50
Is Hustu he Ked-azap
1 Is Nengazen he iyan kes mekeǥeǥehem he Megbevayà, ebpekidlalag wey ebpengumew te menge etew kayi te tivuuk he kelibutan.
2 Ed-anlag sikandin he ebpuun diyà te Zion, he iyan kes inged he wazà kurang te kekempet din.
3 Ne ebpekeuma is Megbevayà he ebpetuus,
su ziyà te egkehunaan din duen egkeregreg he hapuy,
ne ziyà te ebpekeliǥuy kandin ne zuen bagyu.
4 Ed-umawen din is langit wey is kelibutan su ibpepirma zin te kedhukumi zin te menge etew zin.
5 Egkaǥi sikandin te, “Tiguma niw kayi te kediey is metinumanen he menge etew ku he mibaal te kedpekid-uyun kedì pinaaǥi te kebpemuhat.”
6 Ebpahayag is langit he metazeng is Megbevayà,
su iyan sikandin edhukum.
7 Migkaǥi pa is Megbevayà te,
“Sikiyu is menge etew ku, pemineǥa niw is egkeǥiyen ku.
Iyan a Megbevayà, kes Megbevayà he iyan ed-ezapen niw;
iyan a ebpenistiǥus te ebpekesuǥat keniyu te menge tig-Israel.
8 Wazè ku sikiyu zewaya te menge kebpemuhat niw,
etawa menge pemuhat he edtutungen he layun niw ibpemuhat.
9 Piru wazè ku kinehenglana is menge tudu he vaka niw wey menge kambing niw.
10 Su kediey is langun he langgam:
is menge langgam diyà te ketelunan,
is menge vaka ziyà te linibu he menge vuvungan,
11 is menge tagbis diyà te menge vuvungan,
wey is menge langgam diyà te vevesukà.
12 Angin ke egkevitil a, ne kenà a ebuyù te keenen diyà te keniyu,
su kediey is tivuuk he kelibutan wey is langun he taǥù din.
13 Kenè ku man egkeenen is usa zuen te tudu he vaka he ibpemuhat niw,
ne kenè ku zaan ed-inumen is lengesa zuen te menge kambing.
14 Siak, is Utew Lavew he Megbevayè niw, iyan egkesuatan ku he ibpemuhat niw kedì is:
kebpeselamat wey is kedtumana niw te menge pesarig niw kedì.
15 Umawa a keniyu te timpu te kelised
su edlibriyen ku sikiyu,
ne zutun edeliǥen a keniyu.”
16 Egkaǥi mulà is Megbevayà diyà te lalung he menge etew te,
“Wazè niw ketenged te kegkaǥi zuen te menge suǥù ku wey kebpekid-uyun ku.
17 Egkeepesan niw is menge penurù ku;
wazè niw seǥipaa is menge lalag ku.
18 Emun ebpekeehè kew te tekawen ne ebpekid-emiǥu kew kandin,
wey ebpekidrerempungen kew zaan te menge mengungumpadi.
19 Mezaat is ebpengeǥiyen niw ne utew zà melemu ziyà te keniyu is kedtarùtarù.
20 Layun mezaat is menge lalag niw mehitenged te menge suled niw.
21 Ne hein mibeelan niw heini is langun, wazè ku sikiyu dewaya;
umbe kunaan niw ke iring a keniyu.
Piru guntaan, edewayen ku sikiyu ne ibpeehè ku keniyu he utew kew lalung.
22 Pemineǥa niw heini, sikiyu is nengelipat te Megbevayà,
su emun kenà, edezeetan ku sikiyu ne wazà ebpekelibri keniyu.
23 Is ebpemuhat kayi te kedì te kebpeselamat ebeǥey kedì te zengeg,
ne edlibriyen ku sikan is ebpekeventayan din he kenà sikandin mekevaal te mezaat.”