1 Pemineg kew! Edezeetan te Nengazen is kelibutan taman te kenè en heini egkepulusan, ibpeyapat din is menge meǥinged kayi. 2 Sevaha zà is egkepeveyaan te langun–memumuhat etawa meǥinged, egalen etawa suluǥuen, ebpememelegyà etawa ebpememasa, ebpeutang etawa ed-utang. 3 Egkepurung egkezeeti is kelibutan ne wazè en egkesamà kayi he menge azen. Egkehitavù heini su iyan is Nengazen migkaǥi kayi. 4 Egkemezahan wey ebadtik is tanà. Ebmeluya is menge etew te tivuuk he kelibutan, ragkes en is dungganen he menge etew kayi te kelibutan. 5 Midremerikan is kelibutan te menge meǥinged kayi, su wazè dan tumana is menge kesuǥuan wey menge sulunuzen he ibpesunud te Megbevayà. Midrapas dan is wazà pidtemanan he kebpekid-uyun te Megbevayà kandan. 6 Umbe, edrewakan te Megbevayà is kelibutan, ne televaken heini te menge meǥinged kayi tenged te menge salè dan. Edezeetan sikandan he iring te ebinsulan te hapuy, ne zeisey zà is egkesamà kandan. 7 Egkeǥangu is menge paras ne egkaamin is binu. Egkengeseeng is ebpemenlipeylipey, 8 ne kenè en egkezineg is egkezumahan te kelipey he tukar te menge tamburin wey menge alpa, wey is ugyab te menge etew he edsilibra. 9 Kenè en egkezumahan te kanta is ked-inum dan, ne ebmepait is inumen dan. 10 Egkevengkag is inged ne kenè en heini egkepulusan. Kada valey ne edlekevan is gemawan din su para wazà ebpekeseled. 11 Ebpemengulahì is menge etew ziyà te menge zalan su ebuyù dan te vinu. Is kelipey zan egkeliwanan te kegkeseeng. Wazè en kelipey kayi te kelibutan. 12 Egkevengkag is inged ne kenè en egkepurungan, ne egkengeǥevà is menge pultahan kayi. 13 Deisey zà is menge etew he egkesamà kayi te langun he menge nasyun kayi te kelibutan, egkeiring te ulibu etawa paras he rerawen dà is egkesamà. 14 Is egkesamà he menge etew ne ebpemen-ugyab te kegkelipey zan. Is diyà te edsenlepan idsangyew zan is kegkemekeǥeǥehem te Nengazen. 15 Umbe, is menge etew ziyà te edsilaan wey is diyà te menge veyvey te zaǥat, ereg sikandan he edalig te Nengazen he Megbevayà te Israel. 16 Egkezineg is kanta ziyà te kinemeziyuan he vahin te kelibutan he edhenduen te, “Edeliǥen is Metazeng he Megbevayà!”

Piru mekehizuhizu a su midluyahan a. Su mibpedayun gihapun is kedluib te menge meluiven he menge etew. 17 Sikiyu is menge etew kayi te kelibutan, kegkahandek, budsi, wey litag is edtaǥad keniyu. 18 Is ebpelaǥuy su egkahandek, ne egkeulug diyà te vudsi ne is egawas puun dutun te vudsi ne egkelitag.

Edtanà is mereǥes he uzan, ne egkehuyung is pundasyun te kelibutan. 19 Ebeka is tanà ne egketevì heini. 20 Ebpekeziregdireg heini iring te egkelangut. Egkehuyung heini he iring te lawig he egkesuǥat te keramag. Egkeveǥatan heini tenged te salà, ne egkezeetan ne kenè en ebpekeuman ebpekeenew.

21 Dutun he timpu edsilutan te Nengazen is mekeǥeǥehem he menge linimbag diyà te langit, wey is menge hadì dini te kelibutan. 22 Edtiǥumen sikandan diyà te vudsi iring te menge pinirisu. Ebpirisuwen sikandan, ne edsilutan keuzemà. 23 Ebmerusirem is andew wey vulan su edhadì is Nengazen he Mekeǥeǥehem diyà te Buvungan he Zion diyà te Jerusalem. Ne zutun egkezayag is gehem din diyà te etuvangan te ebpemendumala te menge etew zin.