ፓይዲ ማፃኣፔ
ዓይፆ ካሮ
ፓይዶ ማፃኣፓ፦ ዒስራዔኤሌ ዓሳ ሲና ዹኮ ሃሺ ዓኣዼስካፓ ዓርቃዖ ዴንዲ ፆኦሲ ዔያቶም ዒንጋኒ ጫኣቄ ዓጬሎኮ ዓባ ኬስካ ዛሎ ዛጶ ሄላንዳኣና ዖይዲታሚ ሌዔ ዔያታ ሃንቴ ዎዶና ዬኖ ሌዖ ጋራ ማዺንቴ ባኣዚ ኬኤዛኔ። ማፃኣፔሎኮ ሱንፃ ማዺንቴ ሃይሶይዳ ዼኤፒ ማዒ ጴዻ ባኮ ዛሎ ኬኤዛያኬ፤ ዬይያ፦ ዒስራዔኤሌ ዓሳ ሲና ዹኮ ሃሺ ዓኣዻንዳሢኮ ቤርታ፤ ዬያጉዲ ሃሣ ፔቴ ሾይንቲ ዎዴ ዓኣዼስካፓ ዮርዳኖሴ ዎሮኮ ሱካ፥ ዓባ ኬስካ ዛላ፥ ሞዓኣቤ ዓጮይዳ ሙሴ ዴሮ ፓይዴ ፓይዶ ዛሎኬ። ላሚ ላሚ ዴሮ ፓይዶና ዎዶኮ ባኣካ ዓኣ ዎዶይዳ ዒስራዔኤሌ ዓሳ ካኣናኔ ዓጮኮ ዾኦሎ ዛሊና ዛጲ ማዔ፥ ቃዴሴባርኔ ጌይንታ ቤዞ ሄሌኔ፤ ዬይ ያዺ ማዔቴያ ዬኖ ዛሎና ዔያቶም ሃጊ ማዓንዳ ዎዛ ማሂ ዒንጊንቴ ዓጬሎ ዔያታ ጌላኒ ዳንዳዒባኣሴ፤ ያዺ ማዔሢሮ ዬኖ ቤዞይዳ ሚርጌ ሌዔ ዔያታ ናንጌስካፓ ዮርዳኖሴ ዎሮኮ ዓባ ኬስካ ዛሎይዳ ዓኣ ዓጮ ዴንዴኔ። ዒማና ዛሎ ዴራ ዒኢካ ናንጋኒ ኮዒ ዓታዛ፥ ዛላ ጋዓንቴ ዮርዳኖሴ ዎሮና ፒንቂ ካኣናኔ ዴንዳኒ ጊኢጊንቴኔ።
ፓይዶ ማፃኣፓ፦ ሚርጌ ሜታ ዔያቶ ሄሌ ዎዶና ዒጊጫያ፤ ሃሣ ሃጊ ማዓ ዎዛ ባይዚ «ኑ ጋፔኔ» ጋዓያ፤ ጊንሣ ሃሣ ፆኦሲንታ ዔያቶ ዔኪ ዓኣዻንዳጉዲ ፆኦሲ ዶኦሬ፥ ሙሴማኣ ዋይዞ ዒፃ ዴሮ ዛሎ ሃይሶ ኬኤዛያኬ። ዎዚ፦ ዴራ ዋይዚ ዒፃያ ማዔቴያ ፆኦሲ ፔኤኮ ጉሙርቂንቲፆና ዔያቶ ካፔያ ማዔሢ ሃይሶይዳ ኬኤዚንቴኔ፤ ዬያጉዲ ሃሣ ሙሴ ፔቴ ፔቴና ዳንዳዒ ጊቡዋያ ማዔቴያ ዶዲ ጉሙርቂሢ ዒዛኮ ዓኣያ ማዔሢና ፆኦሲንታ ዴሮንታም ዒ ጉሙርቂንቲ ማዼያ ማዔሢ ኬኤዚንቴኔ።
ማፃኣፔላ ዱማ ዱማ ዓርቄ ባኮ
ዒስራዔኤሌ ዓሳ ሲና ዹኮ ሃሺ ዓኣዺፆሮ ጊኢጊንቴሢ (1፡1-9፡22)
1. ዴራ ቤርቲ ቤርታ ፓይዲንቴሢ (1፡1-4፡49)
