24
1 ናንጊና ናንጋ ጎዳ ዒስራዔኤሌ ዓሶ ዒ ዓንጃንዳጉዲ ኮዔሢ ባኣላኣሜ ዔራዖ፥ ቤርታ ዒ ማዻ ጎይፆ ማርሾ ማርሻኒ ዳንዳዒባኣሴ፤ ጋዓንቴ ዓሲ ናንጉዋ ዳውሎ ባንሢ ሺሪ ዔቃዖ፦
2 ዒስራዔኤሌ ዴራ፥ ፔኤኮ ፃጶና ፃጶና ዎሊ ሄሊ ዱንኪ ዴዔሢ ዴንቄኔ፤ ዒማና ፆኦሲ ዓያና ዒዛይዳ ሙኬም፥
3 ፆኦሲ ማሊሢ ሂዚ ጌይ ኬኤዚሢ ዓርቄኔ፦
«ዓኣፓ ቡሊንቴም ዛጌ
ቢዖሬ ናኣዚ ባኣላኣሜ ኬኤዛ ባካ ያዺኬ፤
4 ፆኦሲ ቃኣሎ ዋይዛሢ
ቢያ ባኣዚ ዳንዳዓ ፆኦዛሢዳፓ ማዔ ጊንዑዋንቴ ጴዼ ዓውቶ ዛጋሢ
ጊንዒ ዓኣንቴ ዓኣፓ ቡሊንቴሢ ሂዚ ጋዓኔ፤
5 ያይቆኦቤ! ኔኤኮ ዓፒሎና ማዢንቴ ማኣራ
ዒስራዔኤሌ! ኔ ዎርቃ ቤዛ
ዎዚ ሚዛጳይ!
6 ዬይ ማኣራ ፑኡሲንቴያ ማላ ዛሮጉዲ
ዎሮ ዓጫ ዓኣ ዱማ ዱማ ሚፃ ባቃሌ ቤዞጉዲ ጌሢንቲ ዴዒ ዓኣኔ፤
ናንጊና ናንጋ ጎዳ ቱኬ ዋላንጎጉዲ
ሃሣ ዋኣሢ ዓቺዳ ባቃሊ ዓኣ ዴኤሊ ዚቢቂጉዲኬ።
7 ሚርጌ ዒርዚ ዔያቶም ዋርቄኔ፤
ዔያታ ዜርቄ ባካ ጊዳንዳ ዋኣሢ ዴንቄኔ፤
ዔያቶኮ ካኣቲ ዓጋጌይዳፓ ባሼ ማዓንዳኔ፥
ዓጫ ዒዛኮ ሚርጌና ዳልጊ ዳልጊ ዓኣዻንዳኔ፤
8 ጊብፄ ዓጫፓ ዔያቶ ኬሴ ፆኦዛሢ
ዔያቶኮ ሜኤኒ ካኣሪጉዲ ማዒ ሙካ ባኮ ዔያቶም ዹዓንዳኔ፤
ዔያቶኮ ሞርኮ ዔያታ ዞቢጉዲ ሾኦሊ ሙዓንዳኔ፤
ሜጌፆዋ ዔያቶኮ ጋኣጫንዳኔ፤
ሂዦዋ ዔያቶኮ ሜንሢ ባይዛንዳኔ፤
9 ዬይ ዓሳ ዒጊቻ ዞቢጉዲ ላሂ ዓኣኔ፤
ዔያቶ ጴቺ ዔቂሳንዳ፥ ጫርሺ ዖናዳይ?
ዒስራዔኤሌ ዓንጃሢ ዓንጂንቴያ
ጋዳንቃሢያ ሃሣ ጋዳንቂንቴያ ማዖንጎ!»
