14
Is Ikezaat te menge Etew
(Menge Salmo 53)
1 Is menge tulebung, egkaǥi sikandan diyà te gehinawa zan te,
“Wazà Megbevayà!”
Pudu sikandan lalung ne utew mezaat is menge vaal zan.
Wazà minsan sevaha kandan he ebaal te meupiya.
2 Diyà te langit mid-ahà te Nengazen is keet-etawan
su edsusiyen din ke zuen be nekesavut te tutuu wey ke zuen be edangep diyà te kandin.
3 Sikandan is langun, midsuwey zan te tutuu he zalan ne pudu memezaat is ulaula zan.
Wazà minsan sevaha kandan he ebaal te meupiya.
4 Wazè be metueni kayi te lalung he menge etew is menge vaal zan? Netuenan dan heini!
Ebpegpeǥesen dan is menge emurè ku te inged wey zan mekeselapì he iring dà sikandan te edsupal te keenen,
ne kenà sikandan ed-ampù diyà te Nengazen.
5 Piru egkengeheratan sikandan,
su edlevanan te Megbevayà is menge metazeng.
6 Edhimuwen dan he kenè edlampus is menge pelanu te menge egkaayuayu,
piru iyan is Nengazen ebpengalang te menge egkaayuayu.
7 Deyzey ke ebpekeume en is edlibri te Israel he ebpuun diyà te Zion.
Utew ebmelipayen is menge tig-Israel he menge etew te Nengazen,
emun idlikù din en is meupiya he kebpekesavuk dan.