11
Jesús Jerusalén pushurasi ano nocotoshiniquin
Mt 21.1-11; Lc 19.28-40; Jn 12.12-19
1 Ascatan Jesús fu focani Jerusalén chaima noconifo. Nannori chaima pushurasi futsan ahuun anu Betfagé. Nan pushurasi rafu machi cuya ahuun anu Olivo ano inifo. Noco cuatan Jesús afu rafuafo rafu ano ato nichini.
2 Ato yoini, —Nan pushurasi chaima sharaqui fotacahuun. Nocoshon man inapan facu nushua man oincai. Tsoacai na burro camaqui caiyomisima. Tupushon nuri ua ihuunshotacahuun.
3 Ascan ratoran futsan mato yocaiton, “¿Ahuuscaquin man muropan facu man iyoimun?” ishon mato yocaiton. “Nocon Ifo yopaiton non iyoshoni cairan,” ishon ato yoicahuun, —Jesús ato yoini.
4-5 Ato nichian focatan pushu caicainti ano muropan facu nushua fuchitoshinifo. Man tupuaifoan nannoa niafoan ato yocani, —¿Ahuuscaquin man burro cahuashara tupuimun? —huaifoan.
6 Jesús ato yoia cuscan cumacaquin, —Nocon Ifo yopaiton non tupuyoaran, —huanifo. Ascaiton, —Iyotacahuun, —ato huani.
7 Ascano Jesús ano ihuushontan camisa muropan catu camaqui fucashonifo. Fucashonafoanno acamaqui Jesús tsaoinacahuani.
8 Jerusalén ano caino yorahuanrasifoan fai naman cayan afoforin aton camisafo fucanifo. Futsafoan shupa shatushon nan cai fufori nichiacunifo.
9-10 Ascan nan yorahuanrasi afofori yafi acachori foaifoan nantififain oi ashcafinin curushcai yoinifo,
¡Aicho! Noco numai oiquin. Upa Diosin Jesusqui unimai. Ascan nocon Ifon Dioshuunoashu nocoqui oa. Nocon shuni David nantifi yorafoan aton niaifo cuscara. Arifi nocon niaifo ishquin oa. ¡Aicho! Nocon niaifo shara nantifi iquinaran
ishon oi ashcafinin yoinifo.
11 Ascatan Jesús Jerusalén ano nocotan Dios fu tsainti pushu muran iquitoshini. Amuran nantifi ato oian. Man yataino. Afu rafumisifo doce fu Betania ano fonifo nanno oshashquin.
Fana higuera Jesús tsasi huani
Mt 21.18-19
12 Iyoconaino Betania anoashu Jerusalén ano fonainquin naso curanquin.
13 Oian chaima fana ahuun anu higuera nia fuchini. Fuchishon ahuun fimi apaiquin oian ahuun puifosi. Fimiama ini. Fimitiataima.
14 Ascaiton yoini, —Afanan min fimimaran, —ishon Jesús yoini. Yoiai cuscan a rafuafoan nicanifo.
Jesús Dios fu tsainti pushu murannoashu inanmitsaifoan ato potani
Mt 21.12-17; Lc 19.45-48; Jn 2.13-22
15 Ascano afanan Jerusalén anoashu cai Jesús Israelifoan Dios fu tsainti pushu muran iquitoshini. Iquitoshiquin oian ahuarafo a murannoashu inanmitsaifoan. Fuchitan ato chifi cainmaquin futsani. Pui fiainfoan aton acamaquishon pui fitiri finifoan arasacaquin futsani. A ruhui inanmitsaifori aton tsaotiri finifoan arasacaquin futsani.
16 —Na Dios fu tsainti pushu murannoashucai non ahuara inanmitsatiromaran, —ishon tsain curushcain ato yononi.
17 Ato tapimaquin yoini,
—Diospan tsainhuunoa isca huaquin cununi. “Uhuun tsainti pushu muranshon nantifi manifoti iquitiro ua cufishcaquin,” ishon cunufianicun yomutsofoan ichananti cuscara man huapairan, —ishon ato yoini.
18 Ascan Israelifoan aton yorafohuunshon Dios cufimisi niaifofo non Moisés cununi cuscan tapimamisifo Jesús yoiaiton nicacaquin rutupainifo. Ascaiton futsafoan Jesús yoiai cuscan nicapaicoinnifo. Ahuun tsain nicai, —¡Aira! Ascaran tsain shara tsoan nicayomisimaran, —icashu yoinannifo. Ascano aton niaifofo Jesusqui ratunifo. Rutupaifiaquicai tapinifoma ahuuscashomain rututirofoquin.
19 Ascatan man fari caino Jesús yafi a rafuafo Jerusalén murannoashu patashari fonifo.
Fana higuera tsasi futsua
Mt 21.20-22
20 Ascano iyoco futsaino afanan nasoquin fana higuera fuchitoshinifo. Man tsasi futsua. Ahuun tapofori man naa.
21 Oinquin Jesús higuera yoita cuscan Pedronun shinanquin yoini, —Tapimamisiton, oinpon. Na fana higuera min yoitan cuscan man tsasiaran, —ishon yoiaiton.
22 —Upa Dios icoinra huacahuun.
23 Un mato icon yoinon. Maton nomuran man icoinra huacoinshon na machi man isca huatiro, “Tsucucain. Unuhuan muran pacuhuu,” man huaino man yoia cuscan asca huariscatiro.
24 Ascacun un afanan mato yoinon. Man icoinra huacoinshon ahuarashta man yocaiton Upa Diosin mato inantiro. Matonna inon.
25-26 Ascano man Upa Dios cufipaiquin iquisi futsan mia chaca huaa cuscan rau huayohuun. Man ascaiton Upa Diosiri maton chaca rauhuatiro. Ascan man Upa Dios nai murannoa man cufiai cuscan mato ashotiroran, —ishon Jesús ato yoini.
—¿Tsoanmun mia yonoaquin? —ishon niaifofoan Jesús yocani
Mt 21.23-27; Lc 20.1-8
27 Ascano afanan Jerusalén ano nococatan Jesús Israelifoan aton Dios fu tsainti pushu muran caino. Yorahuunshon Dios cufimisi yafi Moisés cununi cuscan tapimamisifo fu Dios fu tsainti pushu cushumisifo aqui funifo.
28 Aqui fucashon yocanifo, —¿Min acai cuscan tsoan mia yonoamun? Min inanmitsamisifo nocon ichananti pushu muranshon min ato pota. ¿Tsoan mia yonoamun min ato asca huaa? —ishon yocaifoan.
29-30 —Urifi un mato ahuara yocain. ¿Juanpan yorafo unu muran iquimapacuniquin tsoan yonocumun? ¿Diosin yonoyamaraquin nocofunufoan yonoafomun huani? Man ua cumasharaiton urifi un mato cumasharatiroquin, —ishon yoiaiton.
31 Jesús yoia cuscan nicacani yoinanannifo. —Diosin Juan nichiaran non huaiton Jesús noco yoishquin, “¿Ascan ahuuscaquin man Juan icoinra huamamun?” ishon noco yoitiro.
32 Ascafia Juan nocofunufoan nichini Diosincai nichinima ishon yoiaiton yorafo nocoqui sinatirofo. “Juanpan Diosin tsain yoimisiran,” ishon yoiaiton noco asca huatiroran, —icashu niaifofo yoinannifo.
33 Ascashon yoinifo, —Tsoanmain Juan yonoaquin noncai tapiama. Non mia yoipanan, —ishon Jesús huaifoan. —Ascarifiatan un acai cuscamain tsoan ua yonoaquin uncai mato yoima, —ato huani.