48
ዋይዞ ዒፄ ዒስራዔኤሌ ዓሶ
1 «ዒንሢ ያይቆኦቤ ማኣራ!
ዒስራዔኤሌ ሱንፆና ዔኤሊንቴ ዓሳ
ዪሁዳ ዜርፃፓ ሙኬ ዓሳ
ፆኦሲ ሱንፆና ጫኣቃ ዓሳ
ጎኑሞና፥ ሃሣ ፂሉሞናቱዋንቴ
ናንጊና ናንጋ ጎዳ ማዔ ዒስራዔኤሌ ፆኦዛሢ ካኣሽካ ዓሳ
ሃያ ዋይዙዋቴ።
2 ዱማዼ ካታሜሎ ሱንፆና ዔኤሊንቴ ዓሳ
ሱንፃ ቢያ ባኮ ዎይሣ ጎዳ ማዔ ዒስራዔኤሌ ፆኦዛሢ ጉሙርቃ ዓሳ
ሃያ ዋይዙዋቴ።»
3 «ሴካ ቤርቲም ማዓንዳ ባኮ ዛሎ ሚርጌ ሌዔኮ ቤርታ ታኣኒ ኬኤዜኔ፤
ታ ዻንጋፓ ኬስኬም ዔርታንዳጉዲ ታ ማሄኔ፤
ዔርቲባኣንቴ ዬያ ታ ማዼኔ፥ ዬይያ ማዺንቲ ኩሜኔ።
4 ዎማዒ ኔ ዋይዚ ዒፃያታቴያ ታኣኒ ዔራኔ፤
ኔኤኮ ባቃኖ ሻዣ ዓንጊጉዲ
ባሊታኣ ኔኤኮ ሞኦናጉዲኬ።
5 ሃያ ባኮ ቢያ ቤርታሲ ታኣኒ ኔኤም ኬኤዜኔ፤
ሃይ ማዺንቲ ኩማንዳሢኮ ቤርታ ታኣኒ ዔርዚናኣኮኬ፤
ዬያ ታኣኒ ማዼሢ ‹ኑኡኮ ሜሌ ፆኦዛ ሃያ ማዼኔ፤
ሚፆና ዓንጎናኮ ማላታ ሃያ ጌስቲ ቱኬኔ› ኔኤኒ ጎዑዋጉዲኬ።»
6 «ታኣኒ ኬኤዜሢ ኔ ዋይዜኔ፤
ዬይያ ማዺንቲ ኩሜሢ ኔኤኒ ዛጌኔ፤
ማሊ ጶቂሢጋፓ ጎኑሞ ዔሬ፤
ሃናፓ ዓርቃዖ ቤርታዺ ዓኣሽንቲ ዓኣ
ኔኤኒ ዔሪባኣ ዓኪ ባኣዚ ታ ኔና ቤኤዛንዳኔ።
7 ዬያታ ሚርጌ ዎዴኮ ቤርታቱዋንቴ ሃሢ ማዢንቴ ባኣዚኬ፤
ኔኤኒ፦ ‹ቤርታዺ ታ ዔሬኔ› ጎዑዋጉዲ
ሃያ ቤርታ ፔቴታዖ ኔ ዋይዚባኣያኬ።
8 ታኣኒ ኬኤዜሢ ኔ ዋይዚባኣሴ፥ ዔሪባኣሴ፤
ሚናፓ ዓርቃዖ ዋያ ኔኤኮ ባይቄያኬ፤
ኔኤኒ ዒንዶ ጎጳፓ ዓርቃዖ ጌሻያ ማዔሢ
ናኣቱሞ ዎዳፓ ዓርቃዖ ዋይዙዋ ማዔሢ
ታኣኒ ኔና ዔራኔ።»
9 «ታ ሱንፃ ቦንቺንታንዳጉዲ ታኣኮ ዻጎ ታኣኒ ጫኪሳንዳኔ፤
ዓሳ ታና ጋላታንዳጉዲ ታኣኮ ዻጎና ኔና ባይዚፆ ታ ሃሻንዳኔ።
10 ቢራ ዓንጊጉዲ ማዒባኣቶዋ ሜቶ ታሚና ታ ኔና ሼኤሼኔ፤
ባይቁዋ ሜቶ ታሞና ታ ኔኤኮ ዶዱሞ ዛጌኔ።
11 ታ ጋይቴ ጌዒ ታኣኒ ታኣሮ ዬያ ማዻንዳኔ፤
ታና ታ ዓይጎሮ ዻውሲንቲም ዓኣሢ ዒንጋንዳይ?
