ጌኤዦ ማፃኣፖ ዓይኑሞ ማፃኣፖ 37

ዳውቴ ዓይኑሞ

ፑርቶ ዓሶንታ ኮዦ ዓሶዋ ካፒ ዓኣ ባኣዚ

1 ፑርቶ ማዻ ዓሶ ዛጊ ዻጋዺፖ፤

ጎሞ ማዻ ዓሶሲ ዛጊ «ዔያቶም ዬይ ዓይጋ ማዔይ!» ጌይ ማሊፖ።

2 ዔያታ ማኣቲጉዲ ዑኬና ሜላንዳኔ፤

ዋላሺጉዲያኣ ሹሊ ዲኢናንዳኔ።

3 ናንጊና ናንጋ ጎዳ ጉሙርቂ ኮሺ ባኣዚ ማዼ፤

ዓጮይዳ ኮሺና ኔኤኒ ናንጋንዳኔ።

4 ናንጊና ናንጋ ጎዳና ዎዛዼ፤

ዒዚያ ኔኤኮ ዒና ኮዓ ባኮ ዒንጋንዳኔ።

5 ዒዚ ኔና ዔኪ ዓኣዻንዳጉዲ

ናንጊና ናንጋ ጎዳም ሃዳርሲ ኔና ዒንጌ፤

ዒዛ ጉሙርቄ፥ ዒዚ ኔና ማኣዳንዳኔ።

6 ዒዚ ፂሉሞ ኔኤኮ ፖዒጉዲ

ኔኤም ዎጊንታ ዎጎዋ

ዓቢ ዹኡሲጉዲ ፖዒሳንዳኔ።

7 ጊቢ ዳንዳዒሢና ዶዲ

ናንጊና ናንጋ ጎዳ ማዻ ባኮ ዛጋኒ ካፔ፤

ሜሌ ዓሶኮ ፑርቶ ማሊፃ ዔያቶም ጊኢጌያ ማዔቴያ ሮኦጋዺፖ።

8 ዻጋ ፑርታ ባኣዚዳ ሄሊሳሢሮ

ዻጋይዳፓ ኔና ማሄ፥ ሮኦጋዺሢዳፓኣ ካፒንቴ።

9 ፑርቶ ማዻ ዓሳ ዎዺንታንዳኔ፤

ናንጊና ናንጋ ጎዳ ጉሙርቃዞንሢ ጋዓንቴ ሳዖ ዔካንዳኔ።

10 ዻካ ዎዴም ማዓንዳፓዓቴም

ፑርቶ ማዻ ዓሳ ሩኡሪና ባይቃንዳኔ፤

ኔኤኒ ዔያቶ ኮዔያታቴያ ዴንቃዓኬ።

11 ዒኖ ሼሌዔዞንሢ ዓጮ ዔካንዳኔ፤

ዖርጎቹሞና ኮሹሞና ዴንቂ ዔያታ ዎዛዻንዳኔ። +

12 ፑርቶ ማዻ ዓሢ ኮዣሢ ባይዛኒ

ሜሌ ዓሶ ፑርቱሞና ዒዛ ዑፃ ዔቂሳኔ፤

ዒዛ ዒፂሢና ሃኣሚ ዻዓኔ።

13 ፑርቶ ማዻ ዓሳ ባይቃንዳ ኬላ ዑኬሢ ዔራሢሮ

ናንጊና ናንጋ ጎዳ ዔያቶ ሚኢጫኔ።

14 ፑርቶ ማዻ ዓሳ

ማንቆ ዓሶንታ ሜታዻ ዓሶዋ ዎዻኒ

ኮዦ ማዾ ማዻዞንሢያ ሹካኒ

ፔኤኮ ጬንቾ ዓፓሮ ቱጋኔ፤

ሂኢዦዋ ፔኤኮ ጊኢጊሻኔ።

15 ጋዓንቴ ዔያቶኮ ጬንቾ ዓፓራ

ዔያቶ ሳዞ ማዒ ጫርጋንዳኔ፤

ሂኢዣኣ ዔያቶሲ ሜቃንዳኔ።

16 ፑርታ ማዻ ዓሲኮ ሚርጌ ቆሎይዳፓ

ኮሺ ዓሲኮ ዻኮ ቆሎንሢ ባሼኬ።

17 ፑርቶ ማዻ ዓሶኮ ቃሳ ሜቃንዳኔ፤

ፂሎ ዓሶ ጋዓንቴ ናንጊና ናንጋ ጎዳ ዶዲሻንዳኔ።

18 ናንጊና ናንጋ ጎዳ ፂሎ ዓሳ ናንጋንዳ ዎዶ ዔዔራኔ፤

ዴና ዔያቶሲ ዔያቶም ማዒ ቢያ ዎዴ ናንጋንዳኔ።

19 ፑርታ ኬሊ ሙኬቴ ሜታ ዔያቶ ሄላዓኬ፤

ሉማሢ ዎዶና ሙኡዚ ዴንቂ ዔያታ ሚሽካንዳኔ።

20 ፑርቶ ማዻ ዓሳ ጋዓንቴ ባይቃንዳኔ፤

ናንጊና ናንጋ ጎዳኮ ሞርካ ቡኒጉዲ ዲኢናንዳኔ፤

ዓዳ ጩቢ ባይቃሢጉዲ ዓኣፓፓ ባይቃንዳኔ።

