24
1 Guna su nekedlelima ne hewii ne mibpendiyà te inged ne Sisariya si Ananias arà se Mepurù ne Terebpelengesa, ne edumaan din ke menge pekilukesen wey senge etew ne ebugadu ne ed-ingaranan ki Tertulu. Ne mid-etuvang dan ki Gubinedur Felix su ruen id-isuhat dan mekeatag ki Pablo.
2 Ne guna su impetawag en si Pablo, ne mid-itindeg arà se ebugadu ne si Tertulu ne impesabut din dut te gubinedur ke menge id-isuhat dan mekeatag ki Pablo. “Egkeedatan ne Gubinedur Felix,” ke se ebugadu, “su atag dut te ketau nu te kegkamal nu kenami ne neuhet en ne merinew se ked-ubpà dey wey merakel ne menge keupianan ne neveelan kayi te kenami.
3 Tembù be lelayun key ebpeselamat te piya endei su atag dut te ed-ul-ulaan nu.
4 Ne kenà ku igkesuat te egkevangen ka kayi te egkehiyen ku, ugaid ne ebuyuen ku keykew te pemineha nu pà ini se ibpesabut ku kenikew.
5 Iyan dey kebpengkayi ne ebpesebutan dey kenikew te ini se etew ne si Pablo ne mesamuk sikandin su ini se menge baal din se puunan te kegkehuvut dut te menge Hudiyanen te piya endei ebpesinaru sikandin. Su sikandin ke unutan dut te menge etew ne ed-ingaranan te Neserinu su si Hisus ke mibperetiyaya ran ne riyà ebpuun te inged ne Nesarit.
6 Ne kenà dutun dà taman su edredsikan din perem ini se Nekebpuru ne Valey te Eleteala rey, tembù be midsigkem dey sikandin. Ne egkukumen dey perem sikandin kayi te pengitavan te penduan dey.
7 Ugaid ne nekeuma ke mepurù te menge sundaru ne si Lisyas ne mid-ahew rin kenami su apey kenà dey egkekukum.
8 Ne impeewit din kayi te keykew ne migkehiyan key rin te sikami se mid-isuhat ki Pablo ne kayi key ibpeetuvang te kenikew. Su embiya edsumeriyaan nu ini se etew, ne egketuenan nu ke benar ini se in-isuhat dey kandin.”
9 Ne ketà ne mid-ayun arà se menge ruma rin ne menge Hudiyanen se egkahi te benar arà se langun ne migkahi rin.
Midtindeg si Pablo te Hinawa Rin diyà te Etuvangan ni Gubinedur Felix
10 Ne mid-uyawan dut te gubinedur si Pablo su apey egkahi sikandin. Ne migkahi si Pablo te, “Netuenan ku ne meupiya se kegkamal nu su neuhet en se kegkamal nu kayi te inged ini, tembù be kenà a egkesanggel ne edtavak dut te in-isuhat dan kediey.
11 Ne embiya egkiyug ka ne ed-insà kedì mekeatag kayi se id-isuhat dan kediey ne egkepakey. Su ruen merakel ne ebpekepenudtul te nekedsepulù en wey deruwa ne hewii ne mibpendiyan a te Hirusalim su ebpengarap a te Eleteala.
12 Ne warà ma mekita te menge Hudiyanen ne ebpekidlewanà a te misan engkey en ne etew diyà te Nekebpuru ne Valey te Eleteala. Ne warà dema mekita ne ebaal a te egkehuvut diyà te menge valey ne ebpengedian te menge Hudiyanen te penduan dan etawa piya endei ketà te lusud te inged ne Hirusalim.
13 Tembù be ini se in-isuhat dan kediey ne kenà benar su warà tuus ne igkepekita ran.
14 Ugaid ne kenà ku igkesanggel te egkahi keniyu ne ed-erapen ku ke Eleteala ne mibpengerap dut te menge keep-epuan dey. Ne iyan dalan te kebpengarap ku ne edtuntul a te pengitavan te penurù ni Hisus, ugaid ne egkehiyen dan te kenà benar ne kebpengarap. Ne edtuntul a rema dut te langun ne penduan ni Moises wey ke impesurat dut te menge ebpelambas te Lalag te Eleteala rengan.
15 Su langun dey abpeg kayi se mid-isuhat kediey, ne iyan dey ebpenerengen ke migkahi te Eleteala ne kebanew rin te langun ne menge minatey meupiya se meraat se ulaula ran.
16 Tembù be ebpegelep a te ed-ulaula te meupiya su wey warà igkesewayi kediey te Eleteala wey misan engkey en ne etew.
17 “Guna su ebirangan en te rahun se kineawà ku diyà te Hirusalim ne mibpendiyan a su id-ated ku se kureta ne idtavang te menge ruma ku ne Hudiyanen ne ayuayu. Ne mibpendiyan a su apey ruen ibpelengesa ku ne ibehey te Eleteala.
18 Ne gewii te ed-ul-ulaan ku ini ne nekita a ran diyà te Nekebpuru ne Valey te Eleteala te nepasad ku en ini se kedtumana te edtenuran ne betasan dey te menge Hudiyanen mekeatag te kedlùlù. Ne kenà merakel ne menge etew se ruma ku ne warà dema equvut.
19 Ugaid ne ruen menge Hudiyanen ketà ne riyà ebpuun te Asiya ne midsigkem kedì. Iyan dait ne sikandan se ed-etuvang keykew embiya ruen id-isuhat dan mekeatag kediey.
20 Embiya warà, ne pelelaha nu ini se menge etew kayi ne mid-isuhat kedì te kehiya ran keykew ke engkey se salà ku te impeetuvang a ran kayi te menge Perekukum.
21 Su warà netuenan dan liyu te migkahi ku gewii te mibpenginsaan a dut te menge Perekukum su ke siaken te, ‘Impeetuvang a niyu su atag dut te peretiyaya ku ne ebenawen te Eleteala ke menge minatey keuremà.’ ”
22 Nekahi rà ni Pablo arà ne ketà dà taman se kebpenginsà dut te gubinedur su netuenan din neraan mekeatag dut te menge etew ne eduma te penurù ni Hisus. “Ne wey ku en ed-imesara ke kukuman nu,” ke sikandin, “ke embiya ebpekeuma en ke mepurù te menge sundaru ne si Lisiyas.”
23 Ne migkehiyan din arà se senge etew ne sereyintu te ebpeventayan si Pablo, ugaid ne ruen idtuhut kandin. Ne egkepakey rema ne ke menge egkekilala rin ne ebpenumbaley su ebehey te kurang din.
24 Guna su nekebpipira en ne hewii ne nekeuma si Felix ki Drusila ke esawa rin ne Hudiyanen. Ne impetawag din si Pablo ne mibpemineg dan dut te kebpesabut ni Pablo mekeatag te kebperetiyaya rin ki Hisu Kristu.
25 Ne ketà te kebpesabut ni Pablo mekeatag te metidtu ne ulaula, wey kedtigker te hinawa rin, wey ke hewii ne ebpekeuma ne kedtimbanga te Eleteala dut te menge etew, ne neandek si Felix ne migkahi te, “Kayi pà taman su ibpetawag ku rà sikew ke embiya ruen en lakey ku.”
26 Ugaid ne edtahad si Felix ke ebehayan ni Pablo te idselipsip din ne kureta, tembù layun din ibpetawag su apey ran ebpekebitiyara.
27 Ne nekederuwa ne rahun ne si Pursyu Pistu se nekesambì ki Felix ne gubinedur. Si Felix, ne warà din pelihewanga si Pablo su apey igkesuat sikandin dut te menge Hudiyanen.