29
Peroveta herevana Aigupto latanai
1 Laḡani ihagwautana huana ihagwautana dinana ihagwauta-ruana lalonai, Iehova ena hereva na egu ai e kau, eto,
2 Taunimanima natuna e, Farao, Aigupto pavapavana, na vairamu ba hua henia, bona ia latanai bona Aigupto idoinai latanai ba peroveta,
3 baoto, Ḡaubada Iehova na ini e gwau tomamu
A itaia, lau ese na inai henimumu,
Aigupto pavapavana Farao e,
huala badana,
ena sinavai bogaragidiai e hekuremu,
e tomu “egu Nilo Sinavaina na lauegu,
lau ese na karaia”.
4 Lau ese hmai amo aukimu baina gaua,
bona emu sinavai gwarumedia na kopimu ai baina hakamodia kau;
bena emu sinavai bogaragidia amo baina verimu lasi,
emu sinavai gwarumedia iboudiai, kopimu ai e hekamo kaumu ḡaudia, ida.
5 Bena tano ḡaḡaena ai baina negemui,
oi bona emu sinavai gwarumedia iboudiai;
tano paka ai ba moru,
ta ese basine gogomui, basine gurimui.
Tano boromadia bona atai manudia baina henidia,
adia ai baola.
6 Bena Aigupto inoholaina taudia iboudiai na bae diba, lau na Iehova. Badina be oi na siriho itotohina, Israel enai;
7 imadia ai e dogomu tao negana ai o kwaidu, pagadia iboudiai e helada oho; bona emu ai e tabe kau negana ai o kwaidu, bena koekoedia iboudiai e herogi-herogi.
8 Una dainai Ḡaubada Iehova na ini e gwau tomamu: A itaia, dare na latamu ai baina mailaia, taunimanima bona ubu-ubu ḡauna na oiemu amo baina negedia daure;
9 bena Aigupto tanona na baine hebua tari bona baine vahu. Bena idia na bae diba, lau na Iehova.
Badina be oi oto “Nilo sinavaina na lauegu, lau ese na karaia”,
10 una dainai, a itaia, lau ese na inai henimumu, bona emu sinavai na inai henidiamu, bona Aigupto tanona na baina havahua bona baina habuaia tari, Migdol amo ela bona Suene, ela bona Etiopia tano-hetoana.
11 Tau ta aena ese basine rakaia hanai bona boroma ta aena ese basine rakaia hanai: asi inoholaina ai baine mia laḡani hari-ahui lalodiai.
12 Lau ese Aigupto tanona baina habuaia tari, vada e hebua tari tanodia bogaragidiai; bona hanuana iboudiai bae hebua tari, laḡani hari-ahui lalodiai, e vahumu hanuadia bogaragidiai. Lau ese Aigupto taudia baina hakarohodia rohoroho, tano idau-idau lalodiai.
13 Badina be Ḡaubada Iehova na ini e gwau tomamu: Laḡani hari-ahui bae ore, bena Aigupto taudia na bogaragidiai vada e karoho besedia lalodia amo ma baina gogodia;
14 bena Aigupto ena noho namo baina havaraia lou, bona Pataro tanona, edia sene tanona, Ialonai ma baina hakaudia vareai lou; unuseni ai idia na basileia maragina ai baela.
15 Basileia iboudiai bogaragidiai ia na baine maraḡi herea; nega ta ai basileia idau-idau daediai basine heaḡi lou; baina hamaragidia herea dainai, idia ese nega ta ai basileia idau-idau na basie biagudia lou.
16 Bena Israel besena taudia ese basie abidadama henidia lou, bona edia hekaha iabina totona basie kara havara lou. Bena idia bae diba lau na Ḡaubada Iehova.
17 Laḡani iharuahui-hituna huana gini-gunana dinana ginigunana lalonai, Iehova ena hereva na egu ai e kau, eto,
18 Taunimanima natuna e, Nebukadresara, Babulono pavapavana, ese ena tuari oreana e siaia, Turo ituarihenina baine ha-aukaia totona; kwara iboudiai e haboha, bona paḡa iboudiai e hatoto; ḡau tamona ia bona ena tuari oreana ese ḡau ta Turo amo asie abia, ituari-henina ai e hekwarahiva davana.
19 Taunabunai, Ḡaubada Iehova na ini e gwau tomamu: A itaia, lau ese Aigupto tanona na Nebukadresara, Babulono pavapavana, baina henia; ia ese kohuna namodia baine laohai, baine dadihaia, ia damuḡana ai baine halaoa; unu amo ena tuari taudia davadia baine henidia.
20 Lau ese Aigupto tanona vada na henia, ena hekwarahi davana, badina be idia na lauegu ai e ḡaukara. Ḡaubada Iehova na e herevamu.
21 Una dina ai lau ese doa ta baina hatubua Israel besena ena, bona oi udumu bibinadia baina hapapa, idia bogaragidiai. Bena idia bae diba lau na Iehova.