33
1 «ዔኤዞ ዒዮቤ! ታ ኔኤም ኬኤዛሢ ዋይዜ፤
ታ ኔኤም ጋዓ ባኮዋ ኮሺ ዒና ዔኬ።
2 ታ ኔኤም ማሂ ኬኤዛኒ ጊኢጊንቴኔ፤
ዒንዲርዛኣ ታኣኮ ጌስታኒኬ።
3 ታ ጋዓ ባካ ዒኖኮ ታኣኮ ፒዙሞ ዔርዛኔ፤
ዒንዲርዛኣ ታኣኮ ጎኑሞ ጌስታኔ።
4 ታና ማዤሢ ፆኦሲ ዓያናኬ፤
ሼምፖ ታኣም ዒንጌሢ ቢያ ባኮ ዳንዳዓ ጎዳኮ ዑኡዞኬ።»
5 «ኔ ዳንዳዓያ ማዔቴ ታ ጋዓ ሃይሶ ማሂ ታኣም ኬኤዜ፤
ማርማሢ ጊኢጊሺ ዔቂ ታኣና ማርሜ።
6 ኔናንታ ታናንታ ፆኦሲ ቤርታ ኑ ሄኮኬ፤
ላምዓሢ ኑ ማዢንቴሢ ዓጪዳፓኬ።
7 ዬያሮ ኔ ታና ዒጊጫንዳያ ኮይሱዋሴ፤
ታኣኒ ኔኤና ማርሚፆና ኔኤም ጌኤታዻያ ማዓኒ ኮዑዋሴ።»
8 «ጎኔኬ፤ ኔ ኬኤዜ ባኮ ቢያ ታ ዋይዜኔ፤
ኔ ዒንዲርዛፓ ኬስኬ ባኮዋ ታ ዔኬኔ።
9 ኔኤኒ ኬኤዛዖ፦ ‹ዻቢንቲና ዔኤቢያ ታኣኮ ባኣያ፥
ታ ጌኤሺ ዓሲኬ፤
ፔቴታዖ ታ ጎሜ ማዺባኣያ ፂሎ ዓሲኬ፤
10 ጋዓንቴ ፆኦሲ ታና ሜታሳኒ
ታ ጋዓ ባኣዚ ዋይዛኒ ኮዓኔ፤
ዓዳ ፔኤኮ ሞርኬጉዲ ታና ማሄኔ።
11 ቶኮ ታኣኮ ዱፄና ዓይሣኔ፤
ታ ዓኣዻ ጎይፆዳ ቢያ ዒ ታና ዛጋኔ› ኔ ጌዔኔ።»
12 «ዔኤዞ ዒዮቤ! ዬይ ሃይሳ ኔኤኮ ዻቢንቲ ማዔሢ
ታ ኔና ዔርዛኒ ኮዓኔ፤
ፆኦሲ ዓሲዳፓ ቢያ ባሼኬ።
13 ዓካሪ፦ ‹ፆኦሲ ዓሲ ሃይሴ ዋይዙዋሴ› ጌይ
ዓይጋ ኔ ፆኦሲዳ ዻጋዻይ?
