6
Ampù para te Kebuyù te Tavang te Megbevayà
1 Nengazen, minsan duen nu pauk kedì, ne kenà a kenikew siluti.
2 Kehizuwi a wey vewii a, su utew ad meluya.
3 Nesemukan utew is isip ku, Nengazen.
Keenu e en be kenikew ebewii?
4 Etura a kenikew, Nengazen, ne ǥeuza a.
Tenged te kebmahala nu kediey, libriya a te kemetayen.
5 Su emun ebpatey a, ne kenè ku en maan sikew egketenuzan;
kenà ad maan ebpekezalig kenikew ziyà te lugar te menge minatey.
6 Mibmeluye e en tenged te utew ku kegkesekiti.
Kada mezukilem egkahames is ulunè ku te luhà.
7 Nemenlevag en is menge mata ku su ebpeketulung ad ebpekesineǥew
tenged te vaal te langun he menge kuntada ku.
8 Sikiyu is memezaat is baal, pekeziyù kew kediey,
su nezineg en te Nengazen is sineǥawan ku.
9 Nezineg din en is kebuyù ku te tavang,
ne edtevaken din en is ampù ku.
10 Egkepeel-elezan wey egkengeheratan is langun he menge kuntada ku.
Egkengelagewlagew sikandan he ebpekeziyù tenged te kegkeeled dan.