35
Midsilibra ni Josia is Pista te Kedlavey te Belinsuǥuen
(2 Menge Hadì 23:21-23)
1 Hein ike-14 he andew te nehuna he vulan, midsilibra ni Hadì Josia ziyà te Jerusalem is Pista te Kedlavey te Belinsuǥuen he paaǥi te kebeǥey te zengeg diyà te Nengazen. Midlapè dan te menge kerehidu wey menge kambing para kayi he pista.
2 Mibeǥayan ni Josia is menge memumuhat te buluhaten dan diyà te valey te Nengazen, ne midasig din sikandan dutun te kebpenilbi zan.
3 Mibeǥayan din daan te menge vuluhaten is menge Levihanen he menge menunudlù te menge Israilihanen, he impehinungud para te kebpenilbi te Nengazen. Migkeǥiyan din sikandan te, “Ingkepelastar en is segradu he kavan diyà te valey te Nengazen he mibangun ni Solomon he anak ni David, ne kenè en kinahanglan he ebintingen niw pa. Gemita niw en is timpu niw te kebpenilbi te Nengazen he Megbevayè niw wey te menge etew zin he menge Israilihanen.
4 Beeli niw en is menge terebahu niw ziyà te valey te Nengazen sumalà is ketengdanan te kada pemilya niw. Ikula niw is ingkesurat he menge sulunuzen ni Hadì David te Israel, wey te anak din he si Solomon.
5 Mebpelastar is kada grupu niw ziyà te valey te Nengazen, ne is menge pemilya he insarig keniyu, uǥupi niw he ebpemuhat.
6 Mebpekelumpiyu kew wey endama niw is keugelingen niw para te kedsilbi te menge zuma niw. Ne lepaa niw is menge kerehidu wey menge kambing he para te Pista te Kedlavey te Belinsuǥuen. Ikula niw is menge suǥù te Nengazen keniyu pinaaǥi ki Moises.”
7 Mibeǥey si Josia te kandin he menge uyaǥen he 30,000 he menge kerehidu wey menge kambing, wey 3,000 he menge vaka he para igkepemuhat te menge etew zutun te timpu te Pista te Kedlavey te Belinsuǥuen.
8 Mibeǥey zaan diyà te menge etew, ziyà te menge memumuhat, wey ziyà te menge Levihanen is menge upisyal ni Josia te kebeǥey he ebpuun te keugelingen dan he suat. Is menge edumala ziyà te valey te Nengazen he si Hilkia, si Zacarias, wey si Jehiel mibeǥey ziyà te iring dan he menge memumuhat te 2,600 he menge kerehidu wey menge kambing, wey 300 he menge vaka, he pemuhat dutun te pista.
9 Is menge pengulu te menge Levihanen he iyan ensi Conania wey is menge suled din he si Shemaya wey si Netanel, si Hashabia, si Jiel, wey si Jozabad, mibeǥey ziyà te menge zuma zan he menge Levihanen te 5,000 he menge kerehidu wey menge kambing, wey 500 he menge vaka, he para te pemuhat dutun te pista.
10 Hein naandam en is langun he para te pista, mibpelastar ziyà te valey te Nengazen is menge memumuhat wey menge Levihanen, he ebaal te vuluhaten te kada grupu zan, su iyan heini insuǥù te hadì.
11 Midlapà te menge Levihanen is menge kerehidu wey menge kambing, ne imbeǥey zan is lengesa zutun diyà te menge memumuhat. Ne impirik heini te menge memumuhat diyà te pemuhatà ne zutun ed-enisi te menge Levihanen is menge midlapà he menge uyaǥen.
12 Ne mibahin dan haazà diyà te kada grupu te menge pemilya is menge pemuhat he edtutungen he para ibpemuhat diyà te Nengazen, sumalà te ingkesurat diyà te libru ni Moises. Ne iring ded dutun is mibeelan dan duen te menge vaka.
13 Ne midlitsun dan sikan is menge uyaǥen he para te pista, sumalà is ingkesurat diyà te kesuǥuan, ne midsevawan dan is segradu he menge pemuhat diyà te menge diniyun, ziyà te menge kuzen, wey menge kawà, ne mibpenalad dan haazà diyà te menge etew.