14 ዓሲ ማሊ ጶቂሡዋፓዓቴም
ፆኦሲ ዱማ ዱማ ጎይሢና ኬኤዛኔ።
15 ዋንታ ዓሲ ፔኤኮ ሻኣሎይዳ ላሂ
ዼኤፒ ጊንዖይዳ ዓኣንቴ
ፆኦሲ ዓውቲና ፔ ዻዋ ባኣዚና ኬኤዛኔ።
16 ዒማና ዓሳ ዒዛኮ ቃኣሎ ዋይዛንዳጉዲ ዒ ማሃኔ፤
ዔያቶም ኬኤዛ ላቲፆና ዔያቶ ዲቃሣኔ።
17 ዬያይዲ ዓሳ ጎሜ ማዺሢዳፓ ካፒንታንዳጉዲ ማሃኔ፤
ዖቶርሙሞዋ ዔያቶይዳፓ ባይዛኔ።
18 ሼምፓሢ ዔያቶኮ ባይሲንታፓ ዒ ካፓኔ፤
ዱማ ዱማ ዎዻ ዶርዖፓኣ ዓውሳኔ።
19 ጊንሣ ሃሣ ዓሶኮ ሜጌፆ ጋራ ጋፑዋ ዶርዓ ጌሌም
ሻኣሎይዳ ላሂ ሜታዻንዳጉዲ ማሃኔ።
20 ዬያይዲ ሃርጊንቴ ዓሲ ሙኡዚ ዻንጋ ጌሡዋጉዲ ዒሣኔ፤
ዓኣሢ ሙኡዚታዖ ዒዛ ዒዒሣኔ።
21 ዑፃ ዒዛኮ ዖኦፒ ላይታኔ፤
ዓንዲርሙማ ባይቂ ሜጌፃ ጴዻኔ።
22 ናንጋ ዒዛኮ ጋፒ
ሼምፓሢያ ዒዛኮ ሃይቄ ዓሶ ዓጮ ኬዳኒ ዑኬኔ።»
23 «ዓሲም ፒዜ ጎይሢ ዻዋያ
ሺያና ፓይዲንታ ፆኦሲ ኪኢታንቾፓ ፔቴይ
ዒዛ ባንሢ ሙኪ ዒዛ ማኣዳንዳያ ናንዳኔ፤
24 ኪኢታንቻሢ ዒዛ ሚጪንቲ፦
‹ታ ዒዛ ዓይሳንዳ ጎይሢ ዴንቄሢሮ
ዒ ዱኡኪንቱዋጉዲ ዒዛ ሃሼ!› ጌዒ
ሃይቢ ዓይሣንዳኔ።
25 ዬያሮ ዑፃ ዒዛኮ ጊንሣ ናይ ዑሢ ማዓንዳኔ፤
ዑፃ ዒዛኮ ቤርታ ዼጌ ዓኣሢጉዲ ማዓንዳኔ።
26 ዒማና ዒ ፆኦሲ ሺኢቃንዳኔ፤
ሺኢጲፆዋ ፆኦሲ ዒዛኮ ዋይዛንዳኔ፤
ዒዚያ ፆኦሲኮ ዓኣፖ ካሮ ዛጊ ዎዛዻንዳኔ፤
ፆኦሲያ ዒዛኮ ፂሉሞ ዛሎ
ዒዛም ማዓ ባኣዚ ጪጋንዳኔ።
27 ዬያሮ ዒዚ ዓሶ ቤርታ፦
‹ታ ጎሜ ማዼኔ፤
ፒዜ ባኮዋ ታ ዎቢሤኔ፤
ፆኦሲ ጋዓንቴ ታኣም ታኣኮ ዻቢንቶጉዴያ ሜቶ ዒንጊባኣሴ።
28 ሃይቄ ዓሶ ዓጮ ኬዲሢፓ ዒ ታና ዓውሴኔ፤
ዓካሪ ሃሢ ሼምፔና ዓኣያ ማዒ ፖዒ ታ ዛጋኔ›
ጌይ ዓይናዻንዳኔ።»
29 «ሃሢ ፆኦሲ ዬያ ባኮ ቢያ
ዓሲም ማሂ ማሂ ማዻኔ።
30 ናንጊኮ ፖዒ ዛጋንዳጉዲ
ሼምፓሢ ዱኡፓፓ ዒዛኮ ማሃኔ።»
31 «ዔኤዞ ዒዮቤ! ታ ኔኤም ኬኤዛሢ ኮሺ ዋይዜ፤
ሂንዳ ኔ ዚቲ ጌዔ፥ ታ ኔኤም ኬኤዞም።
32 ኔ ጋዓ ባኣዚ ዓኣቶ ማሂ ታኣም ኬኤዜ፤
ታ ኔና ዓይላቶፓ ኬሳኒ ኮዓሢሮ ኔ ጌስቴ።
33 ሃንጎ ዚቲ ጌይ ታ ጋዓሢ ዋይዜ፤
ታ ኔና ዔራቶ ዔርዛንዳኔ» ጌዔኔ።