3
Tepad te menge egpengibing te simbahan
1 Benal se eg-ikegiyen seini. Aw meibeg se otaw meinang egpengibing te simbahan, ontò mèpiya se egkeibegan din.
2 Se otaw inangen egpengibing te simbahan, keilangan wedad palos isila kandin. Keilangan sebad olò se esawa din aw kenà eglakad. Keilangan biyasa sikandin memallì te metòlid inangen din. Keilangan tikbel sikandin. Keilangan besahan sikandin te menge doma otaw. Keilangan megsagman sikandin te menge otaw gomemaw kandin. Keilangan biyasa sikandin megtoladà.
3 Eked kepakay aw eglasing, aw egbolaw, meneng keilangan mèpiya se pedowan din diyà te doma otaw. Eked kepakay aw egdindil aw egpengewarta.
4 Keilangan mèpiya se pegpengibing din te esawa din aw menge batà din. Keilangan tomolò se menge batà din kandin, aw keilangan gayed dan egsagman kandin.
5 Aw wedad toig te otaw mengibing te esawa din aw menge batà din, eked heman sikandin pekebatog mengibing te menge otaw egsimba te Timanem.
6 Eked heman kepakay aw inangen egpengibing te simbahan se otaw kaling nemenal ki Cristo, so megpelangkaw-langkaw besi sikandin aw yan ipelumun te Timanem iling ki Satanas.
7 Keilangan mèpiya se eg-inangen din amon segmanen sikandin te menge otaw kenà egpemenal, so aw pemellien se otaw kenà egsegmanen, mekeyèyaay besi sikandin aw keekalan i Satanas.
Tepad te menge doma opisyal te simbahan
8 Iling heman kenyan, keilangan metinuud se menge doma opisyal te simbahan. Keilangan keseligan se kagi dan. Eked kepakay aw metilasing dan aw mengewarta dan.
9 Keilangan metibok se pegpemenal dan so eked kepakay aw egdowa-dowa se aneng-aneng dan tepad te kebenalan impetaga-taga te Timanem kenitadon.
10 Eked inangi se otaw opisyal te simbahan singed aw kitaen niyo se eg-inangen dan. Penga niyan, aw wedad medaet ketegahan niyo, mepakay dan inangen menge opisyal te simbahan.
11 Keilangan metinuud heman se esawa dan. Eked kepakay aw egbaet-baet dan. Keilangan biyasa dan memallì te metòlid inangen dan. Keilangan keseligan dan te pengkey eden se eg-inangen dan.
12 Se otaw inangen opisyal te simbahan, keilangan sebad olò heman se esawa din aw kenà eglakad. Keilangan mèpiya se pegpengibing din te esawa din aw menge batà din.
13 Aw mèpiya se eg-inangen te menge opisyal te simbahan, besahan dan te menge doma otaw, aw yan eked dan keyàyà te pegtoladà dan tepad te pegpemenal ki Jesu Cristo.
Kebenalan impetaga-taga te Timanem
14 Pegsolat ko kani kamno, doen ibeg ko lomaoy a doton kamno te eked kenamay.
15 Meneng aw meanggà a, pineokit te solat ko seini, ketegahan no aw eden se mèpiya inangen tadon menge batà te Timanem. Sikitadon se otaw egsimba te Timanem wedad temanan din. Iling kidon te tollok te balay din, so sikitadon se sineligan din te kebenalan.
16 Netegahan te kedita tadon te ontò mèpiya se kebenalan impetaga-taga te Timanem aw pinemenalan tadon.
Migpekeotaw si Jesu Cristo aw dimini te tanà.
Impetaga-taga te Espiritu Santo te metòlid sikandin.
Kinità sikandin te menge anghil.
Inindanan se menge otaw kenà Judiyo tepad kandin.
Doen otaw nemenal kandin doton te kebelad te tanà.
Inengat sikandin doton te langit.