18
Mid-insà ki Hisus ke Menge Edumdumaan Din ke Engkey se Mepurù Diyà te Menge Etew ne Edetuan te Eleteala
(Marcos 9:33-37; Lucas 9:46-48)
1 Ketà ne hewii ne mid-uvey ki Hisus ke menge edumdumaan din se egkahi te, “Engkey se mepurù diyà te menge etew ne Edetuan te Eleteala riyà te langit?”
2 Ketà ne mid-umew si Hisus te senge etew ne vatà ne impeitindeg din kayi te etuvangan dan
3 ne migkahi te, “Tentenuri niyu ini embiya kenà kew edsambì te itungan niyu iring te itungan kayi te vatà ini ne kenà ebpegitung te kebmepurù din, ne kenà kew ebpekelusud dut te menge etew ne Edetuan te Eleteala.
4 Su ke etew ne mepurù diyà te Edetuan te Eleteala ne sikandin ke mepeembavà se hinawa rin iring kayi te vatà.
5 Su misan engkey ne etew ne edtelimà te kevevaan en ne etew iring kayi te vatà su atag te keduma rin kediey ne iring te siaken se midtelimà din.”
Ke Ebpeneheewit Keytew te Ebaal te Meraat
(Marcos 9:42-48; Lucas 17:1-2)
6 “Ne mekeatag be te ini se menge vatà ne mibperetiyaya kediey,” ke si Hisus, “ne embiya ruen etew ne ebpekevelavag dut te sarig te vatà ne iring kayi ne iyan pà meupiya ne ebperiwetuwan ke lieg din te mevehat ne batu ne id-antug diyà te rahat tumin dè be ke egkevelevahan ke sarig te vatà kediey.
7 Keyru nevenar te menge etew kayi te ampew te dunya su ruen kebpenggeram kandan te ebpekedsalà. Kenà egkepakey ne kenà egkeuma ini se kebpenggerami te menge etew, ugaid ne ke etew ne ebpenggeram te ruma rin su apey ebpekedsalà ne mekeyruwiru nevenar!
8 “Embiya iyan ebpekepeneheewit keykew te kebpekedsalà nu ke belad nu etawa paa nu, ne tempera nu ne itimbag nu! Su iyan pà tumù ne egkesarir ka tumin dè be ke deruwa red ke velad nu wey paa nu ne igkeantug ka diyà te apuy nerakà.
9 Ne embiya iyan ebpekepeneheewit keykew te kebpekedsalà nu ke mata nu, ne lesika nu ne itimbag! Su iyan pà tumù ne dibdivaluy se mata nu tumin dè be ke deruwa red ke mata nu ne igkeantug ka riyà te apuy nerakà.”
Ke Sempità ni Hisus Mekeatag te Bilibili ne Nelaag ne Netuen Ded ne Impeiring Din Dut te Etew ne Mibpedsendit te Salà Din
(Lucas 15:3-7)
10 “Urami niyu,” ke si Hisus, “te kenà kew edsudì kayi te eduma kediey ne iring te vatà se kedsarig dan. Su ke menge suluhuen ne ebantey kandan ne layun diyà te etuvangan te Eleteala ne Amey ku diyà te langit. [
11 Su mibpengkayi te ampew te dunya ke Impeanak te Menusiyà su apey ebpeliyu te menusiyà ne nelaag.]
12 “Engkey se pegitungan niyu ne ed-ul-ulaan te senge etew ne ruen mehatus ne bilibili rin ne seveka se nelaag? Ini imbe se ed-ul-ulaan din, ed-ewaan din arà te siyew nepulù wey siyew ne ebpemenabtab su ebpenuntulen din arà se seveka ne nelaag taman te egketuen din.
13 Igkahi ku keniyu,” ke si Hisus, “te embiya egketuen din en arà se nelaag ne dekelà pà se kegkehalew rin kayi te seveka ne netuen din dut te siyew nepulù wey siyew ne warà nelaag.
14 Ne engketà ded dema ke Amey tew ne Eleteala su kenà din egkiyuhan ne misan seveka dut te mibpesakup kandin ne egkelaag.”
Ke Penurù ni Hisus Mekeatag te Kebpesahad te Salà te Menge Ruma Ta
15 “Embiya ruen duma nu ne nekedsalà kenikew,” ke si Hisus, “ne pendiyà ka te kandin ne kehiya nu ke salà din te deruwa kew rà. Embiya ebpevenar sikandin ne netevangan nu sikandin su ebpeked-uliey kew te meupiya ne itungan.