ታኣኮ ቦንቾ ዖኦማኣ ታ ዒንጋዓኬ።»
ናንጊና ናንጋ ጎዳ ዶኦሬ ሱኡጌ
12 ናንጊና ናንጋ ጎዳ ሂዚ ጋዓኔ፦
«ያይቆኦቤ! ታኣኒ ዔኤሌሦ ዒስራዔኤሌ ዋይዜ፤
ታኣኒ ታናኬ፤ ዓይፆይዳ ዓኣሢንታ ጋፒንፃ ዓኣሢያ ታናኬ።
13 ሳዖ ታ ኩጫ ማዤኔ፤
ጫሪንጮዋ ዳሬሢ ታኣኮ ሚዛቆ ኩጮኬ፤
ታ ዔኤላ ዎዶና ዑካዺ ታ ቤርቶ ዔያታ ሙካኔ።»
14 «ዒንሢ ቢያሢ ቡኪንቲ ሙኪ ዋይዙዋቴ!
ሃያ ባኮ ዛሎ ቤርታዺ ኬኤዜይ ሜሌ ፆኦዞ ባኣካፓ ዎያዳይ?
ፆኦሲ ናሽኪ ዶኦሬሢ
ፆኦሲ ማሊፆ ባብሎኔይዳ ማዺ ኩንሣንዳኔ፤
ዬያኮ ዎልቃኣ ባብሎኔ ዓሶ ባይዛንዳኔ።
15 ታኣኒ ታኣሮ ኬኤዜኔ፥ ታ ዒዛ ዔኤሌኔ፤
ዔኪ ታ ሙካንዳኔ፥ ዔባ ዒዛም ጊኢጋንዳኔ።
16 ሃንጋ ታ ባንሢ ሙኪጋፓ ሃያ ዋይዙዋቴ፤
ቤርታፓ ዓርቃዖ ታ ኬኤዜሢ ዓኣቺ ዴሜናቱዋሴ፤
ዬይ ማዔ ዎዳፓ ዓርቃዖ ታኣኒ ዒኢካኬ።
ሃሢያ ታና ናንጊና ናንጋ ጎዳ ማዔ ፆኦዛሢንታ
ዒዛኮ ዓያኖንታ ዳኬኔ።»
17 ኔና ዓውሳ ዒስራዔኤሌኮ ዱማዼሢ
ቢያ ባኮ ዎይሣ ጎዳሢ ሂዚ ጋዓኔ፦
«ኔና ፓሣ ባኣዚ ቢያ ዔርዛሢ
ኔኤኒ ዓኣዻኒ ኮይሳ ጎይፆ ዔኪ ኔና ዓኣዻሢ
ናንጊና ናንጋ ጎዳ ማዔ ታና ኔ ፆኦዛሢኬ።»
18 «ዎንዴ ታኣኮ ዓይሢፆ ኔ ኮሺ ዋይዜያታቴ
ኮሹሞ ኔኤም ሚጩዋ ዎርዚ ዋኣሢጉዲ
ኔኤኮ ፂሉማኣ ባዞ ዋኣፆጉዲ ማዓንዳንቴኬ።
19 ዜርፃ ኔኤኮ ዓዳ ማኣሻላጉዲ ማዓንዳንቴ
ናኣታ ኔኤኮ ሳዖ ዓጮጉዲ ማዓንዳያታንቴ
ሱንፃኣ ዔያቶኮ ታ ኮራፓ ዋሊንቲ ባይቂንዱዋንቴኬ!»
20 ዓካሪ ባብሎኔይዳፓ ኬስኩዋቴ፤
ባብሎኔ ዓሶፓ ቶላኒ ጳሽኩዋቴ፤
ዬያ ዒላሺሢና ዴንዲ ዓጮኮ ጋፖ ሄላንዳኣና ኬኤዙዋቴ፤
«ፆኦሲ ፔ ዓይላሢ ያይቆኦቤ ዓውሴኔ» ጎዑዋቴ።
21 ፆኦሲ ዔያቶ ዓሳ ናንጉዋ ዳውሎይዴና ዔኪ ዓኣዼያና
ዋኣሢ ዔያቶ ዼኤቢባኣሴ፤
ዋኣፆ ዔያቶም ላላፓ ዒ ዓልቂሴኔ፤
ላሎ ጳሊ ዋኣፆ ዔያቶም ዹኡሴኔ።
22 «ፑርቶ ዓሶም ኮሹሞ ባኣሴ» ጋዓኔ፥ ናንጊና ናንጋ ጎዳሢ።