3
Iesu Moses Ekaꞌegaina
1 Ega kainai aau akiu pakoꞌa papiaumi, Deo ega famili agaꞌomogai omai, ke Deo eifanimi, lau fou Isa ega agofaꞌa fou agaagu aumi, Iesu Apostolo ke Sakedote Lopia Faꞌa, iꞌa apakoꞌania ke fouga aifafoua auga eegai opomi fofouga amooge.
2 Ufainagai Deo ega papiau maꞌoai fauꞌiai Moses Deo isa kapaꞌina fekapa eoma auga mo ekapaisa. Ega koa iꞌopoga, Iesu isafa Deo isa ekinaga auga kapaꞌina fekapa eoma auga mo ekapaisa.
3-4 Kai iꞌa alogo, eꞌa agaꞌo felo kepaapa aisa aisama, eꞌa felo ipauma aoma aifagaina. Kai koꞌa ipauma eꞌa agaꞌo agaꞌo auga aufalao agaꞌo eꞌa egaꞌina epaapaꞌi. Ega kainai iꞌa eꞌa egaꞌina alaau afagai alogainiꞌi kai, eꞌa epaapa auga aau afagai alogaina aka akaikiꞌa apamia. Ega koa iꞌopoga, Moses Deo ega papiau fauꞌiai ega pinauga ekapaisa puo, Moses aka akaikiꞌa apamia. Kai Deo auga Iesu faugai kapa maꞌoai epagamaꞌi puo, Deo maagai Iesu aka auga akaikiꞌa emia Moses aka ekaꞌegaina.
5 Koꞌa ipauma Deo ega pinauga auga Moses, Deo ega papiau, eꞌa agaꞌomogai keagu papiauꞌi koa iꞌopoꞌi auꞌi fauꞌiai Deo kapaꞌina fekapa eoma auga mo ekapaisa. Egaꞌina ekapaisa alogai, muni Deo kapaꞌina maaꞌaisai agepafokia auga, Deo ega papiau maaꞌiai eifafoua.
6 Moses auga Deo ega pinauga ikapa mo auga. Kai Iesu auga Deo Gauga kainai, ifo ega eꞌai ega papiau keagu auꞌi eꞌimaiꞌi, ke fauꞌiai Deo Isa kapaꞌina fekapa eoma auga mo ekapaisa. Ke iꞌa Iesu epalagainiꞌa auga apakoꞌania kainai, falamaniꞌi aloꞌa fapakapulania, ke aꞌa afiaꞌama Deo ega agofaꞌai agaafia auga ainaꞌauga fapaꞌaua. Ega aisama iꞌa Deo ega papiau, eꞌa agaꞌomogai keagu auꞌi fou famili agaꞌomo agamia.
Foisa Felo Iesu Folomunia
7-9 Kai iꞌa auga pau Deo ega famili amia puo, ainaꞌa fapaau felo Deo ega iifa pukagai ega Spiritu iina eifa oma auga aꞌo falogo:
“Ufainagai ago maininai inipo ouꞌaga pani alogai
ufumi apami eeꞌiai kapa maꞌo lakapaiꞌi keisaꞌi mo ganinagai,
keꞌopoisau kapa agaꞌo makapa kegaisa paisa keoma.
Ega koa kekapaisa, guaꞌi eꞌinoka alogaina ainau akeafia puo
guau kepakupua. Oi isa foisaꞌi fomalele.
Ega koa pau kina Deo aina agologo aisama,
guami folopaꞌinokania ainau foafia.
10 Oi ufumi apami ega koa kekapaisa puo, Lau isa eeꞌiai guau ekupu alogaina.
Ke laifa lainaka, ‘Iꞌina papiauꞌi aufa kina pifoge kapaꞌi maaꞌi elaꞌa meꞌe, keaga iꞌoinagai kepea.
Ega kainai Lau eꞌu keaga opainai fekepea auga akelogo.’
11 Ega puo guau kupugai lapakoꞌania laifa lainaka,
Isa Lau eꞌu laagai afuga Kanaan agogai afalapakokoꞌi,’
laoma.” Sam 95:7-11
12 Aau akiu pakoꞌa papiaumi, epomiai papiau isaꞌi laomai apala ipauma, Deo fakepakoꞌania auga opolaga keafia. Egaꞌina opolaga apala papiau epapeaꞌi Deo agu pagai auga kemunia. Ega kainai foisa felo oi epomiai kai agaꞌo ega koa faekapa.
13 Kai kina apafala ‘Pau Kina’ aoma auga kina felo kapa agaꞌo agakapa agekaina paisa. Egaꞌina kina alogai aufa kina oi agaꞌo agaꞌo magogomi foauga ifomi fopakapulanimi. Ega koa epomiai papiau agaꞌo kapa agaꞌo elogo kai pifogeai faepuniai laomai apala isa gua faepaꞌinokania laoma.
14 Iifa gome, iꞌa Iesu apakoꞌania mo aisama, pakoꞌa egaꞌina koꞌa ipauma auga aafia, Iesu fou kaiꞌalao aagu. Iꞌa egaꞌina pakoꞌaga agaafiapi kapulania mo agelao fuagai aisama, Deo ega agofaꞌaiafugai, Iesu fou kaiꞌalao agaagu.
15 Ega kainai Deo ega iifa pukagai ega iifa pau mo laifa kakaua koa iꞌopoga,
“Pau kina Deo aina agologo aisama, ufumi apami Deo keꞌopoisa kinaꞌiai guaꞌi eꞌinoka Deo aina akeafia auꞌi koa folomia,”
laoma. Sam 95:7-8
16 Ufainagai kaisau Deo aina kelogonia kai kainai akepea? Egaꞌina papiauꞌi auga Moses Isiptoai epapealaiꞌi auꞌi laaꞌi ma? Laaꞌi, egaꞌina papiauꞌi!
17 Ke inipo ouꞌaga pani 40 alogai Deo kaisau eeꞌiai gua ekupu alogaina? Isa auga laomai apalaꞌi kekapaiꞌi puo Deo gua ekupu afa epeniiꞌi kainai ago maininai kemae auꞌi laaꞌi ma? Laaꞌi, egaꞌina papiauꞌi!
18 Ke Deo ega guakupuai kaisau eeꞌiai eifa kapula Kanaan ago, Isa ega laagai afugai afakekoko eoma? Isa auꞌi Deo aina akeafia aina kainai akepea auꞌi laaꞌi ma? Laaꞌi, egaꞌina papiauꞌi!
19 Ke iꞌa alogo isa Deo akepakoꞌania kainai, ega laagai afugai fekekoko auga aekainia.