16
Is Ked-ampù te Edsarig te Nengazen
1 He Megbevayà, bentayi a,
su ziyà a te kenikew med-aput.
2 Iyan ka Nengazen ku,
diyè dà ebpuun te kenikew is langun he menge meupiya he nezawat ku.
3 Emun bahin te metinumanen he menge etew nu he ziyà med-ubpà te tanà he Israel he utew menge vuutan,
dekelà is kelipey ku tenged kandan.
4 Piru is menge etew he edsarig te menge ed-ezapen ed-iseg dà is kelised dan.
Ne kenà a edtampu kandan te kebpelengesa zan para te zuma he menge ed-ezapen,
ne kenè ku ebpengum-umawen is menge ngazan keniyan he menge ed-ezapen.
5 Nengazen, is kegkeengkena ku kenikew iyan en kegkeengkena ku te langun.
Ibeǥey nu kediey is langun he kinahanglan ku.
Ne ziyà te menge velad nu is untung ku.
6 Utew mekempet is imbeǥey nu kediey.
Meupiya utew is langun he nezawat ku he ebpuun diyà te kenikew.
7 Edeliǥen ku sikew, Nengazen, su iyan ka layun edsambag kedì.
Minsan mezukilem ne iyan ebpenurù kedì is isip he imbeǥey nu kediey.
8 Layun ku sikew ed-isipa, Nengazen.
Umbe, kenà a egkahandek su geina te duma ku sikew.
9 Iyan heeyan hinungdan he melipayen a;
utew zekelà is kelipey ku kayi te kebpengungubpaan ku.
Ne ebpengungubpaan a he wazè ku igkelenew,
10 su kenà a kenikew ebpesegdanen he mekehendiyà a te lugar te menge minatey.
Kenè nu idtuǥut he meredak is lawa te metinumanen he suluǥuen nu.
11 Ipenurù nu kediey is paaǥi wey ku maangken is ebpedayun he untung.
Ne tenged te kebpekiduma nu kediey, wazè en kurang te kelipey ku;
wazà pidtemanan te kelipey ku ziyà te avey nu.