14
Gado idaudia
1 A Lalokau na ba ḡavaia goadagoada, lauma herahiadia danu ba tahu, ba peroveta helaoreana.
2 Badina be gado idaudia ai e herevamu tauna na dia taunimanima se hereva henidiamu, a Dirava hari, badina be taunimanima ta na ena hereva anina asi dibana; ia ese lauma ai hereva hehunidia e gwauraimu.
3 A e perovetamu tauna ese hahealo bona hahegoada bona tauhalo na taunimanima e herevalai henidiamu.
4 Gado idaudia ai e herevamu tauna na sibona lalona e hapararaiamu, a e perovetamu tauna ese ekalesia taudia lalodia e hapararadiamu.
5 Lau na uramu umui iboumui ai gado idaudia ai ba hereva, to na ura badamu ba peroveta. E perovetamu tauna ese gado idaudia ai e herevamu tauna e hereaiamu, ena gado idaudia anidia ekalesia taudia lalodia ihapararadia totona se haheḡeregere negadia ai.
6 Varavaragu e, harihari umui dekemui bama vasi gado idaudia ai bama hereva, a gado anidia eiava lalo-diari eiava peroveta eiava hahediba herevadia basinama gwaurai, ede bama hanamomui toma?
7 Heḡereḡerena binai: ḡau haida be dia mamauri to mai reḡedia; ivilikou bona gitara reḡedia basiema idau-idau, dahaka e hiririmu bona dahaka e hataimu ede baitama diba toma?
8 Ina danu, tuari kibina basiema hiriria ḡoevaḡoeva, daika ese ena tuari ḡaudia bema heḡaeḡaelai?
9 Unuhetomana umui danu, emui hereva anidia basie hedinarai, daika ese mamidia baine abi? E kara hodahoda ba hereva henia na heto.
10 Readia gado idau-ldau be diaḡau tanobada ai, a iboudiai be mai anidia.
11 To, gado anina basinama diba, e herevamu tauna vairanai lau na idau taugu na heto, ia danu lau vairagu ai idau tauna na heto.
12 Taunabunai, lauma herahiadia o hekise-hekise henimu dainai, ekalesia ilareba-daena daladia ba tahu goadagoada.
13 Badina bunai, gado idaudia ai e herevamu tauna na baine noinoi, gado anidia danu baine haheḡereḡere diba.
14 Badina be gado idaudia ai baina ḡuriḡuri be laumagu mo e ḡuriḡurimu to lalogu na se pararamu.
15 Matona: laumagu ai baina ḡuriḡuri, ma lalogu ai danu baina ḡuriḡuri; laumagu ai ane baina abi, ma lalogu ai danu ane baina abi; una be namo.
16 Bema lasi, lauma ai mo Dirava ba hanamoa negana ai, lalona se pararamu tauna ese “amen” ede baine gwauraia toma? Badina be emu hereva anina na asi dibana.
17 Oi ese Dirava ihanamona herevana o gwauraia ḡoevaḡoevamu, to bamomu lalona se pararamu.
18 Dirava na hanamoamu, lau na umui iboumui ai name hereamui, gado idaudia igwauraidia ai.
19 A ekalesia hebouna ai hereva ima baina gwaurai mai daragu ida, haida baina hadibalaidia, una be namo; a hereva gerebu gado idaudia ai baina gwaurai, una be dika.
20 Varavaragu e, daramui ai basio garuḡaru. Lalo-dika ai ba ḡaruḡaru, a daramui na taudia e lo taudia daradia heḡereḡeredia ai baela.
21 Taravatu ai vada e torea: Lohiabada na e tomu “Idau gado idau gado taudia edia amo bona bese idau-idau taudia bibinadia amo lau ese ina bese taudia baina hereva henidia; to basie kamonai henigu”.
22 Taunabunai, gado idaudia na toa, dia kamonai taudia edia, to asi edia kamonai taudia edia. A peroveta herevadia na dia asi edia kamonai taudia edia, to kamonai taudia edia.
23 Benaini, ekalesia idoinai gabu tamona ai bae hebou, bona hebou taudia iboudiai gado idaudia ai bae hereva; bena asi dibadia taudia eiava asi edia kamonai taudia bae raka vareai, bena baeto “Umui na readia e kavamui”.
24 A iboudiai bae peroveta, bena asi ena kamonai tauna eiava asi dibana tauna baine raka vareai negana ai iboudiai ese bae sisiba henia, bae hahemaoro henia,
25 bona ena lalo-hadai hehunidia do bae hahedinarai; bena baine goru diho, Dirava baine toma henia diho, baineto “Momokani, Dirava na umui bogaragimui ai”.
Ekalesia heboudia
26 Bena edeheto, varavaragu e? Ba hebou negadia ai, umui ta ta mai emui ane, mai emui hahediba, mai emui hereva hehuni ihahedinaraidia, mai emui gado idaudia, mai emui gado idauna anina ihahegeregerena. Ḡau idoidiai ba kara taunimanima lalodia ihapararalaidia.
27 Gado idaudia ai bae hereva, rarua eiava tatoi mo bae hereva hedava, bena ta ese anidia baine haheḡereḡere.
28 A bema asi gado ihaheḡereḡerena tauna, gado idauna ai e herevamu tauna na ekalesia hebouna ai basine hereva; a ia lalona ai sibona baine hereva, bona Dirava baine hereva henia.
29 Peroveta taudia danu rarua eiava tatoi bae hereva, bena bamodia ese edia hereva bae haero.
30 A helai tauna ta lalona ai hereva hehunina ta baine hedinarai e herevamu tauna na ena hereva baine hadokoa.
31 Iboumui ai ba peroveta diba, to ta ta ba peroveta hedava, bena hebou taudia iboudiai na aonega bona hahegoada bae davari.
32 Peroveta laumadia ese peroveta taudia e kamonai henidiamu;
33 badina be Dirava na dia heiri-heiri Diravana, a maino Diravana.
Helaḡa taudia edia ekalesia heboudia iboudiai lalodiai heḡereḡerena,
34 emui hahine na hebou lalodiai bae mu noho; bae hereva na taravatu. Bae hemataurai noho, taravatu ese e gwauraiamu heḡereḡerena.
35 Bae ura ḡau ta bae diba, ruma ai adavadia bae nanadaidia; badina be hahine na hebou lalonai baine hereva na mai hemaraina.
36 Be, Dirava ena hereva na umui emui amo ema, eiava umui mo emui ai vada e kau, a?
37 Tau ta lalona baineto ia na peroveta tauna, eiava Lauma ese vada e roheamu, ia ese na tore henimuimu herevadia baine abi dae, baine diba Dirava ena haheḡani bini.
38 A bema ta basine diba, bena basio abia dae.
39 Taunabunai, varavaragu e, peroveta siahuna ba hekise-hekise henia, bona gado itlaudia ig vauraidia basio gwau tao.
40 Ḡau idoidiai ba kara namonamo, ba kara ḡoevaḡoeva.