64
Is Silut te menge Lalung
1 He Megbevayà, pemineǥa nu is riklamu ku.
Tipiǥi nu is untung ku su midhulgà a te menge kuntada ku.
2 Iyan ka metau he kenà medlampus is mezaat he planu kedì te grupu te menge lalung.
3 Mesakit is kebpengaǥikaǥi zan, iring te ispada wey vala te panà.
4 Utew zà melemu ziyà te kandan is kegkaǥi te mesakit he lalag diyà te menge etew he wazà duen igkesawey,
ne wazè en kegkahandek dan te kegkaǥi kayi.
5 Ebpehinghinggatè dan te kebaal te mezaat he pelanu.
Ne ebpelenuwan dan ke hendei zan idlitag is menge litag dan.
Ke sikandan te, “Wazà ebpekaahà kayi.”
6 Mibpelanu zan te mezaat ne ke sikandan te,
“Utew meupiya is pelanu tew.”
Kenè egketegkad is isip wey ǥehinawa te etew.
7 Iyan, ebpenaan sikandan te Megbevayà,
ne egketik-ew zà sikandan egkengetiyuk.
8 Edezeetan sikandan te Megbevayà tenged te ebpengeǥiyen dan.
Is langun he ebpekaahà kandan ne ebpemenggemenggemen te kedsudì kandan.
9 Ne zutun egkengahandek is langun he menge etew.
Ne egngunngunuen dan is mibpemeelan te Megbevayà,
ne edtudtulen dan haazà.
10 Egkelipey wey edalig te Nengazen is langun he menge metazeng tenged te mibeelan din,
ne ebuyù dan he kelesaǥi zin sikandan.