71
Tudtula is Mibeelan te Megbevayà Taman te Taman
1 Nengazen, diyà a te kenikew med-aput.
Kenè nu ituǥut he mepeel-elezi a.
2 Tevangi a wey luwasa a su metazeng ke man.
Pemineǥa a wey luwasa a.
3 Kelesaǥi a iring te nekeendilung a te vatu,
su ziyè e zà layun te kenikew edangep.
Kenà duwazuwa he edlibriyen a kenikew, su iyan ke man endilungè ku wey melig-en he elesà ku.
4 He Megbevayè ku, luwasa a te kezeetan he edhimuwen te menge lalung wey mesipala he menge etew.
5 He Nengazen he MEGBEVAYÀ, diyà te kenikew is perateng ku.
Su puun te vatè e pa ne midsarig e en kenikew.
6 Puun pa te ked-enaka kedì, edsarig e en diyà te kenikew ne edlevanan a kenikew.
Ne edeliǥen ku sikew te wazà pidtemanan.
7 Mahabet is nekeiring kedì he ziyà ed-aput te kenikew
su ǥeina te neehè dan pinaaǥi te kedlevani nu kedì he iyan ka iyan melig-en he eputà.
8 Layun ku edeliǥa is kegkemekeǥeǥehem nu.
9 Kena a kenikew engkezi emun meǥurang ad.
Kenà a kenikew pesegdana emun meluya ad.
10 Su midtiǥum is menge kuntada ku su mid-uyun dan mehitenged kediey;
egkesuatan e zan te edhimatey.
11 Ke sikandan te,
“Mibey-anan en sikandin te Megbevayà,
umbe edel-asen tew sikandin ne edekepen tew,
su wazè en edtavang kandin.”
12 He Megbevayè ku, kenà a kenikew pekeziyui;
kenè ka langanlangan is edtavang kedì.
13 Berakat he mepeel-elezi wey mengezeeti is menge etew he mibutangbutang kedì.
Berakat he mepeel-elezi wey susudia is menge etew he egkesuat he edezaat kedì.
14 Piru siak, Megbevayè ku, layun a ebperateng te tavang nu,
ne ibpeiseg ku pa is kedeliǥa ku kenikew.
15 Layun ku edtudtula is metazeng he ebeelan nu he kedlibri te menge etew nu,
minsan pa te kenè ku heini egketegkad ke maan.
16 Edhendiyà a te valey nu, Nengazen he MEGBEVAYÀ, ne edeliǥen ku sikew tenged te menge mibeelan nu he nezumahan te zekelà he ǥehem.
Iyan dà edtudtulen ku is ketazeng nu.
17 He Megbevayà, puun te vatè e pa, mibpenurù ad kenikew mehitenged te egkein-inuwan he menge vaal nu,
ne taman en guntaan is kebpenudtula ku kayi.
18 Ne minsan pa te ebmeǥurang e en su ed-uvanen ad, ne kenà a kenikew pesegdana, Megbevayè ku,
zutun te kebpenudtula ku te ǥehem nu wey zesen nu ziyà te huziyan he menge lapis te menge kevuwazan.
19 Is ketazeng nu, Megbevayè ku, kenà egketegkad.
Egkein-inuwan is mibpemeelan nu; wazà iyan iring kenikew.
20 Minsan ibpesaǥad a kenikew te mahabet he menge elentusen, ne ebeǥayan a ǥihapun kenikew te veǥu he untung;
egkeiring a te minatey he ebenhawen nu zed.
21 Ebeǥayan a kenikew te zekelà he zengeg,
ne ed-umanan a kenikew edlipaya.
22 He Megbevayè ku, tenged te kebmetinumanen nu edeliǥen ku sikew pinaaǥi te kedtukar te alpa.
Edeliǥen ku sikew, is Waǥas he Megbevayà te Israel, pinaaǥi te kegkanta ku he eduyuǥan te alpa.
23 Igkulahì ku is kegkelipey ku zutun te kegkanta ku te kedalig kenikew
tenged te kedlibriya nu kediey.
24 Layun ku edtudtula is ketazeng nu,
su is egkesuat he edezaat kedì nepeel-elezan wey neliveg.