israel ai basio henidia, badina be edia kohu na lau.
29 Flaoa boubouna bona kara dika bona kerere iabi-ohodia bouboudia ḡaudia na bae ani; bona ḡau helaḡadia iboudiai Israel ai na idia edia.
30 Uma ḡaudia roboadia idau-idau iboudiai bona emui herahia ḡaudia idau-idau iboudiai, na hahelaḡa taudia ese bae abidia edia; bona emui igabu roboadia danu hahelaḡa taudia ba henidia, hahenamo na emui ruma latadiai baine mia helaoreana.
31 E mase kava ḡauna ta eiava ḡau ta ese e haberoa ḡauna ta, roho manuna eiava timo kopina ai e nohomu ḡauna, na hahelaḡa taudia ese basie ania.