3
Keaga Koꞌaga Kaniaꞌa Ageagamauga Auga
1 Aau akiu Kristiano papiaumi, eꞌu niniꞌaniai kapa isaꞌi fouꞌi alaifaniꞌi pugu. Oi Lopia fou omia kainai eegai alomi fegama. Ke lau kapaꞌina laifa kakauꞌi auꞌi iꞌopoꞌi mo fapapuaꞌi eemi fefai pugu auga, lau eeuai opopo agaꞌo laaꞌi. Ke iꞌina iifaꞌi oi emi pakoꞌai agepakaisapuimi.
2 Ke maami fogoa kaisau amuꞌe koa kekagakaga, laomai apalaꞌi kekapaꞌi, au maguaeꞌi faaga iifalaina gamia paisa keoma auꞌi foisa feloꞌi.
3 Gome iꞌa auga papiau maguaeꞌi faaga iifalaina emia auga gouga koꞌa ipauma auga aafiia. Egaꞌina auga iꞌa Deo ega Spirituai Deo aau afagaina, ke Iesu Kristo fou amia kainai aainaꞌau kai, faagaꞌaisai kapaꞌina kekapaisa auga alapakoꞌania.
4 Kai lau ifou auga maguaeꞌi faaga iifalaina gouga emia auga fapakoꞌania, gome lau faagauai egaꞌina kekapaisa.
Ke aufalao agaꞌo imaaugai kapaꞌina kekapaisa auga eopolaga ega kapa agaꞌo ekae fepakoꞌania eoma koa aisama, lau auga egaꞌina fapakoꞌa kapulania.
5 Lau lamauni kina imagea oiso aisama, egaꞌina gouga faagauai kekapaisa. Ke lau auga Israel papiau agaꞌo, ke Israel ikupuꞌi agaꞌo aka Benjamin ikupuga au. Ke lau Hibru au koꞌa ipaumau, ke Moses ega iifa kainai auga, lau Faliseo au agaꞌo.
6 Ke lau alou koꞌagai Moses ega iifa muninai lapea, ke anina laani Deo ega iifi eꞌa papiauꞌi isafa egaꞌina iifaꞌi muniꞌiai fekepea laoma puo, laꞌuegekae laafi apalaniꞌi. Ke papiau Moses ega iifa maꞌoai kaiꞌiai fekepea aloꞌi opaina femia keoma auꞌi iifaꞌi maꞌoai kaiꞌiai lapea. Ke egaꞌina iifaga kainai kapa apala agaꞌo alakapaisa kai agaꞌo puo aepeniau.
7 Kai lau ufainagai kapaꞌina laopolaga feloꞌi laoma kaiꞌiai lapea auꞌi, pau Iesu Kristo faugai egaꞌina kapaꞌi auga kapa agaꞌo laaꞌi lapamiaꞌi.
8-9 Ke egaꞌina kapaꞌi mo laaꞌi kai, lau eꞌu Lopia Iesu Kristo kapa maꞌoai ekaꞌegainiꞌi auga lalogo aisama, kapa maꞌoai isafa kapa agaꞌo laaꞌi lapamiaꞌi. Ke egaꞌina kapaꞌi amaꞌama lapamiaꞌi, ega koa lau Iesu Kristo faafia alouai feagu, ke Iesu alouai eague auga papiau fekeisa. Ke lau Moses ega iifa muninai lapea kainai, alou opaina aemia kai, Iesu Kristo lapakoꞌania kainai, alo opai au lamia. Ke alo opai egaꞌina auga Deo eegai emai, ke pakoꞌai isafa emai.
10 Lau anina laani Kristo falogo, ke maeai emaunimue auga isapuga isafa falogo, ke ega kiekie gamuga faopo, ke isa lau fauai emae koa iꞌopoga, lau isafa isa faugai famae laoma.
11 Ke ega koa fakapa afekaina koa aisama, Iesu emae emaunimue koa iꞌopoga, lau isafa maeai famaunimue laoma.
Kapaꞌina Amoafia Ooma Auga Faugai Fopinauga Kapula
12 Kai lau egaꞌina kapaꞌi maꞌoai faagauai akemia koa, o lau alou opaina aemia koa. Kai lau launiaimoimo lalao paisa, ega koa Iesu Kristo lau eafiiau kinagai, isa lau kapaꞌina faafia eoma auga faafia laoma.
13 Aau akiu Kristiano papiaumi, lau ifou Iesu Kristo lau kapaꞌina faafia eoma auga laafiia efua alaoma. Kai kapa agaꞌomo iꞌina auga mo lakapa. Kapaꞌina kemia efua auꞌi laꞌagegeainiꞌi efua kai, kapaꞌina agouai ekae auga laai penia eega lalao.
14 Ke Iesu Kristo kainai Deo lau eifaniau, ke lau opou fofougai Deo kapaꞌina ufai alaafia eoma auga eega lalao, ega koa egaꞌina afa faafia laoma.
15 Ega puo iꞌa maꞌoai aꞌa pakoꞌa eapao auꞌa, opoꞌa ega fapaapa oma. Kai lau kapa isaꞌi laifaniꞌi auꞌi eeꞌiai opomi iꞌoina afopamia koa aisama, egaꞌina kapaꞌi isafa Deo oi maamiai agepaofakaea agologo.
16 Ega mo ganinagai kapaꞌina mo ega omagai akapaisa emai auga, egaꞌina mo agugai amaagu ke opoꞌa isafa agaꞌomo gamia.
17 Aau akiu Kristiano papiaumi, papiau lau kapaꞌina lakapa auga kainai mo kepea auꞌi fou fomia, lau kapaꞌina lakapaiꞌi auꞌi kaiꞌiai fopea. Ke papiau kapaꞌi lai ala aagu oma auga agugai keagu auꞌi foisaꞌi fomalele.
18 Lau egaꞌina laifania, gome lau kina maꞌo lapaini kakaumi koa iꞌopoga, pau isafa maau maiꞌiuꞌiuga mo lapainimi pugu. Papiau maꞌo auga, eꞌi aguai isa Iesu Kristo kolotiai emae fouga iifafouga emia auga iifaga eꞌi ou kepamia.
19 Egaꞌina papiauꞌi eꞌi agu fuagai auga, kapa maꞌoai kelifu afeꞌai afugai akeagu aoniamo. Ke isa guaꞌi alogai kapaꞌina anina keani auga isa eꞌi deo kepamia muninai kepea. Ke isa kapa isaꞌi meagaiꞌi fekepaꞌauꞌi auꞌi ainaꞌauꞌi kepaꞌauꞌi. Ke isa opoꞌiai auga aagoa kapaꞌi mo keopolaniꞌi.
20 Lau ega laifa oma, gome iꞌa aꞌa agu afuga koꞌa ipauma auga ufai. Ke iꞌa Kaniaꞌa Isagamauga auga, Lopia Iesu Kristo egae ufai agemai auga aloꞌa koꞌagai aague aꞌima.
21 Ke isa ega isapuai kapa maꞌoai isa papagai agepamiaꞌi auga isapugai, iꞌa imaauꞌa agemae agelifu auga iꞌoina agepamia, ega koa iꞌa imaauꞌa isa imaauga afaemaemae auga koa iꞌopoga agemia.