1 “Dengan, emun egkaǥi is tribu ni Efraim egkerkeren te kegkahandek is duma he menge tribu te Israel, ne edeliǥen dan heini. Piru nekesalà is menge etew kayi he tribu tenged te ked-azap dan ki Baal. Umbe nemematey sikandan. 2 Guntaan, sikiyu is migngezanan te Efraim, mibpedayun kew he ebaal te salà. Mibeelan niw he ledawan is menge pelata niw su ed-ezapen niw. Piru heini is langun, mibeelan dà te etew zà duen ne pinaaǥi zà heini te neisip din. Migkaǥi kew pa te ebpemuhat kew te etew kayi te menge ed-ezapen he vaka ne edhazek kew ziyà te kandan. 3 Umbe, egkahanew kew iring te edsaǥad he virisbiris etawa zehemug emun meselem, etawa iring te ukap diyà te ǥunasà he idlayap te keramag etawa evel he egawas diyà te peǥewasà duen.

4 “Iyan a kes Nengazen he Megbevayè niw he mibpeǥawas keniyu ziyà te Ehipto. Kinahanglan he wazè en duma he egkilelaan niw he Megbevayà wey Menluluwas, kekenà, iyan e zà. 5 Mid-elimahan ku sikiyu ziyà te disirtu he utew memaza he lugar. 6 Piru hein midtuvazan ku sikiyu ne mid-uswag kew, nehimu kew he mepelevawen ne midlipatan ad keniyu. 7-8 Umbe, edsurungen ku sikiyu wey edezeetan iring te ked-etaki wey kedezaat te zumezaas he langgam te edewiyen din, ed-iringan ku is ebeelan te erimaung etawa bir he ed-eǥawan te anak din. Ed-iringan ku is liyupardu su ed-eyanan ku sikiyu ziyà te menge zalan. 9 Edezeetan ku sikiyu is menge tig-Israel, su ǥeina te migkuntada a keniyu is iyan pezem edtavang keniyu. 10-11 Mibuyù kew te hadì wey menge upisyal su midsarig kew he iyan sikandan ebpeketavang keniyu. Umbe tenged te kegkepauk ku ne imbeǥey ku sikandan diyà te keniyu, ne tenged te kegkeepes ku in-awè ku sikandan diyà te keniyu. Na, hendei en be is hadì niw wey is menge pengulu ziyà te kada inged he edlibri keniyu? 12 Is menge salè niw ne kenè ku edlipatan, ibpeiring ku heeyan te menge surat he midtenges wey intaǥù.

13 “Duen niw en penahun he ebeǥuwen niw is kebpengungubpaan niw. Piru tenged te wazè niw kedsavut, wazè niw heini beliya. Iring kew te vatà he kenà egkesuat he egawas diyà te getek dutun te idlusad en pezem sikandin. 14 Edlibriyen ku ve sikiyu te kemetayen? Kenà! Egkeǥiyan ku pa ganì is kemetayen te, ‘He kemetayen, pekevisa ke en. Ne dezeeti nu en sikandan. Kenè ku sikiyu egkehizuwan.’ 15 Minsan edhuna kew he meuswaǥen kenà te menge kezuzumahi niw, edezeetan ku sikiyu. Ibpaaǥi ku is meinit he keramag he ebpuun diyà te disirtu he zapit te edsilaan ne egkengemezahan is menge serebseb wey menge kalut niw. Ne ed-eǥawen is mahalen he menge azen niw. 16 Ereg he edsilutan is menge tig-Samaria tenged te kebpekidsukulè dan kediey te Megbevayè dan. Egkeǥerà sikandan tenged te tebek. Edrunteken is dezeisey he menge anak dan, ne edsirian is meǥingey he menge vahi kandan.”