2
Ke Impemandù ni Pablo Ki Tito
1 Ugaid ne sikuna, Tito, ne iyan nu rà ipenurù ne ke titay batang dà dut te benar ne penurù te Eleteala.
2 Igkahi nu rut te menge lukes ne meama ne ed-erangan dà te ed-ul-ulaan dan, ne ed-ulaula te endei se egkeedatan dan wey med-eren dan te kiyug te lawa ran. Ne mebmetidtu se kebperetiyaya ran te Eleteala, medlimù dan te menge etew, ne mebpekeantus dan se edtigker te kemerehenan.
3 Engketà ded maa ke kebpenurù nu rut te lukes ne memeritan te iyan dan ul-ulaa ne ebpekesuhat te hinawa te Eleteala. Kenà dan medseserupet, kenà dan med-inum te ebpeketevereg. Iyan pà mulà se mebpenurù dan te meupiya ne ulaula
4 su apey imbe ini se egehuruwan dut te menge menguwed pà ne memeritan te kedlimù te esawa ran wey menge anak dan.
5 Ebpemenduan dan dema ke menge menguwed pà ne memeritan te med-eren dan te kiyug dan dut te itungan wey lawa ran. Ne iyan dan dà edurungulan ne kedtuganur te baley ran wey meadat te esawa ran wey ke lalag te esawa ran ne ebpeminehen dan. Su embiya ini se ed-ul-ulaan dan ne kenà egkesumpalit ke lalag te Eleteala.
6 Engketà ded dema ke kebpenurù nu te menge kenakan te med-eren dan te kiyug te itungan wey lawa ran.
7 Ne sikuna imbe, Tito, ne ipekita nu se meupiya ne ulaula nu ne egketularan su sikuna se egkeiringan dan. Ne embiya ebpenurù ka, ne tidtu te hinawa nu te kebpenurù su apey ran egkekita se tidtu se keykew ne peretiyaya.
8 Ne uram ka te kebpengahikahi nu ne egenat dut te tidtu ne peretiyaya ta su apey kenà egkesewayan. Su embiya ini se ed-ul-ulaan nu, ne egkeyeyaan ke kunterà nu ne ebpekeawà su warà ma idsawey ran dut te penurù ta.
9 Ne ke menge sugsugsuhuen ne mibperetiyaya en, ne igkahi nu kandan te mebperumruma ran dut te langun ne suhùsuhù kandan su apey ini se ebpengemuney kandan ne egkesuat. Kenà dan mebpenumpan,
10 kenà dan mebpemenakew, ugaid ne layun dan mebpekita te langun ne ulaula ran ne egkeserihan. Su embiya iring ketà ne langun ne ed-ul-ulaan dan ne meupiya, ne ed-iseg se kegkeinesa rut te menge etew kayi te tidtu ne penurù te Eleteala ne ebpeliyu kenitew.
11 Su impekita en kenitew te Eleteala ke tavang din su apey langun te menge etew ne ebpekeliyu dut te kedusa te salà dan.
12 Ne ini se tavang ne impekita te Eleteala kenitew se mibpenurù en kenitew te ed-engkeran ke ulaula ne kenà ebpekesuhat te hinawa rin, abpeg ke langun ne kiyug te lawa tew kayi te ampew te dunya. Ne ed-erenen tew ke kiyug te itungan wey lawa tew su apey langun ne ulaula tew taman te kayi ki pà te ampew te dunya ne metidtu wey ebpekesuhat te hinawa te Eleteala.
13 Ini rà be se ed-ul-ulaan tew te kedtahad tew ketà te meupiya ne Hewii ne ebpenerengen tew ne egkekita ta ke ed-andlag ne raman din dut te kedlived te Eleteala ne mekegehem ne si Hisu Kristu ke ebpeliyu kenitew.
14 Ne imbeliwas din ke lawa rin ketà te kinepatey rin su apey mekeliyu kiyu te kinekeuripen te salà tew wey apey ebmetilak ke hinawa tew. Ne insivey ki nikandin ne kandin ne sakup ne mibehayan ki nikandin te kiyug te ed-ulaula te meupiya.
15 Ne ini imbe iya te migkahi ku, Tito, se ibpenurù nu te menge etew keniyan. Begeta nu sikandan ne kenà ka alang-alang ne ebangan te ulaula ran ne meraat, su ruen ketengdanan ne imbehey kenikew te Eleteala. Kenà meupiya ne egkesudian ka te menge etew.