14 Huziyan, ne mid-andam te menge Levihanen is kandan he keenen wey keenen te menge memumuhat, su is menge memumuhat he menge kevuwazan ni Aaron kenà egkeengked is kebpemuhat dan te menge pemuhat he edtutungen wey menge tavà te menge uyaǥen taman te mezukilem.
15 Is menge musikiru he menge kevuwazan ni Asaf, diyà daan sikandan te kandan he lugar zutun te valey te Nengazen, su iyan haazà sulunuzen he imbeǥey ni Hadì David, ni Asaf, ni Heman, wey ni Jedutun he ebpeneuven he sineriǥan te hadì. Is menge vantey ziyà te kada gemawan dutun te valey te Nengazen wazè en med-awà diyà te kandan he lugar su iyan mid-andam te keenen dan is menge zuma zan he menge Levihanen.
16 Nepasad dutun he andew is tivuuk he tulumanen para te Pista te Kedlavey te Belinsuǥuen he midsilibra para te Nengazen, ragkes is kebpemuhat te menge pemuhat he edtutungen diyà te pemuhatà he para te Nengazen, sumalà is insuǥù ni Hadì Josia.
17 Midsilibra te menge tumetelevukà he menge Israilihanen haazà he pista, ragkes en is Pista te Supas he Wazè din Tapey te seled te pitu he andew.
18 Puun te timpu ni Samuel, ne wazè pa iring kayi he kedsilibraha te Pista te Kedlavey te Belinsuǥuen. Wazà mekesilibra is nehuna he menge hadì te iring te kedsilibra ni Hadì Josia wey te menge memumuhat, menge Levihanen, menge meǥinged te Jerusalem, wey menge etew te tivuuk he Juda wey Israel.
19 Haazà he kedsilibra te pista nehitavù hein ike-18 he tuig te kedhadì ni Josia.
Is Ketepusan te Kedhadì ni Josia
(2 Menge Hadì 23:28-30)
20 Hein nepasad heini is menge mibeelan ni Josia para te valey te Nengazen, mibpenguluwan ni Hadì Neco he hadì te Ehipto is menge sundaru zin te kebpekidtebek diyà te Carkemish, he ziyà te Wahig he Eufrates. Midhendutun si Josia wey is menge sundaru zin su edtebeken dan si Neco.
21 Piru midsuǥù si Neco te menge menunudtulà diyà te ki Josia he ibpekaǥi te, “Hengkey is lavet nu kedì te hadì te Juda? Kenè ka iyan edsurungen ku, kekenà, iyan is nasyun he mibpekidtebek kedì. Ne migkaǥi is Megbevayà kayi te kedì te egègaanan ku te edsurung. Duma ku is Megbevayà umbe kenà a kenikew kuntedaha su kela ke dèdeeti ke zin.”
22 Piru meheǥet diyà te gehinawa ni Josia is kebpekidtebek. Wazà sikandin mebpemineg ki Neco te migkeǥiyan te Megbevayà, kekenà, midsurung din si Neco ziyà te suǥud te Megido.
23 Mibpanà si Josia ne nepelian sikandin. Kesikandin diyà te menge upisyal zin te, “Kuwaa a keniyu kayi su gerabi is palì ku.”
24 Umbe, migkuwa zan sikandin diyà te kerwahi zin, ne ingkarga zan te sevaha pa he kerwahi zin, ne mid-uwit dan diyà te Jerusalem. Minatey sikandin dutun, ne inleveng dan diyà te midlevengan te menge kepuun din. Midlalew para kandin is langun he menge etew ziyà te Juda wey Jerusalem.
25 Mibaal si Jeremias te menge penhulùhulù he tedeman para ki Josia, ne taman en guntaan is kegkentaha kayi te menge perekanta. Heini he menge penhulùhulù ne layun egkentaha ziyà te Israel, ne ingkesurat diyà te menge penhulùhulù.
26-27 Is duma pa he ǥuǥud mehitenged te kedhadì ni Josia, puun te puunà taman te ketepusan, ne ingkesurat diyà te Libru he Midsuratan te menge Keguǥuza te menge Hadì te Israel wey Juda. Ingkesurat daan kayi is bahin te kebmahala ni Josia te Nengazen he impeehè din pinaaǥi te kedtuman din te Kesuǥuan te Nengazen.