2. ዱማ ዱማ ዎጎና ዳምቦና (5፡1-8፡26)
3. ላምዓሳ ዑሣ ዓኣዺፆ ቦንቾ (9፡1-23)
ሲና ዹካፓ ዴንዲ ሞዓኣቤ ሄላንዳኣና (10፡1-21፡35)
ሞዓኣቤ ዓጮይዳ ማዺንቴ ባኮ (22፡1-32፡42)
ዴራ ጊብፄፓ ሞዓኣቤ ሄላንዳኣና ዴንዴ ዎዶና ማዺንቴ ባኮኮ ዓኣፖንሢ (33፡1-49)
ዴራ ዮርዳኖሴ ዎሮ ፒንቃንዳሢኮ ቤርታ ዓይሢንቴ ዓይሥሢ (33፡50-36፡13)
1
ዒስራዔኤሌ ዴሮኮ ቤርታሳ ፓይዲንቶ
1 ዒስራዔኤሌ ዴራ ጊብፄ ዓጫፓ ኬስኬንቴ ላምዓሳ ሌዖና ላምዓሳ ዓጊኖኮ ቤርታሳ ኬሎ ሲና ጌይንታ ዓሲ ናንጉዋ ዳውሎይዳ ዓኣንቴ ዓፒሎና ማዢንቴ ፆኦሲ ዴሮና ካኣማ ማኣሮፓ ናንጊና ናንጋ ጎዳ ሙሴም ኬኤዛዖ፦
2-3 «ዒስራዔኤሌ ዴሮ ፃጶና ፃጶና፥ ሃሣ ማኣሮ ዓሶና ዓሶና ማሂ ፓቂ ኔናንታ ዓኣሮኔንታ ዓቲንቆ ፓይዱዋቴ፤ ሌዓ ላማታሚና ዬካፓ ዑሣ ማዔያ ሃሣ ዖልዚና ዓጪ ካፓኒ ዳንዳዓ ዓቲንቆ ቢያ ዱማ ዱማ ዖላ ዓሲ ማሂ ፓቂ ፓቂ ፃኣፑዋቴ።
4 ፔቴ ፔቴ ፃጶይዳፓ ዬኖ ማኣሮኮ ሱኡጌ ማዒ ዒንሢ ማኣዳንዳ ፔቴ ፔቴ ዓሲ ዶኦሩዋቴ» ጌዒ ኬኤዜኔ።
5 ዒንሢ ማኣዳንዳ ዓሳ ሃካፓ ሊካ ፓይዲንታዞንሢኬ፦
ሮኦቤኤሌ ዓሶፓ
ሼዴዑሬ ናኣዚ ዔኤሊፁሬ
6 ሲሞኦኔ ዓሶፓ
ፁሪሻዳዬ ናኣዚ ሼሉሚዔኤሌ
7 ዪሁዳ ዓሶፓ
ዓምናኣዳኣቤ ናኣዚ ናዓሶኔ
8 ዪሳኮኦሬ ዓሶፓ
ፁዓሬ ናኣዚ ናቲናዔኤሌ
9 ዛብሎኦኔ ዓሶፓ
ሄሎኔ ናኣዚ ዔኤሊዓቤ
10 ዮሴፔ ናኣቶኮ
ዔፕሬኤሜ ዓሶፓ
ዓሚሁዴ ናኣዚ ዔልሻማዔ
ሚናኣሴ ዓሶፓ
ፔዳፁሬ ናኣዚ ጌማሊዔኤሌ
11 ቢኢኒያሜ ዓሶፓ
ጊዲዮኔ ናኣዚ ዓብዳኣኔ
12 ዳኣኔ ዓሶፓ
ዓምሻዳዬ ናኣዚ ዓሂዔዜሬ
13 ዓሴኤሬ ዓሶፓ
ዖክራኔ ናኣዚ ፓግዔኤሌ
14 ጋኣዴ ዓሶፓ
ዴዑዔኤሌ ናኣዚ ዔኤሊያሳፔ
15 ኒፕታኣሌኤሜ ዓሶፓ
ዔናኔ ናኣዚ ዓሂራዔ
16 ዴሮ ባኣኮይዳፓ ፔቴ ፔቴ ዒስራዔኤሌ ማኣሮኮ ሱኡጎ ማዒ ዶኦሪንቴዞንሢ ዬንሢኬ።
