60
Ampù para te Kebuyù te Tavang te Megbevayà
1 He Megbevayà, mid-engkezan key kenikew ne ketau nu is kegkezaaǥa kenami.
Nepeukan key kenikew, ne ǥuntaan seǥipaa key en.
2 Midhuyung nu wey impeveka nu is tanà he Israel,
iyan, guntaan edhangyù a ziyà te kenikew he purungi nu en heini su hapit en egketempag.
3 Sikami is menge etew nu ibpepurung key kenikew ibpaantus.
Ebpekeziregdireg key en he henduen be te midlangut key kenikew te vinu.
4 Piru sikami is edtahud kenikew, ebpetizeenan key kenikew
su wey key mekelikey te vesut te panà te menge kuntada.
5 Luwasa key pinaaǥi te ǥehem nu.
Tevaka nu is menge kebpengemuyù dey su para melibri key is menge minahal nu.
6 He Megbevayà, migkaǥi ka ziyà te valey nu te,
“Ebpekezaag a; ebehinen ku is Shekem wey is Suǥud he Sucot ne ibpemeǥey ku ziyà te menge etew ku.
7 Kediey is Gilead wey is Manase.
Is Efraim iyan menlelavan ku,
ne is Juda iyan perezumala ku.
8 Ne suluǥuen ku mulà is Moab ne ed-engkenen ku is Edom.
Ne idsegyawan ku is kegkezeeǥa ku te Filistia.”
9 Hentei is ed-uwit kedì diyà te Edom wey ziyà te inged kayi he mibpeliǥuyan te menge verengbeng?
10 Kenè be iyan ka, is Megbevayà he midselikwey kenami he wazè en meduma te menge sundaru zey?
11 Tevangi key te kebpekidtebek te menge kuntada zey,
su kenà ebpulus is tavang te etew.
12 He Megbevayà, ebpekezaag key pinaaǥi te tavang nu,
su iyan ka ebpekezaag te menge kuntada.