ጌኤዦ ማፃኣፖ ዒዮቤ ማፃኣፖ 22

ሃይሣሲ ጌስቲንቴ ጌኤዞ

(22፡1—26፡14)

ዔልፓዜ

1 ቴሜና ዓጮ ዓሢ፥ ዔልፓዜ ሂዚ ጌይ ማሄኔ፦

2 «ዓሲ ፆኦሲ ማኣዳ ባኣዚ ዓኣ?

ሜሌ ዓታዛ ዒ ዔራ ማዔታቶዋ ፔኤም ማዓንዳፓዓቴም

ፆኦሲም ማዓያቱዋሴ።

3 ኔኤኮ ኮዦ ማዻ ቢያ ባኮ ዳንዳዓ ጎዳሢም ዓይጎ ማኣዳይ?

ኔኤኮ ፒዜ ናንጋ ዒዛም ዓይጎ ዎኦታይ? +

4 ዓካሪ ኔጊዳ ዎጌሢና

ሃያይዲ ኔና ጎሬሢ

ኔኤኒ ፆኦሲኮ ላጌ ማዔሢሮዳ?

5 ሃይ ቢያ ጌና ኔና ሄሌሢ ፑርቱማ ኔኤኮ ዺቤሢሮ

ጎማኣ ኔኤኮ ኩዱዋኣያ ሚርጌታሢሮቱዋዓዳ?

6 ኔኤኮ ጌርሲንሢ ዎኦቴ ባኣዚ ባኣንቴ

ዓይሢ ባኣዚ ማሂ ዔያቶ ባኮ ኔ ዔኬኔ፤

ዛሎ ዓሶኮ ማኣዓሢ ጉሲ ካሎ ኔ ዔያቶ ዓይሴኔ።

7 ናይዺ ዼኤቢንቲ ላቤዞንሢ

ካሣንታ ዋኣሢንታ ኔ ላኣጌኔ።

8 ሳዔላ ዎልቄና ዓኣ ዓሶ ቆሎ

ዻካ ዓሲኮ ሌሊ ዴኔ ማዔኔ።

9 ዜኤሮይንዶ ኩቺ ጉሪ ኔ ዳኬኔ፤

ዜኤሮ ናኣቶኮዋ ዔያቶ ዎይሣ ባኮ ኔ ባይዜኔ።

10 ዬያሮ ኮይላ ኔኤኮ ፒሮና ማንጊንቴኔ፤

ዔርቲባኣ ሜታኣ ኔና ዲቃሣንዳኔ፤

11 ዛጋኒ ኔና ባሻንዳያ ሄላንዳኣና ዹሚ ኔና ዓርቄኔ፤

ዲጲ ዋኣሢያ ኔና ዔኤዼኔ።»

12 «ፆኦሲ ዼግ ጌዔ ጫሪንጮይዳ ናንጋያቱዋዓዳ?

ዦኦጋሢ ዎዚ ዼግ ጌዔ ቤስካ ዓኣያ ማዔቴያ

ዒዚ ዔያቶኮ ዑፃ ማዒ ዔያቶ ዛጋኔ።

13 ኔኤኒ ጋዓንቴ፦ ‹ፆኦሲ ዓይጎ ዔራይ?

ሻኔ ዹሞኮ ሶ ሱካ ዔቂ

ዎዲ ኑጊዳ ዎጋኒ ዳንዳዓይ?

14 ጫሪንጮኮ ዑፃ ዒ ሃንታኣና

ሻኔ ዹማ ዒዛ ዓኣቻሢሮ

ዒ ዛጋኒ ዳንዳዑዋሴ› ጋዓኔ።»

15 «ጎሞ ዓሳ ሃንቴ

ሚናኣ ጎይፆ ኔ ሃንታ?

16 ዔያታ ዎዳ ዔያቶኮ ሄሉዋንቴ ኩዴኔ፤

ዲጲ ዋኣሢናኣ ፒፂንቲ ባይቄኔ።

17 ዔያታ ቢያ ባኮ ዳንዳዓ ጎዳሢ፦ ‹ኑ ኮይላፓ ሃኬ፤

ኔ ኑም ዓይጎ ማዻኒ ዳንዳዓይ?› ጌዔኔ።

18 ጋዓንቴ ማኣሮ ዔያቶኮ ዖርጎቹሞና ኩንሤሢ ፆኦሲኬ።

ዬያሮ ታኣኒ ፑርቶ ዓሶኮ ማሊፆ ዔኩዋሴ።

19 ፑርቶ ዓሳ ሜታዻሢ ዛጊ ዛጊ

ኮዦ ዓሳ ዎዛዻኔ፤

ፒዜ ዓሳ ሂዚ ጌይ ጌይ ዔያቶ ሚኢጫኔ፦

20 ‹ጎኔ፥ ኑኡኮ ሞርካ ባይቄኔ፤

ዔያቶኮ ዓኣ ባካ ቢያ ታሚና ሚጪ ጋፔኔ።›»

21 «ዬያሮ ዒዮቤ፥ ኔና ፆኦሲም ዎይሤ፤

ኔኤኮ ዒዛና ዎላ ኮሹሞ ዓኣያ ማዖንጎ፤

ኔ ያዺዴቴ ኮሺ ባኣዚ ዴንቃንዳኔ።

22 ፆኦሲ ኔና ዔርዛ ዔርዚፆ ዋይዜ፤

ዒዛኮ ቃኣሎዋ ዒና ዔኬ።

23 ኔ ቶኦኮ ኔኤኒ ቢያሢ ዳንዳዓ ጎዳ ባንሢ ማሄቶ

ኔኤኒ ቤርታኣሲ ጎይፆ ማዓንዳኔ፤

ኔ ማኣራፓ ፑርቶ ማዾ ባይዜ።

24 ዎርቆ ሲላሎይዳ ኬኤሬ፤

ዖፔሬ ዓጮ ዎርቆዋ ዎርዚ ሹቺጉዲ ዹይ ዳኬ፤

25 ዬኖ ዎዶና ቢያሢ ዳንዳዓ ጎዳሢ ኔኤም

ዎርቄና ጌኤሺ ቢራና ማዓንዳኔ።

26 ቢያሢ ዳንዳዓ ጎዳሢና ኔ ዎዛዻንዳኔ፤

ዒዛ ኔ ጉሙርቂ ናንጋዳኔ።

27 ዒዛ ኔ ሺኢቃ ዎዶና

ኔ ሺኢቄ ባካ ቢያ ኔኤም ማዺንታዳሢሮ

ናኣቦ ኔኤኮ ኔ ጪጋንዳኔ።

28 ማሊፃ ቢያ ኔኤኮ ጊኢጋንዳኔ፤

ጎይፃኣ ቢያ ኔኤኮ ፖዒ ማዓንዳኔ።

29 ፆኦሲ ዖቶርቃ ዓሶ ዻውሲሳንዳኔ፤

ሼሌዔ ዓሶ ጋዓንቴ ዓውሳንዳኔ።

30 ኔኤኒ ዎንዴ ፂሎ ማዔያታቴ

ፆኦሲ ኔ ዛሎሮ ጌይ ፑርቶ ዓሶ ዓውሳንዳኔ።»