17 ሙሴና ዓኣሮኔና ዬንሢ ታጶ ላምዖ ዓሶንሢና ማኣዲንቲ ማኣዲንቲ፥
18 ላምዓሳ ዓጊኖኮ ቤርታሳ ኬሎና ዴሮ ቢያ ፔቴይዳ ቡኩሲ ፃጶና ማኣሮ ዓሶና ዓሶና ማሂ ፓቄስካፓ ዴራ ፓይዲንታንዳጉዲ ማዼኔ፤ ዓሶይዳፓ ሌዓ ላማታሚና ዬካፓ ዑሣ ዓኣዼ ዓቲንቆኮ ቢያ፦ ፆኦሲ ዓይሤ ጎይፆና ሱንፃ ፃኣፒንቲ ፃኣፒንቲ ፓይዲንቴኔ።
19 ሙሴ ዬያይዲ ሲና ቦኦሎይዳ ዴሮ ፓይዴኔ።
20 ዖልዚና ዓጪ ካፓኒ ዳንዳዓያ፤ ሃሣ ሌዓ ላማታሚና ዬካፓ ዑሣ ማዓ ዓቲንቃ፥ ያይቆኦቤ ናኣቶኮ ቶይዳሢ ማዔ ሮኦቤኤሌ ማኣራፓ ቢያሢ ፃጶና ፃጶና፤ ሃሣ ማኣሮና ማኣሮና ማዒ ፓቂንቲ ሱንፃ ፃኣፒንቴኔ፤
21 ሮኦቤኤሌ ማኣራፓ ፓይዲንቴ ዓሳ ዖይዲታሚ ላሆ ሺያና ዶንጎ ፄኤታናኬ።
22 ሲሞኦኔ ማኣራፓ ሌዓ ላማታሚና ዬካፓ ዑሣ ማዔያ፥ ዖልዚ ዖላኒ ዳንዳዓ ዓቲንቃ ቢያ ፔኤኮ ፃጶና ፃጶና፤ ሃሣ ማኣሮና ማኣሮና ማዒ ፓቂንቲ ሱንፃ ፃኣፒንቴኔ።
23 ሲሞኦኔ ማኣራፓ ፓይዲንቴ ዓሳ ዶንጊታሚ ታዞጳ ሺያና ሃይሦ ፄኤታናኬ።
24 ጋኣዴ ማኣራፓ ሌዓ ላማታሚና ዬካፓ ዑሣ ማዔያ፥ ዖልዚ ዖላኒ ዳንዳዓ ዓቲንቃ ቢያ ፔኤኮ ፃጶና ፃጶና፤ ሃሣ ማኣሮና ማኣሮና ማዒ ፓቂንቲ ሱንፃ ፃኣፒንቴኔ፤
25 ጋኣዴ ማኣራፓ ፓይዲንቴ ዓሳ ዖይዲታሚ ዶንጎ ሺያና ላሆ ፄኤታና ዶንጊታሚናኬ።
26 ዪሁዳ ማኣራፓ ሌዓ ላማታሚና ዬካፓ ዑሣ ማዔያ፥ ዖልዚ ዖላኒ ዳንዳዓ ዓቲንቃ ቢያ ፔኤኮ ፃጶና ፃጶና፤ ሃሣ ማኣሮና ማኣሮና ማዒ ፓቂንቲ ሱንፃ ፃኣፒንቴኔ፤
27 ዪሁዳ ማኣራፓ ፓይዲንቴ ዓሳ ላንካይታሚ ዖይዶ ሺያና ላሆ ፄኤታናኬ።
28 ዪሳኮኦሬ ማኣራፓ ሌዓ ላማታሚና ዬካፓ ዑሣ ማዔያ፥ ዖልዚ ዖላኒ ዳንዳዓ ዓቲንቃ ቢያ ፔኤኮ ፃጶና ፃጶና፤ ሃሣ ማኣሮና ማኣሮና ማዒ ፓቂንቲ ሱንፃ ፃኣፒንቴኔ፤
