6
Is Kezeetan te menge Pengulu te Israel
1 Kehizu niw te menge pengulu ziyà te Zion wey Samaria, he ebpeeyehey zà he wazà igkeipeng. Mid-isip niw is keugelingen niw he dungganen he menge etew ziyà te lavew he nasyun, ne iyan kew edengepan te menge meǥinged diyà te keniyu.
2 Egkeǥiyan niw is menge sakup niw te, “Ahaa niw is inged he Calne, wey is dekelà he inged he Hamat, wey is inged he Gat he sakup te Filistia. Hengkey, edhuna ve sikandan he mekeǥeǥehem te ginhedian te Juda wey Israel? Kenà. Edhuna ve he meluag is tanè dan te kenitew? Kenà daan.”
3 Kehizu niw su kunaan niw ke kenà egkeuma is andew te kedsiluti keniyu. Tenged te mezaat he vaal niw midhimu niw he meǥaan meuma heeyan is andew he utew ed-iseg is kebpendezaat.
4 Kehizu niw te edhidhizeǥè dà diyà te mahalen he menge katri niw, he ebpetakè en egkaan te usa te nati he kerehidu wey impelambù he nati he vaka.
5 Kehizu niw te ebaal te menge kanta zutun te edtukar kew te alpa wey susuaten he ebaal te sunata pinaaǥi te menge instrumintu iring ki David.
6 Kehizu niw te utew vuleǥuk te vinu wey egamit te mahalen he menge pehemut, piru wazà meseeng te edtelinguma he kezeetan te nasyun niw.
7 Ne sikiyu is menge pengulu, iyan kew egkehuna he ebihaǥen, ne egketapus en is menge pista niw wey kebpeeyehey.
Igkeepes te Megbevayà is Kebpelavew ziyà te Israel
8 Nenangdù is Nengazen he MEGBEVAYÀ, kes Megbevayà he Mekeǥeǥehem. Ke sikandin te, “Igkeepes ku is kebpelavew te menge kevuwazan ni Jacob, wey midrewakan ku is melig-en he menge vahin te inged dan. Umbe ibeǥey ku ziyà te menge kuntada is inged dan wey is langun he taǥù kayi.”
9 Emun duen sepulù he etew he egkesamà diyà te senge velayan ebpematey ǥihapun sikandan is langun.
10 Is ebpatey, egkuwaan te kezuzumahi zin su edtutungen din. Ne ed-insaan din is ed-eles diyà te seled te valey te, “Duen nu pe be zuma keniyan?” Ne emun edtavak te wazà, ne egkaǥi haazà is mid-insà te, “Kenè ke en kaǥikaǥi su kela ke mesempiti nu is ngazan te Nengazen ne egkesilutan ki.”
11 Benar iyan, emun iyan en ebmandù is Nengazen, edrunteken din is langun he menge valey, deisey se zekelà.
12 Ebpekepelelaǥuy ve is menge kudà diyà te vetuwen he kelendiǥan? Igkeeradu ve ziyà te zaǥat is baka? Simpri kenà. Piru is kukuman midhimu niw he ebpekezezaat te etew, ne is metazeng midhimu niw he mezaat.
13 Ingkelipey niw is kebpekezaag niw ziyà te inged he Lo Debar wey Karnaim, ne ke sikiyu te, “Nezaag tew sikandan pinaaǥi te keugelingen tew he zesen.”
14 Benar iyan, migkaǥi is Nengazen he Megbevayà he Mekeǥeǥehem te, “Sikiyu is menge etew te Israel, ibpesurung ku te menge etew ziyà te sevaha he nasyun. Edlislisezen kew zan ne edsekupen dan is lugar niw puun te Lebo Hamat taman te zal-ug diyà te Araba.”