26
Kes Tulda he Ed-ezapan
(Exodus 36:8-38)
1 “Ipeveeli nu is Tulda he Ed-ezapan. Is egemiten te kebeeli kayi, ne sepulù he lukut he linu he eburdahan te welin he meitem is kaavuavu, merudtem wey kanggan. Ne pepurungi nu heini peburdahi te zagwey te menge kirubin.
2 Iped-iiring niw is kezekelà te kada sevaha, 42 he ǥiek is kelayat din ne heenem he ǥiek is keluag din.
3 Is kada lelima zutun te sepulù he kurtina ne ibpedliliib niw te edtahì (ne haazà is sepulù egkehimu zà he zezuwa).
4 Ne peveeli nu te mibpen-iring te sising is manggad he meitem is kaavuavu zin is diyà te kada kilid te ikezuwa he apid duen te sevaha zutun te impikit he menge tila;
5 kinahanglan he 50 he iring te sising is diyà te kada kilid ne ibped-aatbang haazà.
6 Ne mebaal zan te 50 he kaw-it he vulawan su wey mekedliliib sikan is menge mibpen-iring te menge sising duen te zezuwa he impebpikit he menge tila. Pinaaǥi kayi ne egkeveelan is Tulda he Ed-ezapan.
7 “Ne pevaal ka zaan te tambun duen te Tulda. Ne egemiten is 11 he lukut he manggad he vulvul te kambing
8 Ne iped-iiring niw is keluag wey kelayat dutun te 11 he manggad, kinahanglan he 45 he ǥiek is kelayat din ne heenem he ǥiek is keluag din.
9 Ipedliliib niw is lelima zutun, ne sikan is heenem, ipedliliib niw ǥihapun. Ne is ikeenem he manggad, ne edlumpien diyà te egkesineruwan duen te Tulda.
10 Kinahanglan he zuen 50 he mibpen-iring te sising is kilid duen te id-apid te mibpebpikit he menge tila,
11 ne kinahanglan he ebperisan haazà is menge ebpen-iringen te sising te 50 he kaw-it he brunsi.
12 Edteyuntunen diyà te egkeiniyuǥan duen te tulda is ketengà te manggad he ebpekesubra.
13 Ne edteyuntunen daan diyà te kada kilid is senge-ǥiek wey tengà he manggad he subra te idtambun duen te Tulda.
14 Is divavew zuen te tambun te tulda, pezivevawi niw te lundis te meemahan he kerehidu he edtinaan te meriǥà, ne umani niw pa pezivevawi te meupiya he kelasi te lundis.
15 Is kayu he egkeǥamit niw he menge tabla zuen te Tulda he ed-ezapan, iyan is; metulid he marku he ekasya.
16 Is kada sevaha zutun, ne 15 he ǥiek is keluǥayad din ne zezuwa he ǥiek is keluag din,
17 Ne egkurtiyan niw is kada sevaha zutun su wey mekedhuhulmahà emun ibpenaud niw en. Kinahanglan he wazà minsan sevaha he kenè niw egkurtiyan.
18 Is 20 he tabla kayi, ziyà egemita te egkezivavà he vahin duen te Tulda.
19 Baal kew te 40 he untuzà he pelata he ibpesungkad duen te menge tabla, zezuwa he untuzà is ibpesungkad diyà te kada sevaha he tabla he ziyà ibperenged te kinurtiyan he vahin dutun te tabla.
20 Ne 20 he tabla is egemiten para te egkezizaya he vahin te Tulda,
21 wey sungkad te 40 he menge peuntuzà he pelata–dezuwa he peuntuzà is diyà te kada tabla.
22 Ne heenem he tabla is egkeǥamit diyà te kilid he zapit te edsenlepan,
23 ne zezuwa he tabla is egkeǥamit diyà te kada suyuk diyà te kilid
24 ne haazà ibpegkepleey puun te zizalem pehendiyà te zivavew he iyan ebpekeveǥey te purma zutun te suyuk. Ne pudu ed-iringa kayi is dezuwa he tabla ziyà te menge suyuk.
25 Umbe, zuen walu he menge tabla he para ziyà te menge suyuk wey 16 he menge peuntuzà he pelata su is kada tabla, egkinahanglan te zezuwa he peuntuzà.
26 “Pevaal ka zaan te menge marku he kayu he ekasya he para te elavat, lelima is para te egkezizaya he vahin duen te Tulda,
27 lelima zaan is para te egkezivavà he vahin, wey lelima pa he para te zapit te edsenlepan he egkeiniyuǥan he vahin duen te Tulda.
28 Ne sikan is marku he ibpeteliwazà, kinahanglan he ebpekepangkus duen te Tulda he ed-ezapan, ne ziyà haazà idtaud te teliwazà he pid-elangan duen te menge tabla.
29 Epizi niw te vulawan sikan is menge tabla ne vaal kew te mibpen-iring te rintì he vulawan he ibpenaud dutun te menge tabla he iyan edlugluǥan te menge marku. Ne elin daan epizi niw te vulawan sikan is menge marku.
30 “Kinahanglan he edsungkad duen te mudilu he impeehè ku kenikew kayi te vuntud is kedtukuza niw zuen te Tulda he Ed-ezapan.
31 “Baal kew te kurtina he linu he miburdahan te welin he meitem is kaavuavu, merudtem wey kanggan. Ne eburdahan heini te mekempet he zagwey te menge kirubin.
32 Ne isanggat niw ziyà te menge kaw-it he vulawan he idtaud diyà te heepat he tukud he ekasya he ed-epizan te vulawan he ziyà ibpehitindeg te heepat he untuzà he pelata.
33 Isanggat niw haazà is kurtina ziyà te kaw-it ne isavuk niw ziyà te zivaluy zutun te kurtina sikan is Kavan te Kebpekid-uyun ku keniyu. Pinaaǥi zutun te kurtina egkevahin is seled te Segradu he Lugar wey is Utew Segradu he Lugar.
34 Sikan is Kavan te Kebpekid-uyun ku keniyu, kinahanglan he ziyà idsavuk te Utew Segradu he Lugar ne kinahanglan he edtembunan duen te tambun din.
35 Ne isavuk niw sikan is lemisahan diyà te gawas te kurtina, diyè niw isavuk te zapit te zizaya he zutun te seled te Tulda. Ne id-atbang niw zutun te lemisahan sikan is selevukà te sulù su ziyè niw mulà idsavuk te egkezivavà he vahin dutun te seled te Tulda he Ed-ezapan.
36 “Pevaal ka zaan te sevaha pa he kurtina, he para te ǥemawan dutun te Tulda he Ed-ezapan. Is kurtina kinahanglan he linu he eburdahan te welin he meitem is kaavuavu zin, merudtem wey kanggan. Kinahanglan he meupiya is kegkeburdahi kayi.
37 Ne para kayi he kurtina, baal kew te lelima he tukud he ekasya he ed-epizan te vulawan, ne itaud niw ziyà te kada sevaha zutun is kaw-it he vulawan. Ne vaal kew zaan te lelima he brunsi he ebpehitindeǥan dutun te menge tukud.”