116
Is Megbevayà Edlibriyen Din is Etew te Kemetayen
1 Mibmahal ku is Nengazen,
su ebpemineǥen din wey edtevaken din is kebuyù ku te tavang diyà te kandin.
2 Ne ǥeina te ebpemineǥen e zin, ne kenà a ed-engked he ebpengumew kandin mintras uuyag e pa.
3 Nahandek a su neǥezam ku he henduen be te hapit ad ebpatey;
is kemetayen henduen be te pisì he nekevedbed kediey.
Nesemukan a wey neipeng a,
4 umbe mid-umew ku is Nengazen, “Nengazen, libriya a!”
5 Is Nengazen he Megbevayè tew meupiya, metazeng, wey hihizuwen.
6 Egkelesaǥan din is iring te kedsarig te vatà is kedsarig dan kandin.
Hein wazè ku en egkehimu, midlibri e zin.
7 Ereg a he kenà egkeǥiyaǥiya, su utew a ebpurungi te Nengazen,
8 su midlibri e zin te kemetayen, kegkeseeng, wey kezeetan.
9 Umbe, ed-uvey a ziyà te Nengazen kayi te kebpengungubpaan ku kayi te kelibutan te menge uuyag.
10 Edtuu a ǥihapun kenikew minsan ke ebpekekaǥi a te, “Utew subra is menge elentusen ku.”
11 Tenged te kegkehandek ku migkaǥi a te, “Wazà iyan etew he egkeseriǥan.”
12 Hengkey is igkevales ku te Nengazen te langun he meupiya he mibeelan din kayi te kediey?
13 Edsimbahan ku is Nengazen ne ed-uwit a te vinu he ibpemuhat ku te kebpeselamat kandin te kedlibriya zin kedì.
14 Edtumanen ku is menge saad ku he nepirmahan te langun he menge etew zin.
15 Egkesekitan is Nengazen emun duen ebpatey zuen te menge etew zin.
16 Nengazen, tutuu he suluǥuen a kenikew.
Impelingkawas a kenikew hein nevihag a.
17 Ed-ezapen ku sikew
ne edhalad a para te kebpeselamat kenikew.
18 Edtumanen ku is menge saad ku ziyà te kenikew he nepirmahan te langun he menge etew nu
19 ziyà te lama te valey nu ziyà te Jerusalem.
Deliǥa is Nengazen!