7
1 He vahi he dungganen, utew iyan mekempet is menge paa nu he zuen duen menge sandalyas. Meupiya is kegkepurma te menge vuvun nu. Henduen be heini te menge elahas he mibeelan te utew metau he mememaal.
2 Is pused nu iring te tasa he layun din duen taǥù he metaam he vinu. Is hawak nu iring te vinagkes he trigu he neliǥuy te menge liryu.
3 Is menge susu nu henduen be te sereping he nati te kuleping.
4 Is lieg nu iring te turi he iyan inhiman duen is menge ungal te ilipanti. Is menge mata nu iring ketingew te pemeziǥuey ziyà te Heshbon, he ziyà te gemawan te Bat Rabim. Is izung nu iring kekempet te turi ziyà te Lebanon he nekesinaru ziyà te Damascus.
5 Is ulu nu iring is kekempet din te kekempet te Buntud he Carmel. Is bulvul nu iring te utew mahalen he manggad. Utew nesuati te hadì is kempet kayi.
6 Utew ka mezagwey is pelanggè ku; utew ka mekewiwili.
7 Is tindeg nu iring te tindeg te kayu he palma, ne is menge susu nu henduen be te menge rupung te veǥas kayi.
8 Migkaǥi a te, “Ebpemenahik a ziyà te palma ne egewezan ku is menge veǥas kayi.” Etuwey, is menge susu nu henduen be te menge pungpung te paras ne is kehemut te gehinawa nu henduen be te kehemut te mensanas.
9 Is menge hazek nu iring is keemis din te kinemeupiyahan he vinu.
Bahi
Heini he vinu ednaneynaney edtudà diyà te menge vivig wey ngipen te minahal ku.
10 Gaked a te minahal ku ne iyan e zà ibulunga zin.
11 Hendini ka, pelanggè ku, edhendiyè ki te vevesukà, ne ziyà ki edlipezeng te zuen duen menge vulak he hina.
12 Edsayu ki ed-enew ne ed-ahaan ta ke neneringsing en wey ke nemekar en is menge kevukad te menge paras. Ed-ahaan te zaan ke nengevukad en is pumigranata. Ne zutun ibpeǥezam ku kenikew is kebmahal ku.
13 Egkahazek ta is kehemut te pinemula he mandragura, ne ziyà te uvey te gemawan ta ne zutun is langun he meupiya he menge prutas, is daan wey is beǥu. Su inteǥana ku heini kenikew, pelanggè ku.