32
Is Metazeng he Hadì
1 Duen keuzemà hadì he metazeng, ne is menge upisyal zin, wazà egkevintahaan diyà te kedumala zan.
2 Is kada sevaha kandan egkehimu he iring te endilungà emun duen mevendes he keramag wey bagyu. Egkeiring daan sikandan te zezeisey he wahig he midtudà diyà te disirtu, wey alung te zekelà he vatu ziyà te meinit wey memaza he lugar.
3 Ebpen-ehè en wey ebpemineg en is menge etew te Megbevayà.
4 Is meǥègaanen ebpurung en ed-isip-isip su wey zin metueni ke hengkey is ereg he ebeelan din. Is etew he kenà egketau ke hengkey is egkeǥiyen din, ebpekekaǥi en te hustu wey keladu.
5 Is menge tulebung kenè en ebeǥayan te zengeg, ne is menge limbungan kenè en edtehuzen.
6 Su tinulebung is egkeǥiyen te tulebung, ne is mezaat he isip din dutun is pelanu te kebaal te vaal he kenà sungkad te egkesuatan te Megbevayà, tarù is menge lalag din mehitenged te Nengazen, wey kenè din edseǥipaan is menge egkevitil wey egkemezahan.
7 Mezaat is menge paaǥi te limbungan he etew. Ed-isip sikandin he edezeetan din is menge pubri pinaaǥi te kedtarùtarù, minsan dutun te timpu he ebuyù te hustu he kukuman is menge pubri.
8 Piru sikan is etew he tutuu he dungganen ebpelanu te kebaal te dungganen he menge vaal, ne edtumanen din heini layun.
9 Sikiyu is menge vahi he ebpeeyehey zà wey wazà igkeipeng, pemineǥa niw is egkeǥiyen ku ziyà te keniyu!
10 Subra zà he senge-tuig puun guntaan, ne ebpengerkeren kew en su kenè en ebpekeveǥas is paras, ne wazè niw egkepenrupù.
11 Kinahanglan he utew kew mahandek, is menge vahi he ebpeeyehey zà wey wazà igkeipeng. Luwasa niw is menge visti niw ne tetapis kew te saku.
12 Tebpia niw is kumeng niw tenged te kegkeseeng niw te egkehitavù te selebpeten he vevesukè niw wey pemuleey niw te paras.
13 Is tanà te menge etew ku edtuvuan dà te zuǥiyen he zezeisey he kayu wey menge sagbet. Ne egkaawà is melipayen he menge pemilya wey is inged he melipayen is menge etew zuen.
14 Is inged he mezakel zengan is mid-ubpà duen, ne kenè en maan ed-ubpaan. Is melig-en he menge vahin kayi, ebey-anan en. Is mibuntud-buntud wey turi kayi egkeiring te sibsivayan minsan keenu. Edriǥuriǥu kayi is menge asnu ne ebpemenabtab is menge langgam.
15 Egkehitavù heini taman te ibpehendini te kenitew is Mulin-ulin he ebpuun te langit. Ne is sibsivayan egkehimu he uuzaran he vevesukà.
16 Ne zutun te sibsivayan wey uuzaran he vevesukà, wazà pidtemanan te hustu he kukuman wey ketazeng.
17 Is beǥas te ketazeng iyan is meupiya he ked-ubpà, kelinew, wey kenà egkekeizan te wazè din pidtemanan.
18 Sikiyu is menge etew te Megbevayà, ebpekeubpè kew ziyà te melinawen he menge ubpeey, he meziyù te vangkit, ne wazà edsamuk keniyu.
19 Minsan egkezeetan is ketelunan wey egkengevengkag is menge inged tenged te ǥiyew he iring te menge vatu,
20 edtuvazan kew te Megbevayà. Layun egkevinyagì is menge pinemula niw, ne ebpekeuyayà he ebpenabtab is menge ayam niw ziyà te minsan hendei.