22
1 Sehe ángel ne, catsingacun ná ndajyë xi hacui nandá xi sua cjuahñu. Nandá vëhë ne, nandá yufa xi hasen sacuaha ndyojo tsin. Hane nandá vëhë ne, vetju tsëhë cahndë́ rcun rë Nina cojo Tsánga,
2 hane vanga taha ndiyatë cavasen nandya. Xingu xingu ladu tsëhë ndajyë ne, secun ya tsëhë cjuahñu. Ya vëhë ne, tejó ndiya xi ngu nu tjin chan tsëhë tu rë ta, chuva sá sua tu rë. Hane xca rë ya ne, machjirëhë xi tsirqui rë xutacjín jan.
3 Ngajan ne, tsajin mé xi chohovëë Nina tsëhë. Ngajan nandya vë tacun cahndë́ rcun xi tsëhë Nina cojo Tsánga. Hane ngajan ne, me xi tacun xi xa rë me ne, cjuahacuenda rë me.
4 Scuëë me xcun Nina, hane ñihi rë Nina ne, setaha xten me.
5 Mamijí rë ndihi, sa ndihi rë lámpara o sa tsëhë tsuhi ta, Nina Nai naja ne, sua rë me hasen rë me. Hacuaha gubiernu xi sahmi me ne, cjuecani rë yëjë nu, yëjë nixtin.
Camatiña nixtin xi cuya Jesucristu
6 Hya xi camá ne, cachja ángel jan cojo ná cuitjin:
―Cjua vihi ne, cumacjain nuju tsëhë ta, quixi jain. Nina, Nai naja ne, catsingatju me ángel rë me xi sua cumachaya rë hasen rë xuta xi chja cjua rë me tsëhë xcusun xi xati cumá.
7 Chja cjua ta:
―Tuhuncuendun xi ngutjen cuinduvá. Jercu ndaja tsëhë xuta xi vetjondaja me sahmichihin me cjua rë libru vihi xi chja tsëhë xcusun xi sehe cumá.
8 Juan hmí ná. Cahndë́, hacuaha cahvë xcusun vihi. Hane hya xi camá cahndë́ cahvë ne, caticjaxcun taha ntsacu ángel jan xi catsingacun ná xcusun vihi ta, cjuaharcun ángel jan.
9 Peru cachja ángel cuitjin:
―¡Xicanihñii! ta, tangun ni chjí naja, ta xa naha ne, tangun cojo xa xi nihñu cojo xingun xi má profeta cojo yahnga xingun xi vetjo me cjua rë libru vihi. Nina ne, me vëhë chjuhunrcun me.
10 Hacuaha cachja me cuitjin:
―Xicavisaniin sellu cjua xi sehe cumachihin xi hincha libru vihi, ta nixtin rë ne, ha meje cuechu.
11 Cuejña xi xuta xi choho sahmi me ne, catjinduju xi choho sahmi me, hane xuta tsehen ne, catjinduju me cojo cjuatsehen rë me, hacuanitjin ni xuta xi quixi me ne, catjinduju me cojo ndiya rë cjuaquixi, hane xuta xi tyjahi cjuatacun rë me, catjinduju me cojo ndiya rë cjuatacun tyjahi.
12 Chja me cuitjin:
―Tuhuncuendun xi ngutjen cúya. Hane xi cúya ne, nduva cojo chjí nuju. Suá rë jimangu me chuva rë hacutjin xi casahmi me.
13 Ngahan ne, sacuaha letra xi vetsihin cojo letra A ne, vijnetaha cojo zeta. Hacui ni ngahan xi ntsacu vetsihin ne, hacui ni ngahan xi vijnetaha. Tejña hisca ntsacu cavetsihin yëjë ni, hane tejña cuaha hya xi cjuë. Matitjun, matjengui ngahan.
14 Jemu ndaja tsëhë xuta xi catsityjahi me tsjian rë me cojo sa xi sacu rë me cahndë́ xi sinë me tsëhë ya rë cjuahñu xatsë. Xi cuatjin ne, cuma cuisehen me taha tingotjo rë nandya jan.
15 Peru xuta tsehen cuiyuju me ndatsen cojo xuta xi sahmi cjuasurqui, o xi sahmi cjuatsehen ngajñi xihin o sa ngajñi chjuun, o xi tsiquehen, o xi faharcun nina ndyojo o me xi tsihmucacun cjuandacha. Yëjë ni me vëhë cuiyuju me ndatsen nandya.
16 ―Ngahan, Jesús ne, catsingátju ángel naha xi tsinguixi xcun ngayun xuta yungun cjuaquixi vihi. Ngahan ne, tjë rë David má ngahan. Quihndindaicjin rë David má ngahan. Niñú seti tsëhë nguitajñu má ngahan. ―Cuatjin chja Jesús.
17 Ngajan xi Hasen rë Nina cojo na xi cuixan cojo Tsánga ne, cjuayangui me cuitjin:
―Nduvun.
Hacuaha me xi cuihndë cjua vëhë ne, cuichja me cuinitjin ni:
―Nduvun.
Sa xi xinda nuju ne, nduvun. Sa xi cjueyatacun ne, siuhun tu cuatjo ni nandá rë cjuahñu.
18 Suá cumachaya nuju ngayun xi visiñuju cjua rë xujun vihi xi sehe cumachihin ta, sa xi tjin yo xi cuesuntaha sa cjua cojo cjua xi camahindu nguehe, Nina ne, cuesúntaha me cjuañihi xi camahindu xcun xujun vi.
19 Hacuanitjin ne, sa xi tjin yo xi cjuahataha rë cjua vihi xi sehe cumachihin, Nina ne, cjuahaxin me cahndë́ xi cumá rë me xcun xujun rë cjuahñu cojo tsëhë nandya xi catsinchacun Nina cojo tsëhë xcusun ndaja xi camahindu xcun libru vihi.
20 Hane me xi sua cjuaquixi xi cuicun vi ne, chja me cuitjin:
―Hatuxa nduva xati.
Cuatjin chja me. Cuatjin ndatjin. Nduvun, Tatá Jesús.
21 Quihndë ne, catisatë nuju cjuandaja rë Nai naja, Jesucristu. Cuatjin jain cumá.