16 Ugaid ne embiya kenà ebpehimbenar sikandin, ne kuwa ka te senge etew etawa deruwa ne etew ne ebpeketitihus te kebitiyara niyu apey niyu egkerumai ke impesurat ne Lalag te Eleteala.
17 Ne embiya kenà sikandin ebpemineg kandan, ne peketueni nu en dut te langun ne egkevurun ne ebperetiyaya te Eleteala. Ne embiya kenà sikandin ebpemineg kandan, ne iringa niyu en sikandin te kenà niyu ruma te ebperetiyaya te Eleteala etawa iringa niyu en sikandin dut te tenlimbungen ne ebpevayad te buwis.
18 “Tembù be igkahi ku ini keniyu,” ke si Hisus, “te ini se idawey nu kayi te kelibutan ne arà se indawey en dema te Eleteala riyà te langit. Engketà ded dema arà se idtuhut niyu kayi te kelibutan ne arà ke intuhut en dema te Eleteala riyà te langit.
19 “Ne igkahi ku maa keniyu: embiya duen deruwa keniyu kayi te ampew te dunya ne egkeseveka ne ebpemuyù te Eleteala te misan engkey en, ne ibehey kandan dut te Amey ku ne Eleteala riyà te langit.
20 Su embiya ruen deruwa etawa tetelu ne etew ne egkevurun su atag dut te kedsarig dan kediey, ne ketà a red dema te kandan.”
Ke Sempità ni Hisus Mekeatag te Edsugsuhuen ne Warà Mibpesahad te Ruma Rin
21 Ketà ne mid-uvey si Pedro ki Hisus ne mid-insà te, “Kerenan, kepipira a ebpesahad ke ebpekesalà ke ruma ku kediey? Maa, kepipitu rè be?”
22 “Kenà kepipitu rà,” ke si Hisus, “su egngivuwan.
23 Su ke Kedatù te Eleteala dut te menge etew ne ebpekeiring kayi. Duen senge etew ne datù ne ebpevayad en te menge utang kandin dut te menge edsugsuhuen din.
24 Guna su nekerudsù en se ebpevayad, ne ruen senge etew kandan ne mid-ewit kayi te ratù ne nekeutang kandin te egngivungivuwan ne pirak.
25 Tehaad te kenà sikandin ebpekevayad, ne migkahi en dut te datù te ibpepasa sikandin, iring te uripen abpeg ke esawa rin wey menge anak din wey ke langun taman ne kearen din, su apey mevayari ke utang din.
26 “Ne midlumpeng sikandin kayi te etuvangan dut te datù se ebpemuyù te, ‘Kenà e pà nikuna sesawi su edlahud e pà,’ ke sikandin, ‘ne ebayaran ku sikuna te langun.’
27 Ne neyruwan sikandin dut te datù, ne warà din en peveyari ke utang din ne pineulì din en sikandin.
28 “Guna su mid-ipanew en ini se edsugsuhuen ne nesinuhung din en ke ruma rin te edsugsuhuen ne nekeutang kandin te deisek dà. Ne migeweran din en su ebpekelen din en se egkahi te, ‘Beyari nu en ke utang nu kediey!’
29 “Ne midlumpeng en ini se duma rin te edsugsuhuen se ebpemuyù te, ‘Kenà e pà nikuna sesawi su edlahud e pà,’ ke sikandin, ‘ne ebayaran ku sikuna te langun.’
30 “Ugaid ne warà migkiyug, nasì pà te impevilanggù din ne kenà sikandin ebpekelihawang taman te kenà din egkevayaran ke langun ne utang din.
31 Guna su nekita ini dut te ruma pà ne edsugsuhuen ne nengeepes dan ne mibpendiyà dan en te datù ne intarem dan ke langun.
32 “Ne impetawag sikandin dut te datù ne migkehiyan din te, ‘Warà rantek nu ne edsugsuhuen! Warà ku en pevayari keykew su in-awà ku en te itungan ku ke langun ne utang nu kediey su atag dà dut te mibpemuyù ka kediey.
33 Ne meambe ke warà ka meyru dut te ruma nu ne edsugsuhuen te iring dut te kinekeyru ku keykew?’
34 Neepes nevenar ke datù ne impevilanggù din en ini se edsugsuhuen ne kenà ebpekelihawang sikandin taman te kenà ebpekevayad te langun ne utang din.
35 “Ne engketà imbe rema,” ke si Hisus, “ke ed-ul-ulaan keniyu dut te Amey ku ne diyà te langit ke kenà niyu ebpeseharen ke menge ruma niyu se edlipatan en ke meraat ne mid-ulaula ran keniyu su iawà niyu en iya te pegitungan niyu.”