29 ዪሳኮኦሬ ማኣራፓ ፓይዲንቴ ዓሳ ዶንጊታሚ ዖይዶ ሺያና ዖይዶ ፄኤታናኬ።
30 ዛብሎኦኔ ማኣራፓ ሌዓ ላማታሚና ዬካፓ ዑሣ ማዔያ፥ ዖልዚ ዖላኒ ዳንዳዓ ዓቲንቃ ቢያ ፔኤኮ ፃጶና ፃጶና፤ ሃሣ ማኣሮና ማኣሮና ማዒ ፓቂንቲ ሱንፃ ፃኣፒንቴኔ፤
31 ዛብሎኦኔ ማኣራፓ ፓይዲንቴ ዓሳ ዶንጊታሚ ላንካይ ሺያና ዖይዶ ፄኤታናኬ።
32 ዮሴፔ ናኣቶኮ ዔፕሬኤሜ ማኣራፓ ሌዓ ላማታሚና ዬካፓ ዑሣ ማዔያ፥ ዖልዚ ዖላኒ ዳንዳዓ ዓቲንቃ ቢያ ፔኤኮ ፃጶና ፃጶና፤ ሃሣ ማኣሮና ማኣሮና ማዒ ፓቂንቲ ሱንፃ ፃኣፒንቴኔ፤
33 ዔፕሬኤሜ ማኣራፓ ፓይዲንቴ ዓሳ ዖይዲታሚ ሺያና ዶንጎ ፄኤታናኬ።
34 ሚናኣሴ ማኣራፓ ሌዓ ላማታሚና ዬካፓ ዑሣ ማዔያ፥ ዖልዚ ዖላኒ ዳንዳዓ ዓቲንቃ ቢያ ፔኤኮ ፃጶና ፃጶና፤ ሃሣ ማኣሮና ማኣሮና ማዒ ፓቂንቲ ሱንፃ ፃኣፒንቴኔ፤
35 ሚናኣሴ ማኣራፓ ፓይዲንቴ ዓሳ ሃይሢታሚ ላምዖ ሺያና ላምዖ ፄኤታናኬ።
36 ቢኢኒያሜ ማኣራፓ ሌዓ ላማታሚና ዬካፓ ዑሣ ማዔያ፥ ዖልዚ ዖላኒ ዳንዳዓ ዓቲንቃ ቢያ ፔኤኮ ፃጶና ፃጶና፤ ሃሣ ማኣሮና ማኣሮና ማዒ ፓቂንቲ ሱንፃ ፃኣፒንቴኔ፤
37 ቢኢኒያሜ ማኣራፓ ፓይዲንቴ ዓሳ ሃይሢታሚ ዶንጎ ሺያና ዖይዶ ፄኤታናኬ።
38 ዳኣኔ ማኣራፓ ሌዓ ላማታሚና ዬካፓ ዑሣ ማዔያ፥ ዖልዚ ዖላኒ ዳንዳዓ ዓቲንቃ ቢያ ፔኤኮ ፃጶና ፃጶና፤ ሃሣ ማኣሮና ማኣሮና ማዒ ፓቂንቲ ሱንፃ ፃኣፒንቴኔ፤
39 ዳኣኔ ማኣራፓ ፓይዲንቴ ዓሳ ላሂታሚ ላምዖ ሺያና ላንካይ ፄኤታናኬ።
40 ዓሴኤሬ ማኣራፓ ሌዓ ላማታሚና ዬካፓ ዑሣ ማዔያ፥ ዖልዚ ዖላኒ ዳንዳዓ ዓቲንቃ ቢያ ፔኤኮ ፃጶና ፃጶና፤ ሃሣ ማኣሮና ማኣሮና ማዒ ፓቂንቲ ሱንፃ ፃኣፒንቴኔ፤
41 ዓሴኤሬ ማኣራፓ ፓይዲንቴ ዓሳ ዖይዲታሚ ፔቴ ሺያና ዶንጎ ፄኤታናኬ።
42 ኒፕታኣሌኤሜ ማኣራፓ ሌዓ ላማታሚና ዬካፓ ዑሣ ማዔያ፥ ዖልዚ ዖላኒ ዳንዳዓ ዓቲንቃ ቢያ ፃጶና ፃጶና፤ ሃሣ ማኣሮና ማኣሮና ማዒ ፓቂንቲ ሱንፃ ፃኣፒንቴኔ፤
