20
Satanas uidën uaid
1 Adshumbic padpiden ismeoaposhi. Adoac mayan bëda utsi Nuquin Papa tabadacnuësh budsho ispombi. Podobitsi icsabo Satanasën yuabo shëcuën tabadacno bëtashaid chictebëdta shocosh bucubimboecnuc nacnenaid dapa sanamposh.
2 Adshumbic Eba icsamenuec nisipampid Satanasquio bedposh. Bedtanquimbic shocosh bucubimboecnuc nacnenaidën ambi sanamboedën uidën uaposh.
3 Uidën uatanquimbic aton yuabo uidën uacno shëcuë aneposh. Adotanquimbic shëcuë bëtashquioposh puduentiapimbo icnuc. Seta dadpenquio 1000tedi matameshun bëtashte chicshun Satanas cuemenuen adoposh. —Aden seta 1000tedi matamiabi icquin abi uidën uactedembi matses muauaquin icsametiapimbo iquec —queshun chicten bidiacquin uidën uaquioposh. Aden ismeposhi.
4 Adshumbic utsitsen ismeoaposhi. Adoac chuiquidën tsadten icbo-icboec chuiquid dapabo tabadsho ispombi. Esus tantiaquido neposh. Aido Nuquin Papan icmiacpadquid abimbo chuiquido icquin Esusbëdtambi matsesën naid abimbo chuibamposh. Aden matses bëdamboen nameposh. Satanas uidën uacpadembi seta 1000tedi matamequin adoposh. Aido utsi-utsien mapi butiaido uincuemiaido neposh. Aido Esus tantiaquin acte uquëducuësh choboed chuiquid dapabëdta abibimboecnuc nacnenaid tantiapimbo icquido neposh. Adecbidi: —Aidën yua nebi —quec aid chuiquid icsamboshë icquid cuëmëdquid dada uadec bësiadtiapimbo icquido niosh. Utsibic mësiadtiapimbo icquido niosh. Adquido icsho icsamboshë icquidon cuesun secaido niosh. Aido Nuquin Papan uincuemiac tabadposh.
5 Unësaidotedi uincuemiambo icposh. Nuquin Papan ambi tantiactedi tauaquin uincuemeposh. —Seta 1000tedi matameshun utsibo abitedi uincuemendambi —quequin adoposh.
6 Adnubien tauaquin uincuemiaido bëdambo yec cuishonqueposh: —Padpidec unëstiapimbo iquebi —quiash. —Adquid icquin Nuquin Papan yuabo yec: “ ‘Esusbëd Nuquin Papa bëdamboshë iquec,’ canuna,” quequin chianequid nendac. Aid seta 1000tedi matamequin Esusbëdtambi utsibo bëdamboen namequid nendac —quequin aden ismeposhi.
Satanasquio chian anëdënquequid nëniaid
7 Adshumbic aidtedquio seta 1000tedi matameshun uidën uaid chicquin Satanas cuemendac.
8 Adoaquien matses icsamenuec muaquin chiec nidaid utsi-utsiec yacno nidendac. Aden aidën muaquin namiaquien matses dadpenquio Esus chedo cuesun sianuec tsidadendac. Nëidic nidaid Coc caid yacnocquido. Nëidic nidaid utsi Macoc caid yacnocquido. Nëidic matses utsibo abitedi cuëte podotedi dadpenquioshë.
9 Aidtedi tsidadash cho-choash Esus tantiaquido tabadacnombo Nuquin Papan tantiacnobi Edusaden yacno daquiadshun cuesun secatiadpambo iquendac. Adshobien Nuquin Papan nëdënquepamboecquid budmequin uesquin pichicaindac.
10 Adshumbic aido icsa uamequidtsen Satanasquio bedshun acte uquëducuësh chondaid chuiquid icsamboshë icquidbëdta nidaid shëcuënuësh chondaid ënden nësecaondacnombo chian anëdënquequid Satanastsen nënendac. Adoac aido ënëdenquio yec natiamboshë iquendac. Aden ismeposhi.
Icsambo icquido cuidte chiaid
11 Adshumbic padpiden Nuquin Papan matses cuidte ismeposhi. Adoac tsadte nuacquid dapan ushumboshë icquidën Nuquin Papa tsadsho ispombi. —Icsaisambo icquin matsesën naidtedi chuibanquin Nuquin Papan icsambo icquido cuidendac —camenuec adec tsadposh. Icsambo icquido cuidquidquio yec dacuëdampamboecshë Nuquin Papa isadnuc abubëdi nidaid abichobi nibëdanaccosh padpidec isadtiapimbo yec.
12 Nuquin Papa yacno unësaido uincuemiaido abitedimbo tabadposh. Adnubien bëshunenquio icquin dada uaten dada uabanacbimboen Nuquin Papan abitedi tantiaquid icquin matsesën naidtedi abimbo chuibamposh cuidnumbi. Abi tantiaquido abëdi tabadmequimbi abi tantiesabo comapenen cuidnun aden chuibamposh.
13 Unësaido abitedi icposh. Utsi-utsiec unësacsho chian dapa mad caid nëniaido uincuemiaido niosh. Utsi-utsiec nidaidën chococaid uincuemiaido niosh. Adsho aidon naidtedi Nuquin Papan chuibamposh.
14-15 Adshumbic Esus tantiesabo icsho documento nibëdquidbimboecsho abi yacno tabadmenquio icquin chian dapa anëdënquequid uesquin nësecabamposh. Aden Esus tantiesabo nësecan unëstequido utsibo nibëdposh. Esus tantiesabo aton dada unësan abi tantiate tabadacno utsibo tabadenquio icposh. Adnubien Esus tantiaquido Nuquin Papa yacno tabadec unëstiapimbo icquidouidquio icposh. —Adquid iquendac —quequin aden ismeposhi.