ማክቢቤ ማፃኣፖ
ዓይፆ ካሮ
ማክቢቤ ማፃኣፖይዳ ፃኣፒንቲ ዓኣሢ ዓሲ ናንጋ ዎዴ ቃሚሢ ማዔሢ ሌሊቱዋንቴ ኬስኪሢ ኬዲሢና ሜቶና ዺቤያ፥ ዎጌ ዎቢሢንታ ሂርጋንታ ኩሜያ ማዒፆ ዔሪፆይዳፓ ዔቄያና «ዓሲኮ ናንጊ ጉሪ ባኣዚኬ» ጌይ ኬኤዜ ፔቴ ዔሮ ዓሲስኬያኮ ማሊሢኬ። ዬይ ዓሢ ዓሲ ናንጊኮ ጋፒንሢ ዎማካታቴያ ዔሪ ዎይሣ ፆኦሲኮ ማሊፆ ዔራኒ ዳንዳዒባኣሴ፤ ያዺ ማዔያታቴያ ናንጊንታ ዎዶ ቢያና ዓሲም ዳንዳዒንታማጉዲ ዶዲ ማዺሢና ፆኦሲ ዒንጋ ባኮና ዎዛዻንዳያ ኮይሳሢ ዓሶ ዒ ዞራኔ።
ዬያ ዓሢኮ ማሊፆኮ ባሼሢ ዎሊና ካኣሙዋ ማሊሢ ዓኣያ፥ ጊንሣ ሃሣ ሃጊ ማዓ ዎዛ ቲቂሢ ማሊሢያ ኩሜያኬ፤ ያዺ ማዔታቴያ ሃና ማፃኣፔላ ጌኤዦ ማፃኣፖይዳ ዓኣያ ማዒፃ ጌኤዦ ማፃኣፖኮ ጎኑማ ሜሌ ዓታዛ ዬያ ዎሊና ካኣሙዋያ ማዔ ማሊፆንታ ሂርጎ ማሊፃ ኩሜ ማፃኣፖዋ ቃሲ ዓርቄያ ዳልጊ ማዔሢ ዔርዛኔ። ሃይ ማክቢቤ ማፃኣፓ ዓሲኮ ናንጊ ሌማሌኤሼጉዲ ዻዋሢሮ ሚርጌ ዓሲ ሃኖ ማፃኣፖፓ ዶዱሞ ዴንቄኔ፤ ዬያጉዲ ሃሣ ዬያ ማሊፆ ዔርዛ፥ ሃና ፔቴ ጌኤዦ ማፃኣፔላ ናንጊም ዼኤፒ ቤሲ ዒንጋ ፆኦሲዳ ሃጊ ማዓ ጉሙርቂሢ ጌሣኒ ዳንዳዓያ ማዒፆ ዞራያታሢ ዔያታ ዔሬኔ።
ማፃኣፔላ ዱማ ዱማ ዓርቄ ባኮ
ናንጊ ጌይሢ ዎዚ ጌይሢታቴያ (1፡1—2፡26)
ቢያ ባኣዚኮ ዎዴ ዓኣያ ማዔሢ (3፡1-8)
ናንጊ ቢያ ዎዴ ኮሺ ማዑዋታሢሮ ዔራቶና ናንጊሢ ዛላ (3፡9—6፡12)
ሼምፔ ዛላ ማሊሢ (7፡1—8፡17)
ሴካ ቤርቲም ዓይጌ ማዓንዳቴያ ዖኦኒያ ዔሩዋያ ማዔሢ (9፡1—11፡8)
ፆኦሲ ቦንቺሢና ዒዛም ዓይሢንቲሢ ዛላ (11፡9—12፡14)
1
ቢያ ባኣዚ ጉሪ ማዔሢ
1 ዬሩሳላሜይዳ ካኣታዼ፥ ዔራሢ፥ ዳውቴ ናኣዚ ኬኤዜ ዔራቶ ሃይሳ ያዺኬ፤
2 ዒዚ ሂዚ ጌዔኔ፦ ቢያ ባኣዚ ጉሪ፥ ጉሪፓኣ ጉሪ ባኣዚኬ፤ ቢያ ባኣዚ ጎኔና ጉሪኬ።
3 ዓሲ ናንጋ ዓጮይዳ ማዺ ላቢንታ ባኮኮ ዴንቆንዶ ባካ ዓይጎዳይ?