43 ኒፕታኣሌኤሜ ማኣራፓ ፓይዲንቴ ዓሳ ዶንጊታሚ ሃይሦ ሺያና ዖይዶ ፄኤታናኬ።
44 ሙሴንታ ዓኣሮኔንታ ፔቴ ፔቴ ዒስራዔኤሌ ማኣሮ ዛሎ ኬስኬ፥ ታጶ ላምዖ ፃጶኮ ሱኡጎንታ ፓይዴ ዓሳ ዬያቶኬ።
45 ዒስራዔኤሌ ዓሶኮ ሌዓ ላማታሚና ዬካፓ ዑሣ ማዔያ፥ ዖልዚ ዖላኒ ዳንዳዓ ዓቲንቃ ቢያ ማኣሮና ማኣሮና ፓቂንቲ ፓይዲንቴኔ፤
46 ዬያ ፓይዴንቴ ዓሶኮ ሚርጉማ ላሆ ፄኤታና ሃይሦ ሺያና ዶንጎ ፄኤታና ዶንጊታሚናኬ።
47 ሌዊ ዓሳ ጋዓንቴ ሃንጎ፥ ዬኖ ፃጶ ማኣሮና ፓይዲንቲባኣሴ፤
48 ዓይጎሮ ጌዔቴ ናንጊና ናንጋ ጎዳ ሙሴም፦
49 «ዖልዚና ዓጪ ካፓኒ ዳንዳዓ ዓቲንቆ ኔ ፓይዳ ዎዶና ሌዊ ዓሶ ጊዳ ቃሲ ፓይዲፖ።
50 ዬያ ዛሎ ሌዊ ዓሶ፦ ታኣኒ ዴሮና ካኣማ፥ ዓፒሎና ማዢንቴ ማኣሮና ጋሮይዳ ዓኣ ማዺንቶ ባኮ ዑፃ ቢታንቶ ዓኣ ዓሲ ማሂ ጌሤ፤ ዔያታ ዓፒሎና ማዢንቴ ማኣሮና ጋሮናይዳ ዓኣ ባኮ ቢያ ኬዲ ሃንታያ ማዓንዳኔ፤ ሃሣ ዒኢካ ዔያታ ማዻያ ማዓንዳኔ፤ ዬያ ማኣሮኮ ኮይሎይዳ ዔያታ ዱንኪ ዴዖንጎ።
51 ዒንሢ ዴዓ ቤዛፓ ሃሺ ዴንዳ ዎዶና ሌዊ ዓሳ ሌሊ ታኣኒ ዴሮና ካኣማ ማኣሮ ዾቆና ቤዛፓ ቱጋያ፥ ሃሣ ዒንሢ ዴንዲ ዱንካ ቤዞይዳኣ ዔያታ ዾቃያ ማዖንጎ፤ ዔያቶይዳፓ ዓታዛ ዬኖ ማኣሮ ባንሢ ዖኦኒያ ዑኬቴ ሃይቃንዳጉዲ ዎጊንቶንጎ።
52 ሃንጎ ዒስራዔኤሌ ዓሳ ዔያቶ ፓቆና ጎይፆ ጎይፆ፤ ጊንሣ ፔኤኮ ፔኤኮ ባንዲሮ ዾቂ ዱንኪ ዴዖንጎ።
53 ጋዓንቴ ዓይጎ ዓሲያ ማዖም ዬኖ፥ ታኣኒ ዴሮና ካኣማ ማኣሬሎ ባንሢ ዑኪ፥ ዻጎ ታኣኮ ዔቂሲ ዒስራዔኤሌ ዓሶ ኩርሲሱዋጉዲ ሌዊ ዓሳ ዬኖ ዓፒሎና ማዢንቴ ማኣሬሎኮ ኮይሎይዳ ዱንኪ ዴዒ ካፖንጎ» ጌዔኔ።
54 ዬያሮ ዒስራዔኤሌ ዴራ ናንጊና ናንጋ ጎዳ ሙሴ ዓይሤ ጎይፆ ቢያ ባኮ ማዼኔ።