2
Nuquin Papa bëdamboen chianete chiaid
1 Tantia. Utsibotedi chuinu. Matses abitedi tantiaquin Nuquin Papa chianenuna. —Matses abitedi min Mado Esusbëdta mibi bëdamboen tantiamequin bëdamboen ista, Papa. Matses nashunquidquio yec mibi bëdamboshë iquec, Papa —quequin Nuquin Papa chianenuna.
2 Adembidi Nuquin Papa chuiquin: —Chuiquid dapambo pedesidente caidtedibëdta chuiquid dapa utsibotedi bëdamboen tantiameta, Papa. Adoac aidon bëdamboen namiac cuesun secananenquio yec matses abitedi bëdamboec tabadtsiash. Adnubi abi chieshënquido nibëdnuc Esus tantiaquido abi tantiec bëdambo ictsiash, Papa —quequin Nuquin Papa chianenuna.
3 —Con matses Esus tantiameta, Papa —quequin nuqui aden chianesho tantiash: —Bëdamboen chiec. Ëbi bunaidquio chiec —quendac Nuquin Papa nuqui cuidenquio icquin abëd tabadmequid.
4 Matses abitedimbo cuidenquio icnuen matses bëdamboen iste bunquid yec: —Ma ëmbi chiaid tantiashun abided cuidadec unësaid ma tantiapanu —quec Nuquin Papa.
5 Nuquin Papan chiaidquio tantiashun nuqui naden tantiec. —Nuquin Papa matses uaquid abentsëqui icnuc abipadquid utsi nibëdquiec. Abëd icboedi matsesun: “Nuquin Papapadquid icquin aid tantiamequid nebi,” quequin aton Madon matses chuipanëdash. Adecbidi aton Papa matses bëdamboen ismequid yampanëdash Esus. Aid abentsëqui Nuquin Papa bëdamboen ismequid nec.
6 Abi tantiaquid cuidmenquio icnuec abided cuidadec unëspac caondash —quequin chiaidquio nuqui tantiec. Nëbien Nuquin Papan tantiacpadomboen matsesën aden chiaidquio chuiben-chuibenec.
7 Adomboembidi Esus chuibenequidquio nebi. —Matses utsibo isadaidpembo ëbi chuibeneta —Esusën caondaid nebi. Adoaid icquin: —Ma Esus tantianu —quequin Nuquin Papan chiaidquio chuibenec nebi. Abimbo caimbi. Adquid nebi.
Esus tantiec cuëdënacnoshon nate chiaid
8 Tantia. Dadatedi chuinu. Cuëdënacno puduedshun Nuquin Papa chuinuec bëdamboequien tabadtiad. Nëish bëdanash chieshënanenquio icquimbien Nuquin Papa chuitiad.
9 Chidobotsen chuinu. Esus tantiec Esus tantiaquido cuëdënacno nidnuec: —Mabi isnu —quequin tantienquio yec bëdamboec dasiuidta. Bëdamboec tabadquid dasiuidacbimboec dasiuidta. Chido chishpidabimboec dasiuidenda. —Mabi isnu —quenquio yec Esusquio tantianuec Esus tantiaquido cuëdënacno puduedta.
10 —Mabi isnu —quequin tantienquio yec: —Nuquin Papa tantiaquidquio nebi —quec utsibo nashumbanec bëdamboec tabadta.
11 Esus tantiaquido cuëdënacnoshon dadan Nuquin Papan chiaid chuibansho tantiaquid chidon. —Aidën chiacpadomboen natiapimbo iquebi —quequin tantienquio yec bëdamboen tantiec otacquio tabadquid chido.
12 Esus tantiaquido cuëdënacno puduedshun dada chuibanesa chidon. Adembidi dada ancaisa chidon. —Otacquien tabadquid chido —caimbi.
13 Dada Adan caidba Nuquin Papan matses uapampic. Adshumbic aton chido Eba caidtsen.
14 Aden dadabëdta chido nacnenacsho isumbien Satanasën: —Icsamequin tanu —queshun muauac icsaquin chidomba Nuquin Papan chiaid niacpampic. Adan padabi. Aden tantiaquin: —Dadan chido chuibanquid —caimbi.
15 Adec abia icsasho isun Nuquin Papan cuidac paëmbo icnuc bacuë tishquid chido abitedi nec. Nëbi Esus tantiaquid yanash ambi tishaido bëdamboen namequid nendac. Esusën chiacpadomboen natiadquio icquin matses tantiaquid nendac. Nuquin Papan chiaid niaquenquio icquid nendac. Aton bënëuidtsëqui chudmequid yendac Esus tantiaquid chidon. Adquid Nuquin Papan bëdamboen isquin abëdi tabadmendac.