105
Is Megbevayà wey is menge Keet-etawan Din
(1 Cronica 16:8-22)
1 Peselemati niw is Nengazen;
simbaha niw sikandin!
Tudtula niw ziyà te menge etew is menge vaal zin.
2 Kentahi niw sikandin te menge kedalig;
ipenudtul niw is langun he egkein-inuwan he menge vaal zin.
3 Deliǥa niw is kegkewaǥas din.
Kelipey kew is midangep diyà te kandin.
4 Sarig kew te Nengazen wey te zesen din.
Layun kew zangep diyà te kandin.
5-6 Sikiyu is menge pinilì te Megbevayà wey kevuwazan ni Abraham he suluǥuen te Megbevayà, wey menge kevuwazan daan ni Jacob,
tentenuzi niw is egkein-inuwan he menge paaǥi zin,
wey is egkein-inuwan he menge vaal zin, wey is menge kedhukum din.
7 Iyan sikandin kes Nengazen he Megbevayè tew,
ne edhukuman din is tivuuk he kelibutan.
8 Edtentenuzan din layun is kebpekid-uyun din.
Kenè din edlipatan is menge saad din taman te taman
9 Heini is kebpekid-uyun din, midhimu zin diyà te ki Abraham ne insaad din daan diyà te ki Isaac.
10 Ne impelaus din heini he kebpekid-uyun din diyà te ki Jacob, he migngezanan daan ki Israel,
ne heini is kebpekid-uyun din ebpedayun te taman te taman.
11 Migkaǥi sikandin diyà te kada sevaha kandan te,
“Ibeǥey ku kenikew is tanà he Canaan ne egkepengevilin nu heini wey te menge kevuwazan nu.”
12 Dengan deisey zà is menge etew te Megbevayà,
ne menge lumelengyawè pa sikandan diyà te tanà he Canaan.
13 Midhalinhalin sikandan diyà te menge nasyun wey menge ginhedian.
14 Piru wazà medtuǥut is Megbevayà he edèdaaǥen sikandan.
Para mepengelangi sikandan, midawey zin is menge hadì he ebpekigkuntada kandan.
Migkaǥi sikandin te,
15 “Kenè niw kevuta is pinilì ku he menge suluǥuen;
kenè niw pesipelahi is menge ebpeneuven ku.”
16 Mibpengelinteuwan te Megbevayà he mehitavù is bitil ziyà te Canaan.
Mid-amin din kuwaa is langun he keuyaǥan dan.
17 Piru zaan he impehuna zin diyà te Ehipto si Jose su wey metevangi sikandan.
Dutun he timpu uripen si Jose su imbelegyà sikandin.
18 Migkedinahan is menge paa zin ne midsuupan is lieg din te putew,
19 taman te netuman is midtagnè din.
Is netuman he lalag te Nengazen diyà te kandin kemetuuzan he metazeng sikandin.
20 Impaawà sikandin diyà te pirisuwan te hadì diyà te Ehipto he nengulu te mahabet he menge etew.
21 Ne impezumala kandin duen te hadì is turuǥan din wey is langun he menge azen din.
22 Ne ǥeine te iyan sikandin edumalà, ne zuen din keǥehem te kedawey te menge upisyal te hadì wey te kebpenurù te menge sumesambag te hadì.
23 Ne midhendiyà ensi Jacob te Ehipto he iyan kes tanà te menge kevuwazan ni Ham,
ne mid-ubpà sikandan dutun he menge lumelengyawà.
24 Ne impemezakel te Nengazen is menge etew zin;
ne egkereǥenan he edaag kandan is menge tig-Ehipto he menge kuntada zan.
25 Ne intuǥut te Nengazen he meepesi wey limbungi te menge tig-Ehipto is menge etew zin he menge suluǥuen din.
26 Ne zutun midsuǥù din si Moises he suluǥuen din wey si Aaron he pinilì din.
27 Ne impeehè dan diyà te tanà te menge kevuwazan ni Ham is egkein-inuwan he menge vaal te Megbevayà.
28 Impemerusirem te Megbevayà is Ehipto;
piru midsupak gihapun te menge tig-Ehipto is menge suǥù din kandan.
29 Midhimu zin he lengesa is menge wahig dan,
umbe nemematey is menge isdà.
30 Utew migerabi is bakbak diyà te tanè dan,
ne minsan is menge ruǥu te menge pengulu midselezan te utew gerabi he vakbak.
31 Pinaaǥi te suǥù te Megbevayà, duen utew gerabi he langew wey kutu ziyà te tanè dan.
32 Ne wazè din ipeuzan, kekenà, impepenggiyew zin wey impepengilat din dutun te tanè dan.
33 Mibpendezeetan din is menge pinemula zan he paras wey menge kayu he igira, wey zuma pa he menge kayu.
34 Pinaaǥi te suǥù din, nekeuma is utew gerabi he terapan he kenè en egkevilang.
35 Ne migkaan kayi is langun he menge pinemula ziyà te tanè dan ragkes en is menge abut dan.
36 Mibpenhimetayan te Megbevayà is langun he kinekekayan he menge anak dan he maama.
37 Ne impeǥawas din is menge tig-Israel puun te Ehipto,
ne wazà sikandan memenu, kekenà, nekeuwit dan pa te menge pelata wey menge vulawan.
38 Nengelipey is menge tig-Ehipto te ked-awà te menge tig-Israel,
su ǥeina te nahandek dan kandan.
39 Dutun te timpu te kedhipanew te menge tig-Israel, midsavuk is Megbevayà te ǥapun su para melembungi sikandan wey hapuy he ebpeketayew kandan emun mezukilem.
40 Mibuyù dan te keenen,
ne mibpeuwitan din sikandan te menge piyuǥù,
ne midhantey zin sikandan te keenen he ebpuun te langit.
41 Mid-ebriyan din is batu ne migawas is wahig.
Ne neiring heini te wahig he edtudà su midtudà heini pehendiyà te disirtu.
42 Ne mibeelan heini te Megbevayà is langun su wazè din lipati sikan is insaad din diyà te ki Abraham te suluǥuen din.
43 Impeǥuwè din puun te Ehipto he melipayen wey ebpemen-ugyab te kegkelipey is menge etew he pinilì din.
44 Ne imbeǥey zin kandan is tanà te zuma he menge etew;
ne nesunud dan is hineǥuan te zuma.
45 Midhimu heini te Megbevayà su para tumana zan is menge sulunuzen he ibpesunud din wey kesuǥuan din.
Deliǥa is Nengazen!