18
Mibpenumbaley si Jetro ziyà te ki Moises
1 Si Jetro, sikan is memumuhat diyà te Midian he enuǥang ni Moises, netudtulan sikandin te langun he mid-ulaula te Megbevayà diyà te ki Moises wey ziyà te menge etew zin he menge kevuwazan ni Israel. Nezineg din ke mibmenumenu te Nengazen is kebpeǥewasa zin te menge Israilihanen puun te Ehipto.
2-3 Hein aney, impeulì ni Moises is esawa zin he si Sipora wey sikan is dezuwa he anak dan he menge maama ziyà te ki Jetro he enuǥang din. Is ngazan te sevaha he anak dan iyan si Gershom, su ǥeina te in-anak sikandin te timpu te kegkelumelengyawà ni Moises.
4 Ne is sevaha pa, migngezanan din te Eliezer su geina te iyan edtavang kandin is Megbevayà he ed-ezapen te kepuun din; ne iyan midlibri kandin wey kenà sikandin mepatey te hadì te Ehipto.
5 Ne midhendiyà si Jetro, wey is esawa ni Moises he si Sipora wey sikan is dezuwa he anak dan te kampu eni Moises diyà te sibsivayan he uvey te vuntud te Megbevayà.
6 Daan he mibpeuwitan ni Jetro si Moises te lalag he edhenduen te, “Siak is enuǥang nu he si Jetro, ebpekeuma a ziyan, ne zuma ku is esawa nu wey is dezuwa he anak nu.”
7 Ne tenged kayi midsinuǥung ni Moises is enuǥang din diyà te ǥawas ne midluhud sikandin diyà te etuvangan te enuǥang din wey midhezekan din daan. Ne mibpeinseey sikandan mehitenged te kebpekesavuk te uman sevaha kandan, ne zutun midseled dan diyà te tulda.
8 Ne zutun midtultul ni Moises diyà te enuǥang din is minsan hengkey he mid-ulaula te Nengazen diyà te hadì te Ehipto, wey ziyà te zuma pa he menge Ehiptohanen he para te keupiyaanan te menge Israilihanen. Midtudtul zin is langun he menge mereǥen he nengeseǥazan dan diyà te imbayè dan wey is menge vaal te Nengazen te kedlibri kandan.
9 Ne ingkelipey ni Jetro is langun he meupiya he menge paaǥi te Nengazen te kedlibriya zin te menge Israilihanen para kenà mekezezaat kandan is menge Ehiptohanen.
10 Ke sikandin te, “Idalig tew te Nengazen is kedlibriya zin keniyu ziyà te ǥehem te menge Ehiptohanen wey te hadì dan.
11 Guntaan, netuenan ku en he utew lavew he gemhanan is Nengazen kenà te langun he ed-ezapen, su midlibri zin is menge Israilihanen te kedèdaaǥa kandan te menge Ehiptohanen.”
12 Ne si Jetro he enuǥang ni Moises, nemuhat diyà te Megbevayà te pemuhat he edtutungen wey zuma he menge ibpemuhat diyà te Megbevayà. Ne zutun te kemulu zin en ebeeli haazà, ne nekeuma si Aaron wey is langun he menge edumala te Israel. Ne migkaan dan duma ki Jetro zutun te etuvangan te Megbevayà.
Mibpilì si Moises te menge Pengulu he Ebpekeuǥup Kandin te Kebpenhusey
(Deuteronomio 1:9-18)
13 Ne zutun te sunud he andew, mibpinuu si Moises is ebpenhusey wey edsambag te menge etew, ne nehepunan is kedliǥuyi kandin te menge etew.
14 Ne hein naahà ni Jetro is langun he mibeelan ni Moises dutun te menge etew, migkeǥiyan din si Moises te, “Maan is ebeelan nu heini kayi te menge etew? Maan is sebsevaha nu is ebaal kayi? Edlinya is menge etew kayi te etuvangan nu puun pa te meselem taman en te ebmerusrusirem en.”
15 Ne midtavak si Moises te, “Geina te ed-uvey sikandan kayi te kediey su id-insè dan ke hengkey is egkesutan te Megbevayà.
16 Ne emun duen menge kesevaan dan, idangep dan kayi te kediey, ne edhusayen ku sikandan ke hentei kandan is ebpekevenar. Ne ibpenurù ku kandan is menge suǥù wey menge sulunuzen he ibpesunud te Megbevayà.”
17 Ne migkaǥi si Jetro te, “Kenà meupiya heeyan is paaǥi nu te kedhimuwa nu kayi.
18 Mibeelan nu is kegkereǥeni nu wey kayi te menge etew. Utew mereǥen heini ke iyan ke zà.
19 Pemineǥa a kenikew ǥuntaan su edsembaǥan ku sikew, ne verakat he zumahi ka te Megbevayà. Leusa nu is ked-ul-ulaha nu te ked-uvey ziyà te Megbevayà para te menge etew. Izangep nu ziyà te kandin is kesevaan dan.
20 Ipelaus nu is kebpenurù nu kandan te menge suǥù wey menge sulunuzen he ibpesunud te Megbevayà. Penurua nu sikandan te paaǥi te kebpengungubpaan wey minsan hengkey he ebeelan dan.
21 Iyan, pilì ka te metau he menge etew he ebpekeuǥup kenikew te kebpenhusey nu. Kinahanglan he metau sikandan he edhusey, edtahud te Megbevayà, egkeseriǥan, ne kenà edawat te sipsip. Himuwa sikandan he menge zatù te menge grupu te menge etew he tig-1,000, tig-100, tig-50 wey tig-10.
22 Ebpenilbi sikandan he menhuhusey te langun he timpu. Iyan sikandan ebpenhusey te minsan hengkey he melemu zà he menge samuk, iyan, is mereǥen he menge samuk, ne ziyè dan idangep te kenikew. Ne heini he paaǥi, ebmahagkap is menge vaal nu te kedtavang kandan.
23 Netuenan ku he iyan heini egkesuatan te Megbevayà he ebeelan nu; emun ed-ul-ulahan nu heini ne kenè ka egkereǥenan. Ne heini he menge etew. Ne zutun, melinawen is kebpekeulì kayi te menge etew.”
24 Ne mibpezumdumahan ni Moises haazà is sambag te enuǥang din.
25 Mibpilì sikandin te menge Israilihanen te menge etew he uluwanen he edhusey, ne midhimu zin sikandan he menge upisyal te grupu te menge etew he tig-1,000, tig-100, tig-50, wey tig-10.
26 Nenilbi sikandan te menge etew he iyan menge zatù te langun he timpu. Iyan sikandan edhusey te menge melemu zà he menge samuk, iyan, is menge mereǥen he menge samuk ne idangep dan diyà te ki Moises.
27 Ne impeulì ni Moises is enuǥang din diyà te nasyun din.