148
Is Kebpengumew para te Kedalig te Nengazen
1 Deliǥa is Nengazen!
Sikiyu is diyan te langit, deliǥa niw is Nengazen!
2 Deliǥa niw sikandin, sikiyu is langun he menge velinsuǥuen, he menge sundaru zin diyà te langit.
3 Deliǥa niw sikandin, andew, bulan, wey menge vituen.
4 Deliǥa niw sikandin, kinetikangan he langit wey is wahig diyà te zivavew.
5 Medalig dan is langun te Nengazen!
Su pinaaǥi te kebmandù din, nelimbag sikandan is langun.
6 Wazà pidtemanan is kebpekesavuk dan diyà te midsevukan din kandan,
ne kenè en heini egkahalin is kebpekesavuk dan.
7 Deliǥa niw is Nengazen, sikiyu is langun kayi te kelibutan, menge dezekelà he langgam he ziyà te zaǥat, wey is langun diyà te kinezeleman en te zaǥat.
8 Deliǥa niw te Nengazen, sikiyu is menge kilat, menge ǥiyew, menge ǥapun, wey mevendes he keramag he edtuman ke edsuǥuen din.
9 Deliǥa niw is Nengazen, sikiyu is menge vuntud, menge vuvungan, wey menge kayu he zuen din beǥas wey wazà,
10 langun he menge langgam: he leew wey is ayam, wey zuma pa he kelasi te langgam he ebpenanap wey ebpemenlayang.
11 Deliǥa niw zaan is Nengazen, sikiyu is menge hadì, menge upisyal, menge ebpemendumala, wey is langun he etew zini te kelibutan;
12 menge menguhed man, wey is menge meǥurang en, wey ke iyan be menge vatà.
13 Langun te sikandan ne medalig te Nengazen su iyan sikandin lavew te langun.
Iyan sikandin lavew he mekeǥeǥehem te langun he ziyà te langit.
14 Midlig-enan din wey mibeǥayan din te zengeg is metinumanen he menge etew zin, he iyan is menge tig-Israel he utew zin pelanggà.
Deliǥa is Nengazen!