11
ፆኦሲ ዒዛኮ ዴራ ዋይዞ ዒፄቴያ ናሽኬ ናሹሞ
1 ናንጊና ናንጋ ጎዳ ሂዚ ጋዓኔ፦
«ዒስራዔኤሌ ሃጊ ናይ ዓኣንቴ ታኣኒ ናሽኬኔ፤
ታ ናኣዚ ጊብፄፓ ታኣኒ ዔኤሌኔ።
2 ጋዓንቴ ታ ዴራ፥ ዒስራዔኤሌ
ባሼ ታ ባንሢ ዑካንዳጉዲ ታኣኒ ዔያቶ ዔኤላዛ
ሃቺም ታ ጊዳፓ ሃኪ ሃኪ ዔያታ ዴንዴኔ።
ባዓኣሌ ጌይንታ ሜሌ ፆኦዞም ዒንጎ ባኮ ዒንጊፆንታ
ዬያ ፆኦዞ ማሊሲ ኮሾና ባኮም ዑንጆ ጩቢሺፆ ዔያታ ሃሺባኣሴ።
3 ዔፕሬኤሜኮ ኩጮ ዓርቂ ታኣታሲ
ሃንቲሢ ዔርዜሢ ታናኬ፤
ዔያታ ጋዓንቴ ታኣኒ ዔያቶ ፓሤሢ ዔሪባኣሴ።
4 ዓሲ ዓሲ ሚጪንታ ሚጪንቲሢና
ናሹሞ ካኒ ቢራታና
ታኣኒ ዔያቶ ጎቺ ዓርቄኔ፤
ዔያቶኮ ባቃና ዓኣ ቃንባሮ ዔኪ ሺኢሺ
ታኣኒ ታኣሮ ሂርኪ ጌይ ዔያቶ ሙኡዜኔ።»
5 «ዔያታ ጋዓንቴ ታ ባንሢ ማዖ ዒፄሢሮ ጊብፄ ዓጮ ማዒ ዴንዳኔ፤ ዓሶኦሬ ካኣቲያ ዔያቶ ዎይሣያ ማዓንዳኔ።
6 ሞርኮኮ ዖሎ ዓሳ ካታሞ ዔያቶኮ ዖላንዳኔ፤ ካታሞ ጌሎ ካሮዋ ሜንሣንዳኔ፤ ዔያቶኮ ፑርቶ ዞርቲፃኣ ጉሪ ማዒ ዓታንዳኔ።
7 ታ ዴራ ታ ባንሢ ማዖ ባሺንቲ ላምዖ ጎይካ ዔቄኔ፤ ያዺ ማዔቴያ ዼኤፒ ማዔሢ ባንሢ ዔያታ ዒላታኔ፤ ጋዓንቴ ማሊፆ ፔቴይዳ ዔቂሴይ ዖኦኒያ ባኣሴ።»
8 «ዔፕሬኤሜ! ታ ኔና ዎዲ ሃሻንዳይ?
ዎይቲ ታኣኒ ኔና ዓኣሢ ሜሌም ዒንጋንዳይ?
ዓዳኣማና ፄቦይሜ ካታሞናይዳ ታኣኒ ማዼ ጎይፆ
ዎይቲ ታኣኒ ኔጊዳ ማዾንዶይ?
ታኣኒ ኔና ናሽካ ናሹማ ኮሺ ዼኤፒታሢሮ
ዬያ ቢያ ታ ማዻኒ ዳንዳዑዋሴ።
9 ታኣኒ ዒንሢ ባኣካ ዓኣ
ዱማዼ ፆኦሲ ማዓንዳኣፓዓቴም ዓሲቱዋሴ።
ዬያሮ ታኣኮ ባይዛ ዻጎ ታ ዒንሢዳ ኬይሳዓኬ፤
ላሚ ታኣኒ ዔፕሬኤሜ ባይዛዓኬ፤
ታ ዻጎና ታኣኒ ዒንሢ ባንሢ ዬዓዓኬ።
10 «ታኣኒ፥ ናንጊና ናንጋ ጎዳ ዔያቶ ዓውሳኒ ጉዻ ዞቢጉዲ ጉዻዛ ዔያታ ታ ጊንፆ ዬዓንዳኔ፤ ታኣኮ ናኣታ ጎጋይቂ ጎጋይቂ ዓባ ጌላ ባንፃፓ ዬዓንዳኔ።
11 ካፒጉዲ ጊብፄፓ፥ ዶኦሌጉዲ ዓሶኦሬፓ ባራኒ ባራኒ ዔያታ ዬዓንዳኔ፤ ቤርታ ዔያታ ናንጋ ኬኤፆ ማሂ ታኣኒ ዔያቶ ጌልዛንዳኔ፤ ዬያ ጋዓሢ ታና፥ ናንጊና ናንጋ ጎዳኬ።»
ፆኦሲ ፔ ዴሮይዳ ዓጌ ሜቶ
12 ናንጊና ናንጋ ጎዳ ሂዚ ጋዓኔ፦ «ዔፕሬኤሜ ሉኡዙሞና፥ ዒስራዔኤሌያ ጌሺሢና ታ ኮይሎ ማንጊ ዔቄኔ፤ ዪሁዳኣ ፆኦሲም ዓይሢንቱዋያ ዒዚ ጉሙርቃ፥ ዱማዼሢያ ማኪ ዒፃያ ማዔኔ።»