60
Is Huziyan he Penggubirnuwan diyà te Jerusalem
1 Enew ka, Jerusalem, ne silè ka iring te andew su neume en is kegkelibri nu, ne midsilè en diyà te kenikew is mekeǥeǥehem he kebpekiduma te Nengazen.
2 Egketembunan te utew merusirem is menge nasyun kayi te kelibutan, ne sikew mulà, ed-enlaǥan te mekeǥeǥehem he kebpekiduma te Nengazen.
3 Ed-uvey is menge etew ziyà te menge nasyun wey is menge hadì dan diyà te kerayag nu.
4 Tengteng ka ziyà te peliǥuy nu; netiǥum en is menge etew nu, ed-ulì en sikandan diyà te kenikew is ebpuun diyà te meziyù he menge lugar; henduen sikandan te menge vatà he edsepipiyen.
5 Emun egkeehè nu en heini ne melipayen ka, ne edrepey is kelipey ziyà te gehinawa nu, su is menge ketiǥeyunan diyà te menge nasyun ne ed-uwiten diyà te kenikew.
6 Ne sikew, Jerusalem, egkeeneb is menge tanè nu te menge kemilyu te menge tig-Median wey menge tig-Efa. Ne zuen menge etew ziyà te Sheba he ed-uwit te menge vulawan wey menge beyewà su ed-azap dan te Nengazen.
7 Ed-uwiten te menge tig-Kedar wey menge tig-Nebayot is mahabet he menge kerehidu zan diyà te kenikew, ne ibpemuhat heini ziyà te pemuhatà he para te Nengazen su wey melipey sikandin. Edhimuwen pa te Nengazen he mevantug is baley zin.
8-9 Ebiyahi is menge varku he henduen be te menge ǥapun he ebpemenlayang, wey henduen be te menge merepatik he edhendiyà te menge salag dan. Heini he menge varku gaked te menge etew he ziyà ebpen-ubpà te meziyù he menge lugar he ebperateng te Nengazen. Iyan ebpengegalen kandan is menge varku te Tarshish te ked-uwit te menge etew nu su wey mekelikù diyà te kenikew sikandan is ebpuun diyà te meziyù he lugar. Ed-uwit dan daan te menge vulawan wey menge pelata para te Nengazen he Megbevayè nu, he iyan kes waǥas he Megbevayà te Israel. Ne ebpekeveǥey heini kenikew te zengeg.
10 Migkeǥiyan te Nengazen is Jerusalem te, “Ebengunen te menge lumelengyawà is menge verengbeng nu, ne ebpenilbi kenikew is menge hadì dan. Minsan midsilutan ku sikew tenged te pauk ku, egkehizuwan ku zed sikew tenged te keupiya ku.
11 Dutun layun en abri is pultahan nu maandew wey mezukilem, su edewaten nu is menge ketiǥeyunan puun te menge nasyun. Ebparid is menge hadì he edseled diyà te kenikew.
12 Su egkepurung egkezeeti is menge nasyun etawa menge ginhedian he kenà ebpenilbi kenikew.
13 Egkehimu he kenikew is menge ketiǥeyunan diyà te Lebanon ragkes en is menge kayu zutun he pinu, inibru, wey sipris–su wey ikezayandayan diyà te valey he ubpeey ku.
14 Is menge kevuwazan te menge midaagdaag kenikew, ed-uvey ziyà te kenikew is edunghuy. Edluhud diyà te uvey te menge paa nu is menge midsudì kenikew, ne egngezanan ke zan he ‘Inged te Nengazen,’ etawa ‘Zion he Inged te Waǥas he Megbevayà te Israel.’
15 Minsan inselikwey ka wey midumutan, wey wazà edseǥipà kenikew zengan, edhimuwen ku he mevantug ka te wazà pidtemanan, wey igkelipey te langun he lapis te kevuwazan.
16 Ed-eturen ka te menge etew ziyà te menge nasyun wey te menge hadì dan he iring te vatà he ibpesusu te iney zin. Ne egketuenan nu he iyan a is Nengazen, kes Menluluwas nu wey Perevelukas, kes Mekeǥeǥehem he Megbevayà ni Jacob.
17 Edliwanan ku is menge inhiman te simbahan nu: is menge brunsi edliwanan ku te vulawan, is menge putew edliwanan ku te pelata, is menge kayu edliwanan ku te brunsi, is menge vatu edliwanan ku te putew. Ne kenà egkaawà diyà te kenikew is kelinew wey ketazeng.
18 Wazè en kebpenlupiglupig he egkehitavù diyà te tanè nu. Wazè en kezeetan he ebpekeuma ziyà te kenikew. Ebpekeliǥuy kenikew is kelibriyanan he iring te menge verengbeng, ne edalig kedì is edseled diyà te menge pultahan nu.
19 “Is andew wey vulan kenè en iyan ebpekeveǥey kenikew te kerayag maandew man etawa mezukilem, su siak, is Nengazen, iyan e en kerayag nu te wazà pidtemanan. Siak is Megbevayà, iyan e en kempet nu.
20 Iyan a egkehimu he andew nu wey vulan nu he kenà edsanlep; iyan a kerayag nu te wazà pidtemanan. Ne egketapus en is menge kemereǥenan nu.
21 Is langun he menge etew nu egkehimu he metazeng, ne egkaangken dan is tanà he Israel taman te taman. Midlimbag ku sikandan; iring sikandan te pinemula he impemula ku su wey a meveǥayi te zengeg.
22 Deisey zà sikandan, piru ebmahabet sikandan. Menge egkaayuayu zan, piru egkehimu sikandan he gemhanan he nasyun. Iyan a, is Nengazen he segugunà ebaal kayi zutun te hustu he timpu.”