7
Ini ke menge Suhù mekeatag te Ked-esawa
1 Na guntaan, menge suled, ini se egkehiyen ku en mekeatag te ked-insà niyu te ked-esawa dut te surat niyu kedì. Embiya ruen etew ne kenà ed-esawa, ne meupiya rema arà.
2 Ugaid geina te ruen merakel ne menge etew ne ebpengingniyug, ne iyan tumù ne ke meama ne ruen kandin ne esawa, wey ke meritan ne ruen esawa rin dema.
3 Ne ke teled-esawa, ne iyan iya se edtumanen dan ke kedtiwelayà dan.
4 Su ke meritan ne ed-esawa, ne kenà sikandin dà se kemuney te lawa rin su elin ke esawa rin. Ne iring ded dema ketà ke meama, kenà sikandin dà se kemuney te lawa rin su elin ke esawa rin.
5 Tembù be sikiyu ne neked-esawa en, ne kenà nu id-engkenà ke lawa nu rut te esawa nu, liyu ke ruen hewii ne egkeupekatan niyu te kebpengeningeni su apey warà sanggel din te kebpengeningeni niyu. Ne embiya egkeipus arà se hewii, ne lived kew manen dut te kedtiwelayà niyu te esawa nu su apey kenà kew egkegaga dut te penggeram ni Setanas ke datù te pekaid te edlangkadlangkad ka su kenà ka ebpeketigker dut te kiyug te lawa nu.
6 Ini se migkahi ku keniyu, ne kenà ku suhù ini se ked-esawa niyu ugaid ne mehepemandù ku rà.
7 Embiya egkepakey, ne iyan ku egkiyuhan ne ebpekeiring kew kedì te kenà ebpengesawa. Ugaid ne netuenan ku te warà pemed-iringa te Eleteala ke langun tew, su mibehayan din ke senge etew te ketigker te kenà ked-esawa, ne keseveka ne senge bias dema se imbehey rin.
8 Na sikiyu se menge kenakan wey menge raha wey menge valu, iyan pà meupiya ke kayi kew ed-iring te kedì te warà med-esawa.
9 Ugaid embiya kenà niyu egketigkeran ke kiyug te lawa niyu, ne iyan pà tumù se ed-esawa kew. Su iyan pà meupiya se ruen esawa niyu tumin dè be ke kenà kew ebpeketigker dut te kiyug te lawa niyu.
10 Na sikiyu ke menge nekeesawa en, ne ruen egkehiyen ku keniyu. Ini ne kenà kayi ebpuun te kedì, ugaid ne riyà ebpuun te ki Hisu Kristu ke Kerenan tew su sikandin se migkahi te: ke meritan ne kenà ebpekibelag te esawa rin.
11 Ugaid ne embiya ebpekibelag sikandin, ne kenà en egkepakey ne edsaup pà sikandin te ed-esawa. Su egkepakey rà ne ebpekid-ulì sikandin dut te esawa rin ded. Ne ke meama ne kenà ded dema ebpekibelag dut te esawa rin.
12 Ne sikiyu ke menge ruma, ne ruen egkehiyen ku keniyu (siaken se migkahi ini, kenà si Hisu Kristu ke Kerenan tew). Ini se egkehiyen ku keniyu, embiya ruen meama ne mibperetiyaya ki Hisus ugaid ne ke esawa rin ne warà mebperetiyaya, embiya ebpekesuhat se hinawa kayi te meritan ne kenà din belahi, ne kenà egkepakey ne ebpekibelag ke meama dut te esawa rin.
13 Ne engketà ded dema ke meritan ne mibperetiyaya ki Hisus ugaid ke esawa rin ne warà mebperetiyaya, embiya ebpekesuhat se hinawa kayi te meama ne kenà din belahi, ne kenà egkepakey ne ebpekibelag ke meritan dut te esawa rin.
14 Sikiyu ne mibperetiyaya ki Hisu Kristu ne ruen esawa niyu ne warà pà mebperetiyaya ki Hisus, ne riyà te etuvangan te Eleteala ne metilak se kebpekeesawa niyu su sabap te kebperetiyaya nu ki Hisus. Engketà ded dema ke menge anak niyu riyà te etuvangan te Eleteala, su embiya ve kenà metilak se kebpekeesawa niyu riyà te etuvangan te Eleteala ne ke menge anak niyu ne kenà metilak diyà te etuvangan din su iyan dan egkeiringan ne anak dut te warà pà mebperetiyaya te Eleteala.
