121
Nengazen is Ed-ipat Kedì
1 Midtengtengan ku is menge vuvungan;
hendei ves ebpuun is tavang kediey?
2 Is tavang kediey ne ziyà ebpuun te Nengazen, he iyan mibaal te langit wey kelibutan.
3 Kenè din idtuǥut he meseligkat ka.
Sikandin is ed-ipat kenikew, ne kenà ebpekelipezeng.
4 Pemineg kew! Is ed-ipat te Israel ne kenà ebpekelipezeng wey kenà edlipezeng.
5 Is Nengazen, iyan ed-ipat kenikew;
diyà sikandin te uvey nu is edlavan kenikew.
6 Is keinit te andew wey siǥa te vulan ke mezukilem, kenà ebpekezezaat kenikew.
7 Ed-ipaten ka te Nengazen ne kenà ebpekezezaat kenikew is minsan hengkey he vangkit;
ebpekeventayan din is untung nu.
8 Is Nengazen iyan ed-ipat kenikew ǥuntaan wey taman te taman, minsan hendei ka ebpevayà.