53
Is Ikezaat te menge Etew
(Menge Salmo 14)
1 Diyà te ǥehinawa te menge tulebung egkaǥi sikandan te, “Wazà Megbevayà!”
Pudu sikandan lalung ne utew mezaat is menge vaal zan.
Wazà minsan sevaha kandan he ebaal te meupiya.
2 Puun te langit edtengtengan te Megbevayà is keet-etawan, su edsusiyen din ke zuen be nekesavut te tutuu wey ke zuen be midangep diyà te kandin.
3 Is langun mid-awà diyà te Megbevayà ne pudu memezaat is ulaula zan.
Wazà minsan sevaha kandan he ebaal te meupiya.
4 Wazè be metueni kayi te lalung he menge etew is menge vaal zan? Netuenan dan heini!
Ebpegpeǥesen dan is menge amurè ku te inged wey zan mekeselapì he iring dà sikandan te edsupal te keenen,
ne kenà sikandan ed-ampù diyà te Megbevayà.
5 Piru egkengeheratan sikandan.
Egkeǥezam dan is kegkahandek he wazè dan pa keenu meseǥazi,
su ibpeyapat te Megbevayà is menge tulan dan.
Sikandan is menge edsurung keniyu te menge tig-Israel, ebpeel-elezan niw sikandan,
su inselikwey sikandan te Megbevayà.
6 Deyzey ke ebpekeume en is edlibri te Israel he ebpuun diyà te Zion.
Utew ebmelipayen is menge tig-Israel he menge etew te Megbevayà,
emun idlikù din en is meupiya he kebpekesavuk dan.