46
Is menge Ed-ezapen diyà te Babilonia
1 Is menge ed-ezapen diyà te Babilonia he si Bel wey si Nebo ebpekezungul zutun te kegkergaha kandan te kerwahi he eguyuzen te menge asnu. Meveǥat heini he karga te egkeveley he menge asnu.
2 Pudu heini ebpekezungul ne kenè dan ebpekehimu he edlibri te mid-uwit kandan. Ragkes mismu heini is dezuwa he mibihag.
3 Pemineg kew kediey is menge kevuwazan ni Jacob, wey sikiyu is langun he nesamà he menge etew te Israel. Mid-atur ku sikiyu puun pa te kegkeetew niw.
4 Minsan ebmeǥurang kew en wey ed-uvanen en, iyan a ed-atur keniyu. Midlimbag ku sikiyu ne ebentayan ku sikiyu. Edtevangan ku sikiyu wey edlibriyen.
5 Hentei is ebpetug-iringan niw kediey? Duen be iring kedì?
6 Is duma he menge etew ibpeǥawas dan is bulawan wey pelata zan, ne edsuluhan dan is platiru su wey zin heini meveeli he ledawan su ed-ezapen dan, ne ed-ezapen dan heini.
7 Edtiangen dan heini, ne id-untud dan diyà te selevukà duen, ne zutun dà heini. Ne kenè en ebpekaawà dutun. Emun duen ebpengemuyù dutun, ne kenà heini edtavak, ne kenà heini ebpekelibri kandan te menge kelised dan.
8 Tentenuzi niw heini, sikiyu is menge mesinupaken, ne ipemula niw heini ziyà te isip niw.
9 Tentenuzi niw zaan is menge mibeelan ku zutun te nengehuna he timpu. Su iyan e zà Megbevayà, ne wazè en duma. Iyan a Megbevayà ne wazà iring kediey.
10 Puunè pa, impezayag ku en is diyà te egkehunaan. Puun pa zengan, midtagnè ku en ke hengkey is egkehitavù. Egketuman is menge pelanu ku; ebeelan ku is langun he egkesuatan ku te ebaal.
11 Ed-umew a te sevaha he etew he ebpuun diyà te meziyù he lugar ziyà te edsilaan, ne edtumanen din is pelanu ku. Edagmang sikandin iring te tagbis he ebpendawi. Is nekaǥi ku wey pelanu ku ne edtumanen ku heini.
12 Pemineg kew kediey, is utew menge mesinupaken. Kenè kew ebpekaangken te metazeng he kezeeǥan.
13 Kenà egkeuǥet, ebeǥayan ku te kezeeǥan wey ketazeng is Jerusalem. Uya, meǥaan ku en heini edlibriya, ne ebeǥayan ku te zengeg is Israel.