15 Ugaid ne embiya ruen esawa ne warà mebperetiyaya ne egkiyug ne ebpekibelag dut te esawa rin ne mibperetiyaya, ne ruma ke en dut te kiyug din. Ne kenà egkevaluy ne salà nu se keduma nu ketà su riyà ebpuun te kandin. Su iyan kiyug te Eleteala ne ke telteled-esawa ne melintad se ked-ubpà dan.
16 Su iyan ta keduma rut te kiyug te esawa ta ne warà mebperetiyaya ne ebpekibelag, su misan kenà ki edtuhut ne kenà ta egketuenan ke egkepeneheewita sikandin dut te kebperetiyaya ta ki Hisu Kristu etawa kenà.
17 Ne misan engkey se ketau ne imbehey te Eleteala te uman senge etew keytew te warà kiyu pà mebperetiyaya, ne iyan meupiya ne idlaus ta arà dut te kebperetiyaya ta. Ini se ibpenurù ku dut te langun ne egkevurun ne mibperetiyaya te misan endei ne inged ne ebpesineruwan ku.
18 Iring dut te etew ne mibpeetus te warà pà sikandin mebperetiyaya, ne kenà meupiya ne iyan din pegitungan ne id-awà din ke tuus te kinepeetus din. Ne iring ded dema rut te etew ne warà pà mebpeetus, embiya mibperetiyaya en sikandin ki Hisus ne iyan iya se kenà en sikandin ebpeetus.
19 Su riyà te etuvangan te Eleteala ne misan neetusan ka, etawa warà, ne warà ded pulus din. Ugaid ne iyan dekelà diyà te hinawa te Eleteala ne ke kedtuman niyu te kiyug din.
20 Ne egkehiyen ku manen ke migkahi ku geina te kenà kiyu en ebpemegitung en te kedsambì tew te misan engkey ne mibpetehuan te Eleteala keytew te warà kiyu pà mebperetiyaya ki Hisus.
21 Embiya uripen ka te kineperetiyaya nu, kenà ka egkeuru. Ugaid ne embiya ruen hewii ne egkepakey ne egkevelukasan ka, ne pevelukas ka.
22 Su misan uripen ka ketà te kineperetiyaya nu ki Hisu Kristu ke Kerenan tew, ne iyan din kedtengteng keykew ne kenà uripen. Engketà ded dema misan kenà ki uripen dut te kineperetiyaya tew, ne iring kiyu te uripen su embiya sikitew se mibperetiyaya ki Hisus ke Kerenan tew ne uripen kiyu nikandin.
23 Ne mepmepurù se kinevayad te Eleteala keytew te kebpekepeliyu keytew rut te keberedusaan tew. Engketà be ne kenà kew en peuripen dut te etew, ugaid ne diyà kew peuripen dut te mibpemasa keniyu te mepmepurù.
24 Menge suled, edsaup ad maa egkahi te kenà kew en pemegitung te kedsambì niyu te misan endei en se midtehuan te Eleteala keniyu dut te kineperetiyaya niyu ki Hisus, ne kenà niyu ipekeriyù se hinawa niyu te Eleteala.
Ini ne Mekeatag dut te Menge Etew ne warà pà med-esawa wey ke Menge Balu ne Meritan
25 Na menge suled, edlived ad maa te egkahi rut te in-insà niyu atag dut te menge etew ne warà pà meked-esawa. Warà suhù ni Hisu Kristu ke Kerenan tew mekeatag te ini ne ibpelambas ku, ugaid ne ini se ibpepevayà te daat te nanam din kediey ne egkeserihan a ne mehepemandù ku keniyu.
26 Embiya iyan ta ed-intengan ke egketemanan dut te sikitew ne mibperetiyaya ne merakel se kemerehenan ne ibpevayà ta, ne iyan pà tumù ne kenà ed-esawa.