21 ጎሜ ማዻ ዓሲ ዓሲዳፓ ታታልዓኔ፤

ጋዓንቴ ማሂ ዬያ ጪጉዋሴ፤

ፂሎ ዓሲ ጋዓንቴ ሚጪንታኔ፤

ማሂያኣ ዒንጋኔ።

22 ናንጊና ናንጋ ጎዳ ዓንጄ ዓሳ ሳዖ ዔካንዳኔ፤

ዒዚ ጋዳንቄ ዓሳ ጋዓንቴ ባይቃንዳኔ።

23 ዓሲኮ ናንጊ ናንጊና ናንጋ ጎዳ ዎዛሳያ ማዔቴ

ዒዚ ዬያ ዓሢኮ ናንጋ ፒዜ ማዒፆ ጎናሳኔ።

24 ዬይ ዓሢ ዹቂንቴቴያ ሎኦማዓኬ፤

ናንጊና ናንጋ ጎዳ ፔ ኩጮና ኬኤሊንቂ ዒዛ ዓርቃንዳኔ።

25 ዼጋቶይዳፓ ጋርቻንዳያ ሄላንዳኣና ታ ናንጌኔ፤

ዬያይዳ ናንጊና ናንጋ ጎዳ ኮሺ ዓሲ ሃሼም

ናኣታ ዒዛኮ ሙኡዚ ባይዚ ሺኢቃንቴ

ፔቴታዖ ታኣኒ ዛጊባኣሴ።

26 ኮሺ ዓሲ ቢያ ዎዴና ዓሲም ዔኤቢ ጉሪ ዒዒንጋኔ፤

ዒዛኮ ናኣታኣ ዓንጂንቴያ ማዓንዳኔ።

27 ፑርታ ማዾፓ ሃኬ፥ ኮሺ ባኣዚ ማዼ፤

ናንጊና ኔኤኒ ናንጋንዳኔ።

28 ናንጊና ናንጋ ጎዳ ፒዜ ዎጌ ናሽካኔ፤

ዒዛም ጉሙርቂንታዞንሢ ዒ ሃሹዋሴ፤

ናንጊና ዔያቶ ዒ ካፓኔ፤

ፑርቶ ማዻ ዓሶኮ ዜርፃ ጋዓንቴ ባይቃንዳኔ።

29 ሳዓ ፂሎ ዓሶም ዓታንዳኔ፤

ዒዞይዳ ዔያታ ናንጊና ናንጋንዳኔ።

30 ፂሎ ዓሲ ፔ ዻንጋፓ ዔራቶ ኬሳኔ፤

ዒንዲርዛ ዒዛኮ ፒዙሞ ጌስታኔ።

31 ዒዛ ፆኦዛሢኮ ዎጋ ዒዛኮ ዒናኣኬ፤

ቶካ ዒዛኮ ቡኡዲንቱዋሴ።

32 ፑርታ ማዻ ዓሲ ፂላሢ ካታኔ፤

ዎዻኒያ ዒዛ ዒ ኮዓኔ።

33 ናንጊና ናንጋ ጎዳ ጋዓንቴ

ዒዛኮ ሞርኮም ዓኣሢ ዒንጊንዱዋሴ፤

ዓሲ ቡካ ቤዞይዳ ሞኦቶና ዓሳ ዒዛ ላሢንዱዋሴ።

34 ናንጊና ናንጋ ጎዳኮ ማኣሮ ካራ ዴዔ፤

ጎይፆዋ ዒዛሲ ካፔ፤

ዒዚ ሳዖ ኔኤም ዻካልሲ ኔና ቦንቺሳንዳኔ፤

ፑርቶ ዓሳ ባይቃንቴ ኔ ዛጋንዳኔ።

35 ፑርታ ማዻያና ቂኢሮ ዓሲስኬይ

ዓዳ ሊባኖኦሴ ሚፆጉዲ ዋርቂ ዓኣንቴ ታ ዛጌኔ፤

36 ጊንሣ ሃሣ ሜሌ ዓቢና ዒኢና ታ ዓኣዻንቴ

ዒኢካ ዬይ ሚፃሢ ባኣሴ፤

ኮዒያ ታ ዒዛ ዴንቂባኣሴ።

37 ኮሺ ማዔ ዓሢና ፒዜ ማዔሢያ ዒናፓ ዛጌ፤

ኮሺ ማዔ ዓሲኮ ሃጊ ማዓ ዎዛ ዓኣኔ።

38 ጎሞ ማዻ ዓሳ ጋዓንቴ ጋፒ ሃይቃንዳኔ፤

ዜርፃኣ ዔያቶሲ ባይቃንዳኔ።

39 ፂሎ ዓሲኮ ዻቂንታ ሙካንዳሢ ናንጊና ናንጋ ጎዳፓኬ፤

ሜታሢ ዎዶና ፑኖ ካያሢ ዔያቶኮ ዒዛኬ።

40 ናንጊና ናንጋ ጎዳ ዔያቶ ማኣዳኔ፥ ዓውሲያ ዓውሳኔ፤

ፑርቶ ማዻ ዓሶ ኩጫፓ ዔያቶ ዒ ኬሳንዳኔ፤

ዔያታ ዒዛ ፔኤኮ ፑኖ ካያሢ ማሄሢሮ

ዒዚ ዔያቶ ዓውሳንዳኔ።