4 ፔ ዎዶና ዓኣ ዓሳ ጋፔም ሜሌ ዓሲ ቤዛ ኬስካኔ፤ ሳዓ ጋዓንቴ ላኣሚንቱዋዖ ናንጊና ዶዲ ናንጋኔ።
5 ዓቢ ኬስኪ ጌላኔ፤ ጊንሣ ሃሣ ኬስኬ ቤዞ ባንሢ ሄላኒ ሩኡራኔ።
6 ዢባሬ ሊካ፥ ጊንሣ ሃሣ ሌካ ዢባርሻኔ፤ ሺራኣ ሺራ ጊንሣ ማዓኔ።
7 ዎሮ ዋኣፃ ቢያ ባዞ ባንሢ ጎዓኔ፤ ባዛ ጋዓንቴ ኩሙዋኣሴ፤ ዋኣፃ ዓልቂ ኬስካ ቤዞ ጊንሣ ማዒ ዴንዳኔ።
8 ቢያ ባኣዚ ላቢሲ ሼሼናሳያኬ፤ ዬያ ሼናሲፆ ዓሲ ሃያኬ ጌይ ኬኤዚ ጋፒሳኒ ዳንዳዑዋያኬ፤ ዓኣፒ ዛጊ፥ ዋይዚያ ዋይዚ ታኣም ጊዴኔ ጎዑዋሴ።
9 ሚና ቤርታ ማዔ ባካ ጊንሣ ሺሪ ማዓኔ፤ ሃሢ ማዺንታ ባካ ቢያ ቤርታኣ ማዺንቴያ ዔርታ ባኣዚኬ፤ ዬያሮ ዓጪ ማዔ ካራናይዳ ቢያ ዓኪ ጌይንታ ባኣዚ ባኣሴ።
10 ዓይጎ ዓሲያኣ፦ «ሃይሾ ሃይ ዓኪ ባኣዚኬ!» ጌዔቴ ዬይ ባካ ኑ ሾይንታንዳሢኮ ቤርታ ዓኣያ ማዒ ዔርታያኬ።
11 ጊንሢም ዓኣዼ ዎዶይዳ ማዺንቴ ባኮ ቢያ ጶቂሢ ዔራይ ባኣሴ፤ ዬያቶ ሄሊ ጊንፆ ሙካ ባኮ ማዔቴያ ሙካ ዎዶይዳ ዓኣ ዓሶም ማላታ ማዓ ባኣዚ ባኣሴ።
ዔሮ ዓሢ ፔ ናንጎይዳፓ ዴንቄ ዔራቶ
12 ታኣኒ፥ ሃያ ሃይሶ ኬኤዛሢ ዬሩሳላሜይዳ ዴዒ ዒስራዔኤሌ ዓሶ ዎይሤ ካኣቲኬ፤
13 ጫሪንጮኮ ዴማ ማዺንቴ ባኮ ቢያ ኮሺ ዛጊ ዔራኒ ታኣኒ ማሌኔ፤ ሃያ ዴኤሢ ጫኣና ዓሲ ናይ ኬዲ ላቢንታንዳጉዲ ፆኦሲ ዔያቶም ዒንጌኔ።
14 ዓካሪ ሃያ ዓጮይዳ ማዺንቴ ባኮ ቢያ ታ ዛጌኔ፤ ጋዓንቴ ቢያ ባካ ጉሪ ማዔሢ ታ ዴንቄኔ፤ ቢያ ባካ ዢባሬ ኩቻ ዱኡሚ ዓርቃኒ ጌይሢጉዲኬ።
15 ዎቦ ባኣዚ ፒካኒ ዳንዳዑዋሴ፤ ባኣ ባኣዚያ ፓይዲንታኒ ዳንዳዑዋሴ።
16 ታኣኒ ታ ዒኖና፦ «ታኣኮ ቤርታ ዬሩሳላሜ ዎይሤዞንሢፓ ቢያ ባሼ ዼኤፒና ዔራ ዓሲያኣ ታ ማዔኔ፤ ዔራቶና ጪንጩሞና ዓይጎታቴያ ሚርጌና ታ ዛጌኔ» ጌዔኔ፤
17 ዔራቶና ጪንጩሞና፥ ጊንሣ ዣኣሹሞና ዔኤያቶና ዔራኒ ታኣኒ ታ ዒኖና ኮሺ ማሌኔ፤ ዬይያ፦ ዢባሬ ኩቻ ዱኡሚ ዓርቃኒ ማሊሢጉዴያ ማዔሢ ታ ዔሬኔ።
18 ጪንጩሞ ሚርጌ ዎዶና ማሊሢ ሚርጋኔ፤ ዔራቶ ሚርጋዛኣ ማሊ ሜታዺ ዺባኔ።