27 Ne embiya nekeesawa ke en, ne kenà nu ed-engkeri. Ne embiya warà pà esawa nu, ne kenè ke en ed-esawa.
28 Ugaid ne embiya maa ed-esawa ka, ne kenà egkevaluy ne salà nu. Iyan ku rà kebpekekahi te iyan tumù se kenà ed-esawa, su embiya mid-esawa kad ne merakel se kemeresayan niyu kayi te ampew te dunya ne arà be ne egkesuatan ku perem ne kenà kew meked-ulaula te iring ketà.
29 Ne iyan ku kebpekekahi kayi, menge suled ku, su kenè en meuhet se hewii te egelevek ki te Eleteala. Ne geina te iring kayi, ne ke nenekeesawa en ne iyan din tumana ke kiyug te Eleteala kandin, iring te warà esawa rin.
30 Ne iring ded dema ke etew ne ruen kemutuwan din, kenà din ketà dà edtemana ke pegitungan din ketà te kemutuwan din. Ne iring ded ke etew ne ruen igkehalew rin, kenà iyan din dà tutuva te ebpegitung ne ke kehelawan din. Ne arà dema se ruen mibpemasa rin, ne kenà iyan din pegitunga se igkenuhuni rin arà se nepemasa rin, ugaid ne iyan din petimbangi se warà te hinawa rin.
31 Ne kenà iyan tew dekelà te ebpegitungan ne ke langun taman kayi te ampew te dunya. Su ini se kelibutan wey langun te nekeriken kayi te ampew te dunya ne id-anew.
32 Ne iyan ku igkesuati keniyu ne warà utew merakel ne kemutuwan ne ebpekesuhat keniyu kayi te ampew te dunya. Su ke meama ne warà med-esawa, ne warà duma ne ebpekeungen kandin te edtuman te helevek ne imbehey te Eleteala kandin su iyan din ibpeuna te pegitungan ne ke kebpekesuhat te hinawa te Eleteala.
33 Ugaid ne ke meama ne ruen esawa rin, ne iyan din dà lelayun egkepegitung ke engkey se ebpekegkeupiya kandan su apey mesuat ke esawa rin.
34 Engketà be ne reruwa en ke hinawa rin, su ibpengingsuhat din en te Eleteala ne ibpengingsuhat din dema dut te esawa rin. Ugaid ke meritan ne warà esawa rin, ne seveka rà se netahù te itungan din ne ke kiyug te Eleteala kandin. Su ke helevek din wey ke baher din ne in-amin din te edtuman dut te helevek ne impehelevek kandin te Eleteala su apey ebpekesuhat sikandin te hinawa rin. Ugaid ne ke meritan ne ruen en esawa rin, ne iyan din dà egkepegitung ne atag dut te kandan ne egketemanan su apey egkesuat ke esawa rin.
35 Kenà iyan ku kegkahi kayi ne ebelevahan ku sikiyu te ed-esawa. Ugaid ne iyan ku kegkahi kayi ne edtevangan ku sikiyu su apey warà ebpekeungen keniyu rut te keduma niyu te Eleteala wey ke edtumanen niyu ke ibpehelevek din ne imbehey rin keniyu.
36 Embiya ruen tehebarey ugaid ne malù en mehurang ke raha ne ke kenakan ne kenà dait se ulaula rin dut te raha su kenà ebpeketigker te kiyug din te ked-esawa, ne iyan tumù ne med-esawa en su kenà dema salà.
37 Ugaid ne embiya ruen kenakan ne intahù te hinawa rin te kenà ed-esawa su egketigkeran din ke kiyug din ne kenà ebpehesen sikandin, ne iyan tumù ne kenà en sikandin med-esawa.
38 Tembù be ke etew ne ed-esawa ne nekevaal te meupiya, ugaid ne muna pà se keupiya rin embiya kenà ed-esawa.
39 Na embiya ruen meritan ne ruen en esawa rin, ne kenà egkepakey ne ed-engkeran din ke esawa rin ne edsaup ed-esawa. Ugaid embiya ebpatey ke esawa rin, ne egkepakey ne edsaup sikandin ed-esawa asal su iyan din ed-esawaan ne mibperetiyaya ki Hisu Kristu ke Kerenan tew.
40 Ugaid ne iyan pà meupiya ne kenà en ed-esawa. Ini ne kediey rà ne pegitungan su iyan ku egkeperetiyaya ne ke impayag kedì te Kedesenan ne Ebpetuntul te Menusiyà.