132
Kedeliǥa te Baley te Megbevayà
1 Nengazen, kenè nu lipati si David wey is langun he elentusen din.
2 Tentenuzi nu is saad din diyà te kenikew, Nengazen, is Mekeǥeǥehem he Megbevayà ni Jacob.
Midsaad sikandin he ke sikandin te,
3 “Kenà a ed-ulì wey kenà a edhizeǥà;
4 kenà a edlipezeng
5 taman te kebpeketuredu ku te lugar he egkeubpaan te Nengazen,
he iyan kes Mekeǥeǥehem he Megbevayà ni Jacob.”
6 Hein diyè key te Efrata netudtul kenami ke hendei sikan is Kavan te Kebpekid-uyun,
ne ziyè dey haazà meturedu te vevesukà diyà te Jaar.
7 Ne zutun migkaǥi key te,
“Edhendiyè kiw te valey te Nengazen ne ed-azap kiw ziyà te etuvangan te pinuuwè din te kedhadì.”
8 Agpas ka, Nengazen, hendiyè ke en te valey nu he ed-ezapan duma sikan is Kavan te Kebpekid-uyun he simbulu te ǥehem nu.
9 Berakat he layun edtinazeng is menge memumuhat nu,
ne egkanta te kegkelipey is metinumanen he menge etew nu.
10 Tenged te suluǥuen nu he si David,
kenè nu engkezi is pinilì nu he hadì.
11 Nenangdù ka zengan diyà te ki David,
ne kenà duwazuwa he edtumanen nu haazà ne kenè nu ebelvelewanan.
Ke sikew te, “Sevaha te menge kevuwazan nu is id-ilis ku kenikew he hadì.
12 Is menge kevuwazan nu he menge hadì, emun edtumanen dan is kebpekid-uyun ku keniyu wey is menge penurù he impenurù ku kandan, edhadì daan sikandan te taman te taman.”
13 Tutuu he mibpilì wey midtinguhà te Nengazen is Zion, he iyan edhimuwen din he ubpeey zin.
Ke sikandin te,
14 “Iyan heini ubpeey ku taman te taman;
kayi a ed-ubpà su kayi a egkesuat.
15 Ibeǥey ku ziyà te Zion is langun he kinahanglan din,
ne edhentayen ku is menge pubri he menge meǥinged kayi.
16 Layun ku edlibriya is menge memumuhat kayi,
ne is metinumanen he menge meǥinged kayi he menge etew ku, layun ebpemenganta te kegkelipey zan.
17 Ibpahadì ku ziyà te Zion is hadì he kevuwazan ni David ne egkeiring sikandin te sulù he kenà egkeevukan.
18 Ebpeel-elezan ku is menge kuntada zin, piru ibpeuswag ku mulà is ginhedian din.”