10 ዬካፓ ባኣላኣቄ ሚርጌና ዻጋዺ፥ ፔ ኬኤሎ ዉፁርቃዖ ባኣላኣሜ ኮይላ፦ «ታኣኮ ሞርኮ ኔ ጋዳንቃንዳጉዲ ታ ኔና ዔኤላዛ፥ ኔ ጋዓንቴ ሃይሢ ማይንቲ ዓንጄኔ፤
11 ዓካሪ፥ ኔ ማኣሪ ዑኬ ዓኣዼ፤ ኔ ማዼ ባኮ ዛሎኮ ኮይሳሢጉዴያ ታ ጪጋኒ ማሌንቴ ናንጊና ናንጋ ጎዳ ኔና ዬያ ኔ ዴንቁዋጉዲ ላኣጌኔ» ጌዔኔ።
12 ባኣላኣሜ ባኣላኣቄም፦ «ኔኤኒ ታ ኮይላ ዳኬ ዓሶም፥
13 ‹ኔ ማኣሮይዳ ዓኣ ዎርቆና ቢሮና ቢያ ኔ ታኣም ዒንጌቴታዖ ፆኦሲ ጌዔማ ኬኤዚሢዳፓዓቴም ሜሌ ታ ማሊሢና ኮሺ ባኣዚያ ማዖም ፑርታ ባኣዚ ታ ማዻኒ ዳንዳዑዋሴ› ጌይ ታ ኬኤዚባይ» ጌዔኔ።
ባኣላኣሜ ኬኤዜ ጋፒንፆ ፆኦሲ ማሊፆ
14 ጋፒንፆይዳ ባኣላኣሜ ባኣላኣቄም፦ «ዓካሪ፥ ታኣኒ ታ ዓሶ ባንሢ ማዒ ዴንዳኔ፤ ጋዓንቴ ዬያኮ ቤርታ ዒስራዔኤሌ ዴራ ሃጊ ኔ ዓሶ ማዻንዳ ባኮ ታ ኔኤም ኬኤዛንዳኔ» ጌዔስካፓ፥
15 ፆኦሲ ማሊሢ ሂዚ ጌይ ኬኤዚሢ ዓርቄኔ፦
«ቢዖሬ ናኣዚ፥ ባኣላኣሜ ኬኤዛ ባካ
ዓኣፓ ቡሊንቴም ዛጌሢ ሂዚ ጋዓኔ።
16 ፆኦሲ ኬኤዜ ባኮ ዋይዛሢ
ዼኤፖ ፆኦዛሢዳፓ ዔራቶ ዴንቄሢ
ቢያ ባኮ ዳንዳዓሢ ፔጋሲ ዻዋ ባኮ ዛጋሢ
ጊንዒ ዓኣንቴ ዓኣፓ ቡሊንቲ ዛጋሢ ሂዚ ጋዓኔ፦
17 ታ ዛጋኔ፤ ጋዓንቴ ሃሢቱዋሴ።
ታኣም ጴዻኔ፥ ጋዓንቴ ዑኬቱዋሴ፤
ዦኦጌ ያይቆኦቤይዳፓ ኬስካንዳኔ፤
ዎልቄና ዓኣ ካኣቲ ዒስራዔኤሌፓ ኬስካንዳኔ፤
ሞዓኣቤ ዓሶኮ ሱኡጎ ጳርቃንዳኔ፤
ሞዓኣቤ ዒጊኒ ማዔ ሴኤቴ ዜርፆ ማዔ ዓቲንቆኮ ቶኦኮ ዳኣፃንዳኔ።
18 ዔዶኦሜ ዓሶ ባሻንዳኔ፤
ዒዛኮ ሞርኮ ማዔ ሴኤሬ ዓሶዋ ባሻንዳኔ፤
ዬያይዲ ዒስራዔኤሌ ዓሳ ባባሻያ ማዒ ናንጋንዳኔ።
19 ዎይሣያ ያይቆኦቤይዳፓ ኬስካንዳኔ፤
ዬካ ካታማ ዓቴ ዓሶ ቢያ ዒ ባይዛንዳኔ።»
20 ዬካፓ ሃሣ ባኣላኣሜ ዓማሌቄ ዓጮ ባንሢ ዛጊ ዛጊ፦
«ዓማሌቄ ዴሮ ቢያይዳፓ ባሻ ካኣቶኬ፤
ጋፒንፆይዳ ጋዓንቴ ዒ ባይቃንዳኔ።»
21 ቄና ዓሶዋ ዛጋዖ ሃሣ፦
«ዒንሢ ናንጋ ቤዛ ጉሙርሳያኬ፤
ዒንሢ ማዤ ማኣራኣ ዔኤቢ ሄሉዋ ዼጌ ቤሲዳኬ፤
22 ዬይ ያዺ ማዔቴያ ዒንሢ ቄና ዓሳ
ዓሶኦሬ ዒንሢ ባሺ ዲዒ ዔኬ ዎዶና ዒንሢ ባይቃንዳኔ»
ጌይሢ ዓርቄኔ።
23 ሃሣ ዒ ኬኤዛዖ፦
«ካኣ! ፆኦሲ ዬያይዳዛ
ዓይጎ ዓሲ ዓታንዳይ?
24 ኪቲሜ ኮይላፓ ዋኣሢ ካኣሚሌ ሙካንዳኔ፤
ዬያታ ሙኪ ዓሶኦሬንታ ዔቦኦሬያ ዓርቃንዳኔ፤
ጋዓንቴ ዔያታኣ ባይቃንዳኔ።»
25 ዬካፓ ባኣላኣሜ ፔ ማኣሪ ማዒ ዓኣዻዛ፥ ባኣላኣቄያ ፔ ቤዞ ዴንዴኔ።